32
Sennakherib nynh A Tuk hae
(2Si 18.13-37; 19.14-19, 35-37; Isa 36.1-22; 37.8-38)
1 E hae balyn hynh Hezekiah nynh lungzinaw te rya a lah koute Assiria siapharan Sennakherib nynh Judah ram kha tuk lan a ccianua, akoihkuhpaw khua hae kha ryahmin tahnuakuh hae zah ka tae cih hae cite a tuaku.
2 Sennakherib tuh yn cceih zah Jerusalem kha tuk lan a paccynku cipaw Hezekiah nynh he a muih tuh,
3 khua atolang umpaw tuidy hae aluapaw kha pheih lan cite a kuihkaw e bawi hae te rhawkaw hae ryte a paccyn hae; minmin nynh amaw kha a bawm hae.
4 Ccungccaw patae kha pum hae zah ram lungkhu po aluapaw tuidy hae te vaw taraw hae kha pheih hae zah, “Pawccemou Assiria siapharan hae nynh oun cceih cih hae zah tui patae kha a muihkuh cih hae?” a ci hae.
5 Hezekiah nynh ryalaw lan tynkaring lan tuakuh zah khualungrua atingpaw balyn kha raethui zah a vawlan khe rhawvianaw innhangpaw hae kha a sak, atolang khe ccangpaw khualungrua kha a rae; David khua khe Millo kha sihkakin lan a rae, te zunghe hae te khawriaphua hae kha patae a rae.
6 Ccungccaw hae kyakhe rhawtuknaw te asekuhpaw rhawbawi hae kha khang hae zah, khua koikua kya umpaw laanluepi kyakhe amaw kalan a pum hae. Te thawzung pyanaw bya hopah hae zah,
7 “Nae thawsaesakuh oh lah, nae rawthungsakuh oh. Assiria siapharan te a kya umpaw zapi hae balyn kha rih nan oh, nae bungzou nan sah; pawccecize aning kalan a pankhaepaw laeze aening kalan oun pankhaepaw tuh a thawsaehua.
8 Aning kya a umpaw tuh ccungccaw thungnaw nynh thua; thuasalama aening kya tuh aening bawm khylan te rhaw tukpya khylan Bawipaw ah Pachia a um,” a cipya hae. Judah siapharan Hezekiah bya liate ccungccaw hae tuh thawzung a mue hae.
9 E koute, Assiria siapharan Sennakherib te a rhawkaw hae balyn tuh Lakhish khua kya a um lya hae khe, Jerusalem kya umpaw Judah siapharan Hezekiah te Judah hae balyn kalan khe aning nynh a ryalahtu hae kha saw hae zah,
10 “Assiria siapharan Sennakherib nynh hynhte a ho: Jerusalem khua lungkhu kya koihluku khylan nanning nynh pawmou na doliaku oh?
11 Hezekiah nynh, ‘Bawipaw kae Pachia nynh Assiria siapharan kuih kyate oun khum cih,’ cite ae hopah oh zah, nanning kha ccakannaw, tui kanmawnaw te chinaw kalan pyate ae cciakhaesei khyh oh tou?
12 Ahangpaw a hmin hae te a silawhang hae kha vua hae zah, Judah te Jerusalem kha, ‘Silawhang ccangkheit malang khe na beik cih oh zah, tuh-e vawlan khe nae kya-e mynkhuhpaw kha na u cih oh,’ cite kaw ae pya oh zah ae hopah oh paw tuh khah-e Hezekiah maw kha thua khyh tou?
13 Kae te ka minpaaw hae nynh ccangpaw ram hae kya-e ccungccaw hae balyn kha pawtemou kae cyi hae cipaw na nyh khyh oh tou? Ccangpaw ram hae kya um hae paw minphuin hae kya-e pachia hae nynh mih ram kha ka kuih kyate a khum kho hae tou?
14 Ka minpaaw hae nynh marya a ro hae paw ram hae kya-e pachia hae balyn kyaze a ccungccaw hae kha ka kuih kyate a khum kho hae paw pachia a um tou? Nae Pachia nynh nanning kha ka kuih kyate pawtemou ae khum kho cih oh?
15 Tukeiccuze Hezekiah kha lingsakuh nan oh lah, tuhcite cciakhae seisakuh nan oh, aning kha zyn nan oh, pawccecize pawpaw minphuin pachia thuasah, pawpaw ram pachia thuasah a ccungccaw hae kha ka minpaaw hae kuih kyate thuasah, kamaw kuih kyate thuasah khum kho khyh hae. Nanning Pachia thathy nynh tuh pawtemou ka kuih kyate ae khum kho cih oh!” cite bya a taw hae.
16 A ryalahtu hae nynh Bawipaw PACHIA te a ryalahtu Hezekiah kha rawsete bya houh a ho hae.
17 Aning nynh Bawipaw , Israel Pachia tungvaw rawsenaw byahote theihryanaw ccaw kha mah zei zah, “Ccangpaw ram hae kya um hae paw minphuin hae kya-e pachia hae nynh mih ccungccaw hae kha ka kuih kyate a luesah khyh hae hawte, Hezekiah Pachia nynh a ccungccaw hae kha ka kuih kyate luesah lan khyh hae,” a ci.
18 Khualungrua vawlan um hae paw Jerusalem khua e ccungccaw hae kha hurawte mih thinphangsah te khua kha law khylan, Judah bya te tuh-e tuh myarya ccae lan a siakhae hae.
19 Laephi vawlan e ccangpaw minphuin hae kya-e, ccungccaw kuih te raepaw pachia hae hawkhate Jerusalem Pachia kong kha a ho hae.
Sennakherib Shungnaw te Chinaw
20 E kong keiccuze Hezekiah Siapharan te Amoz ccapaw profeh Isaiah tuh sawsang hae zah vaawlang khe a sia hae.
21 Te Bawipaw nynh vaawpaw lu kheit kha saw zah, tuh-e paw nynh Assiria siapharan ryahmin kya um hae paw athungpaw rhawkaw hae, rhawbawi hae te bawi hae balyn kha a chia hae. Tukeiccuze maethyate amaw ram lang a ki. A pachia inn lungkhu lang he a tee tuh, amaw a ccapaw hae abang nynh amaw kha thaloi te a chia hae.
22 Tuhcite Bawipaw nynh Hezekiah te Jerusalem khuaccaaw hae kha Assiria siapharan Sennakherib kuih kyate thuasah, a rhawkaw hae balyn kuih kyate thuasah khum hae zah, pawpaw kya balyn daenaw a pya hae.
23 Ccungccaw patae nynh Jerusalem khua langkhe Bawipaw hanlan lasung ccyngpah hae zah Judah siapharan Hezekiah hanlan aphutepaw uccaw hae kha a ccyngpya hae, tuin ccyh kyate tho zah Hezekiah tuh minphuin hae balyn malang khe hangthung athua.
Hezekiah Ccinaw
(2Si 20.1-3, 12-19; Isa 38.1-3; 39.1-8)
24 Tuh lyatuin Hezekiah tuh ccih zah vyavya a chih. Aning nynh Bawipaw kalan sawsang zah, Bawipaw nynh aphi pya zah syntawnaw a pya.
25 Thuasalama Hezekiah tuh a thinlung kya a lysaku keiccuze a tungvaw thanenaw a raepya thyhte a lungtuanaw langsakuh khyh. Tukeiccuze amaw tungvaw te Judah te Jerusalem tungvaw kya thinrianaw accah.
26 Thuasalama Hezekiah nynh a thinlung kya a lysakupaw konglang te, amaw te Jerusalem khuaccaaw hae nynh zakaw a sangsaku hae keiccuze Bawipaw thinrianaw tuh minmin tungvaw kya Hezekiah she lungkhu ccah khyh.
Hezekiah Hoirumnaw te Phu-enaw
(2Si 20.12-19; Isa 39.1-8)
27 Hezekiah tuh myarya hoirum zah phu-enaw a ccou; sui, ngun, aphutepaw lung hae, mynkhuhpaw hae, khawriaphua hae te amee rupaw sisua phuinccing nung nawlan sisuakhaan hae kha a raeku;
28 looh, misutui te chitui nung nawlan ccung-inn hae kha a sak; sahiin phuinccing nung nawlan sahiinkhia hae te tuukhia hae kha a sak.
29 Tuhawte amaw hanlan khua hae kha raekuh zah tuuphu hae te vaetua phu hae kha patae a hoi; pawccecize Pachia nynh hoirumnaw patae a pya.
30 Hezekiah amaw ccaccei nynh Gihon tui tuh palung lang apounaw kha ping zah David khua niccaw langkhe a luasah bung. Hezekiah tuh a ryalaw miakaw kya a laan a sui a ua.
31 Tukeiccuze ram lungkhu kya cyihkuh zah ngaeangthua lan umpaw uccaw kong kha byakhiatua khylan Babilon bawi hae nynh locceihtu hae oun saw hae paw kong kya mah, Hezekiah kha syntawtua khylan te a thinlung kya umpaw balyn kha ny khylan Pachia nynh Hezekiah kha a sawbia.
(2Si 20.20-21)
32 Tuhlaepaw Hezekiah nynh a cyipaw te hoynaw a raepaw kha tuh Judah te Israel Siapharan hae Ccauh lungkhu, Amoz ccapaw profeh Isaiah nynh a muihpaw vizin kyakhe a zei hae.
33 Hezekiah tuh a minpaaw hae ryte ih hae zah, David ciihan hae shawku palung langkhe a uu hae; he a chih tuh, Judah hae te Jerusalem khuaccaaw hae balyn nynh sawtuanaw a pya hae. A ccapaw Manasseh nynh amaw ccelang siapharan lang a tang.