13
Kawhoinaw kha Sawtua
Ccungccaw miakaw nynh uktu hae kaw kha ngae hae sah; pawccecize Pachia kyate laelan kawhoinaw um khyh, atu kawhoitu hae paw hynh mah Pachia liate khangpaw nynh thua hae. Tukeiccuze humhung zemah kawhoipaw a rawsepaw tuh Pachia nynh a khangpaw kha a rawsepaw nynh thua, tuhte a rawse hae paw tuh byapianaw a ing cih hae. Pawccecize uktu hae tuh ahoypaw ryalah hae paw nynh ri lanpaw thua khyh, thuasalama athahpaw ryalah hae paw nynh a ri lan hae paw nynh thua. Kawhoipaw kha ri leite na um ry tou? Ahoypaw rya kha lah lah, aning nynh nang kha ae thehoysah cih. Pawccecize aning tuh nang na hoynaw hanlan Pachia ryalahtu nynh thua. Thuasalama ahoy leipaw rya na law ze la rih, pawccecize aning tuh thaloi kha alakaw lan ccyng khyh! Aning tuh athahpaw rya a lahpaw tungvaw kya thinrianaw thuakhae zah detahtupaw Pachia ryalahtu nynh thua. Tukeiccuze Pachia thinrianaw keiccu kyalya kawngae lanpaw thua leite, ahmaw te ahmaw nykunaw thinlung keiccu mah kawngae lanpaw nynh thua. Hynh-e keiccuze nanning mah ngunto pya oh, pawccecize uktu hae tuh Pachia ryalahtu hae thua hae zah, tuh-e rya tuh hoyte a law hae.Ref 13.6-7: Mat 22.21; Mar 12.17; Luk 20.25 Tukeiccuze ccungccaw miakaw kha mue lan a ccan hae thyhte la pya oh—ngunto pya lan a ccanpaw kha ngunto pya oh; ngunto pya lan a ccanpaw kha ngunto pya oh, rawri lan a ccanpaw kha a rawrih oh; sawtua lan a ccanpaw kha sawtua oh.
Lu Kheit te Lu Kheit Sungsakunaw
Lu kheit te lu kheit sungsaku lanpaw laelan hum kya sanmah laebah um nan oh; pawccecize mingccangpaw a sungsahpaw ccungccaw tuh kawbya kha phe a ccingsah vae. Pawccecize, “Milae zu kya khyhze milae vawpaw kya na sei lan khyh, ccungccaw na theih lan khyh, na ruh lan khyh, milae uccaw na duaa lan khyh,” cikuhpaw kawbya hae te ccangpaw kawbya hae tuh, “Na innpaw kha namaw na sungsaku hawte la sungsah,” cikuhpaw kawbya kyakhe marya a ccakhungkuh hae.note13.9 Abang Ccathyaa kya, ‘ahme leipaw ccaekia na khan lan khyh’ cite a umbia.Ref 13.9: Exo 20.13-15, 17; Deu 5.17-19, 21; Lev 19.18 10 Sungsakunaw nynh tuh a innpaw kya ahoy leipaw rae boi khyh. Tukeiccuze sungsakunaw tuh kawbya ccingnaw nynh thua.
11 Tuhpiaze atu ccyh hynh paw ccyh mou athua cipaw na ny oh, nanning hanlan inaw kyate thaeku ccyh athua vae; pawccecize aening ah zyn takaw lya oh laeze atu lya hynh khumnaw tuh aening te anaekuh hua vae. 12 Khuazi tuh vyavya thang zah khuadae thua lan cih vae, tukeiccuze aening nynh mohnaw ryalaw hae kha vua ccavae oh sih lah, awnaw rhaw uccaw kha lawkuh ccavae oh sih. 13 Poituakunaw te zu-aenaw, ruinaw, ccouseikunaw, ohhuaku rynaw, ziaku buakunaw te eiungkunaw kyakhe um leite, ninthu ccyh kya um hae paw hawte kou ngaekuh lante hiin oh sih. 14 Bawipaw Jesu Khri kha boeining hawte lawkuh oh lah, pynsaw rynaw kha ccingsah lan paccynkuh nan oh.