2
Pachia Byapianaw Adingpaw
1 Tukeiccuze nang tuh humhung na thua zemah milae kha bya na pia ze, ngaethya kho na thua lan khyh; pawccecize bya na pianawpaw uccaw ccaccei maw kha na cyibua keiccuze milae bya na pianaw kya namaw toulou kha sei na bekuhpaw nynh na thua.Ref 2.1: Mat 7.1; Luk 6.37
2 Pachia nynh tuhcihawpaw uccaw a raetu hae kha byaccing thyhte bya a pia hae cipaw ah ny oh.
3 Tuhcihawpaw uccaw a cyihtupaw kha bya na pia zah namaw nynh tuh-e uccaw tuh na cyibua ze, Pachia byapianaw kyate ka lue cih cite na tuakuh tou?
4 Tuhkhyhze myarya lepaw a thawccinaw, a ngaesangnaw te a lungsaenaw kha pawlangria leite tou na ung? Pachia thawccinaw nynh nang kha ngaesikunaw kalan ae cciakhae cipaw na nyh khyh tou?
5 Thuasalama na lungkhungnaw te ngaesiku ry leinaw thinlung keiccuze Pachia kya-e adingpaw byapianaw langsapyaku nin, thinrianaw nin kya namaw hanlan thinrianaw kha na ccyku.
6 Pachia nynh ccungccaw miakaw kha a cyisahnaw thyhte amee a pya cih.Ref 2.6: Sam 62.12; Ptb 24.12
7 Ahoypaw rya kha lungsaete lah zah phu-enaw, sawtuanaw te chi kho leinaw a ccung hae paw tuh Pachia nynh zungzae hiinnaw kha a pya cih hae.
8 Thuasalama mimaw hanlan kyalya tua hae zah byaccing kaw kha ngae leite hoyleinaw kaw a ngae hae paw tungvaw kya Pachia bungpawnaw te thinrianaw a um cih.
9 Masaty lan Judah hae, tukoute Zenta hae mah hoyleinaw a raepaw miakaw tuh vawsawnaw te lungriathaenaw kha a tung cih hae.
10 Thuasalama masaty lan Judah hae, tukoute Zenta hae mah hoynaw a raepaw miakaw tuh Pachia nynh phu-enaw, sawtuanaw te daenaw kha a pya cih hae.
11 Pawccecize Pachia tuh mirymihuapo khyh.Ref 2.11: Deu 10.17
12 Pawccecize Kawbya ny leite a sei hae paw balyn tuh Kawbya leite a roh cih hae; Kawbya mang a nyh hae pite a sei hae paw balyn mah Kawbya thyhte byapia athua cih hae.
13 Pawccecize Kawbya a thae hae paw hynh Pachia malang a ding hae paw thua khyh, thuasalama Kawbya a zui hae paw kha nynh ading cite ci athua cih hae.
14 Pawccecize Kawbya hoi lei hae paw Zenta hae nynh kawbya a hoi lei hae pite kawbya kya umpaw uccaw hae kha aphung lante he a zui hae tuh, tuh-e tuh mih hanlan Kawbya lang yn tang.
15 Minmin nynh mih thinlung kya azeikuhpaw Kawbya kya-e bya hae kha a langsah hae, mimaw nykunaw thinlung nynh mah ccaekia a khan; pawccecize mih tuanaw nynh mimaw kha vaekhakheit seibe zah, vaekhakheit a ngaethya.
16 Kae nynh ka hopaw thehoypaw thyhte Pachia nynh Jesu Khri liate ccungccaw balyn nynh aruh lante a tuaku hae paw kha byapianaw nin kya bya a pia cih.
Judah hae te Kawbya
17 Nang nynh Judah paw na cikuh zah Kawbya kha doliakute Pachia te na kyngkunaw oh kyakhe na pooku.
18 Pachia rynaw kha na nyh zah Kawbya te thuihei na thua keiccuze ahoy huapaw uccaw hae kha na phiathya zah,
19 nang tuh mitmoh hae kha laanpi cciakhaetu te mohnaw kya um hae paw kha awnaw muihsahtu nynh ka thua,
20 mingaee hae kha a thuiheitu, imua hae kha a ccangpahtu, Kawbya kya umpaw byaccing te nynaw a hoipaw nynh ka thua cite na zynku ze,
21 mingccang hae kha na ccangpah hae zah namaw te namaw so na ccangpakuh khyh tou? Ruh nan oh cite phung na ho zah namaw so na ruh tou?
22 Milae zu seikhae nan oh cite na ho zah namaw so milae zu na seikhae tou? Zohtuh kha luathua-ae-uipaw lang na ria zah namaw so zohtuh beikinn uccaw kha na luade tou?
23 Kawbya kya na pookuh zah kawbya ronaw liate Pachia kha the na thyaasah tou?
24 Pawccecize Ccathyaa kyaze, “Nanning keiccuze Pachia min tuh Zenta hae laku kya thethya ccousah athua,” cite azeikuh.Ref 2.24: Isa 52.5 (LXX)
25 Nang nynh Kawbya kha na zui ze, vingdungawkupaw tuh athane ccaccing; thuasalama nang tuh Kawbya kha na ro ze, na vingdungawkupaw tuh vingdungawku leipaw lang nynh phe a tang.
26 Tukeiccuze vingdungawkuh leipaw nynh Kawbya kya-e bya hae kha a zui lanze, a vingdungawku leinaw tuh vingdungawkunaw lang riapya thua lan khyh tou?
27 Pynsaw lante vingdung a awku khyh zemah Kawbya a zuipaw ccungccaw nynh Kawbya azeikuhpaw na hoi zah vingdung mang na awkuh pite kawbya na zui leipaw nang kha sei ae be cih.
28 Pawccecize atolang te kyalya Judah athuapaw tuh Judah ccungccaw ccaccing thua khyh; ngesaw kya atolang te kyalya vingdungawkunaw mah vingdungawkunaw ccaccing thua khyh.
29 Alungkhu langte Judah athuapaw nynh Judah ccungccaw ccaccing athua; ahmepaw vingdungawkunaw tuh thinlung te asekuhpaw nynh thua—tuh-e tuh zeipaw kawbya keiccu thua leite muisaw liate nynh thua. Tuhcihawpaw ccungccaw nynh a ccoupaw thehoynaw tuh ccungccaw hae kyate thua leite Pachia kyate nynh athua.Ref 2.29: Deu 30.6