6
Beikinn Thyaasahnaw
(1Si 8.12-21)
Solomon nynh, “Varyng zipingpaw mohnaw kya ka um cih cite Bawipaw nynh a ci. A sung-epaw inn, zungzae na umnaw lanpaw hmin kha kae sakpya vae,” a ci.
Te Israel zapi hae balyn tuh a thadyn lya hae khe, siapharan nynh a nulang maeleihkuh zah Israel zapi hae balyn kha hythua a pya hae. Solomon nynh, “Bawipaw , Israel Pachia tuh thehoyte um sah, pawccecize ka paaw David kyakhe a mung te byakinpakuh zah,Ref 6.4-9: 2Sa 7.1-13; 1Sh 17.1-12 ‘Ka ccungccaw Israel hae kha Izip ram kyate ka poukhae nin hae kyate tho zah, ka min a umnaw lanpaw inn kha sak nawlan, Israel phin hae kya-e pawpaw khua kha mah ka po khyh; ka ccungccaw Israel hae uktu lang humhung mah ka po khyh; thuasalama ka min a um nawlan Jerusalem khua kha ka po zah, ka ccungccaw Israel hae a uktu lang David kha ka po,’ cite a hopaw bya kha a kuih te a ccingsah vae. Bawipaw , Israel Pachia min hanlan inn sak lanpaw kha ka paaw David thinlung kya a la um. Thuasalama Bawipaw nynh ka paaw David kha, ‘Ka min hanlan inn sak lan na tuaku keiccuze ahoypaw kha na cyi vae; thuasalama nang nynh inn kha na sak lan khyh, na saahkuh cih paw na ccapaw nynh ka min hanlan inn kha a sak cih,’ a cipya. 10 Bawipaw nynh bya a kinkupaw kha a ccingsah vae; pawccecize ka paaw David hmin kya ka um vae; Bawipaw nynh bya a kinku thyhte, Israel bawitungkhung kya ka haung zah, Bawipaw , Israel Pachia min hanlan inn kha ka sak vae. 11 Israel ccungccaw hae ryte Bawipaw nynh a raepaw byakinnaw a umnahpaw thingkua kha tuh-e inn kya ka nung vae,” a ci.
Solomon Sawsangnaw
(1Si 8.22-53)
12 Solomon tuh Bawipaw silawhang malang, Israel zapi a pumkuh hae paw balyn muihnaw khe thadyn zah a kuih kha tharae a zo. 13 Solomon nynh asaepaw dong pangaw, akopaw dong pangaw, ahangpaw dong thum acihpaw ccaboi hangpaw ccangkheit kha rae zah voidu kya nung zah tuh-e vawlan khe a thadyn. Te Israel zapi hae balyn malang khe a ccukharutung zah vaawlang khe a kuih tharae a zothung. 14 Aning nynh, “Pou Bawipaw , Israel Pachia, vaaw te lae kya nang ae lopaw Pachia um khyh, mih thinlung balynte namaw malang a cceih hae paw na ryalahtu hae kya atynpaw na sungsahnaw te na byakinnaw kha na tynsah, 15 na ryalahtu ka paaw David kya na kinpyakupaw bya kha na tynsah. Thanccingte, na mung te bya na kinpakuh zah na kuih te atunin na ccingsah vae. 16 Tukeiccuze, pou Bawipaw , Israel Pachia, na ryalahtu ka paaw David kyaze, ‘Nang nynh ka malang na ccia hawte, na ccaaw hae nynh ka malang ccia lan mih laanpi kha a raeringku hae zetuh, Israel bawitungkhung kya ka malang a haung cih paw na ciihan tuh dae lan khyh,’ cite bya na kinpyakupaw kha beih tynsah tua.Ref 6.16: 1Si 2.4 17 Tukeiccuze, pou Israel Pachia, na ryalahtu David kya na kinpyakupaw bya kha beih tynsah tua.
18 “Thuasalama Pachia tuh laephi vawlan ccungccaw hae kya um ccaccing vema? Vaawram te ahang huaccepaw vaawram nynh heize nang kha ae ccawng khyh, kae nynh ka sakpaw hynh-e inn thathy tuh hosyn um vae khyh!Ref 6.18: 2Sh 2.6 19 Thuasalama, pou Bawipaw ka Pachia, na ryalahtupaw nynh saw ka sangpaw te kae ngiapaw hynh yn ngaepya tua, na ryalahtupaw nynh na kalan ka siapaw te saw ka sangpaw hynh yn thaepya tua; 20 na min nung nawlan bya na kinkunaw hmin, e inn kalan hin khuazi khuadae yn do lah, na ryalahtupaw nynh hynh-e hmin kalan hawite saw ka sangpaw hynh beih yn thaepya tua.Ref 6.20: Deu 12.11 21 Na ryalahtupaw te na ccungccaw Israel hae nynh hynh-e hmin kalan hawite saw kae sang vae ze, kae ngiapaw kha yn thaepya tua; na umnaw vaawram te yn thaepah lah, kae seinaw kha oun ngaethya.
22 “Lukhakheit nynh ccangpaw lu kheit tungvaw a sei keiccuze thyalawsaku thua zah, e inn kya na silawhang malang poute thya a lawku ze, 23 nang nynh vaawram te thae lah, rya yn lah lah, na ryalahtu hae hynh bya oun piatua, a seitupaw tuh a cyisahnaw kha amaw lu vawlan ccawsah lah, a dingpaw tuh a dingnaw thyhte thanenaw pya khylan thyaccousah tua.
24 “Na ccungccaw Israel hae nynh na tungvaw a sei hae keiccuze mih rhaw hae malang he a shung hae te, namaw kalan bua oun maekuh hae zah na min kha sawtuate, e inn kyahin namaw kalan sawsangte ae ngiaku hae ze, 25 vaawram te thaepah hae lah, na ccungccaw Israel hae seinaw kha ngaethya hae, te minmin te mih minpaaw hae na pya hae paw ram langkhe bua kikhae hae.
26 “Na tungvaw a sei hae keiccuze vaaw kha na khawsung zah khuaa kansah te de he na tah hae te, minmin nynh hynh-e hmin kalan hawite sawsang hae zah na min kha nawccawte mih seinaw kyate a maeleihku hae ze, 27 vaawram te la thae lah, na ryalahtu hae te na ccungccaw Israel hae seinaw kha ngaethya hae; a zui lan hae paw laanpi hoypaw kha ccangpah hae lah, na ccungccaw hae elang rho lang na pya hae paw na ram kya khuaarawsah tua.
28 “Ram lungkhu kya ccakan acci ze thuasah, shethya a thua ze thuasah, looh aphi poute ronaw, khivae keiccu looh ronaw, tungkhipaw te maccaloih keiccu looh ronaw thuasah, rhaw nynh mih khua khuakhakheit kha a koihku ze thuasah, shethya ccangkhakheit, ccinaw ccangkhakheit a um ze thuasah, 29 na ccungccaw Israel hae nynh mih balynte thuasah, humhung nynh mah lukhakheit te thuasah mih thinlung raveih kya a teing hae paw kha nykute, e inn kalan hin mih kuih a daw hae zetuh, 30 na umnaw vaawram te la thaepah hae, mih seinaw ngaethya hae lah bawmtua hae, a zui hae paw mih laanpi thyhte mih thinlung na ny hae paw balyn kha pyaru hae, pawccecize ccungccaw thinlung kha nang rou nynh na nyh. 31 Tuhteze nynh kae minpaaw hae na la pya hae paw ram kya a um lungkhu hae balyn nang kha ae rih cih hae zah na laanpi kha a zui cih hae.
32 “Tuhawte, na ccungccaw Israel athua leipaw ramccang hae nynh alesaepaw na min, athungpaw na kuih te na dyngpaw na kuih konglang kha a thae hae keiccuze laansawpi te yn cceih hae zah, e inn kalan hin saw a sang hae ze, 33 na umnaw vaawram te thaepya tua hae; na ccungccaw Israel hae hawte, laephi ccungccaw balyn nynh na min ae ny nawlan hae te na raw ae ri nawlan hae thuasah, ka sakpaw hynh-e inn kyahin na min kha ko athua cipaw a ny nawlan hae thuasah ramccangpaw nynh ae ngiapaw miakaw kha cyipya tua hae.
34 “Na ccungccaw hae nynh mih rhaw hae kha tuk khylan a ccia vae hae ze, pawpaw laanpi kya na zuisah hae zemah, na popaw e khua kalan te na min hanlan ka sakpaw inn kalan hawite na kalan saw a sang hae ze, 35 mih sawsangnaw te mih ngiakunaw kha vaawram te thaepah hae lah, mih ryalaw kya pankhae hae.
36 “A sei leipaw lu kheit san a um khyh keiccuze—minmin nynh na tungvaw sei hae zah minmin elang na thinria keiccuze rhaw hae kuih kalan na pya hae zah, minmin kha asawnaw khyhze anaenaw umpaw mih rhaw hae ram lang kyngte cciakhae athua hae ze thuasah, 37 a cciakhaenaw hae ram kyakhe minmin nynh mih thinlung kya oun nyhthui hae zah ngaesikute a kyngtu hae ram kyakhe nang kha, ‘Kae sei vae, kae cyisei vae, ahoy leipaw rya kae lawsei vae,’ cite ae ngiaku hae ze thuasah, 38 kyngte a cciakhaetu hae mih rhaw hae ram kyakhe mih thinlung te mih tuanaw balyn te ngaesikuh hae zah, mih minpaaw hae na pya hae paw mih ram, na popaw khua te na min hanlan ka sakpaw inn kalan hawite na kalan saw oun sang hae ze thuasah, 39 na umnaw vaawram kyate mih sawsangnaw te mih ngiakunaw kha thaepah hae, mih ryalaw kya pankhae hae lah, na tungvaw a sei hae paw na ccungccaw hae kha ngaethya hae. 40 Pou ka Pachia, e hmin kyate atu saw ka sangpaw hynh beih muih lah, beih thaetua.
41 “Pou Bawipaw , thokuh lah,
na huhan a umnahpaw
byakin thingkua rykhate
na umnaw hmin lang cciatua.
Pou Bawipaw Pachia,
na ranpibawi hae nynh
khumnaw boeining kha
lawkuh hae sah lah,
alungzipaw na ccungccaw hae tuh
na hoynaw kyakhe
mih lungtua sah.Ref 6.41-42: Sam 132.8-10
42 Pou Bawipaw Pachia,
chitui thuh athuapaw
na ccungccapaw kha vua nan.
Na ryalahtu David elang
atynpaw na sungsahnaw kha
liathuitua,” a ci.