29
Beikinn Sak nawlan Ahlu hae
David siapharan nynh ccungccaw zapi hae kha, “Pachia nynh a popaw ka ccapaw Solomon tuh a kum no ung zah a nynaw azya ung, ryalaw tuh myaryamaw ale; pawccecize beikinn tuh ccungccaw hanlan thua khyh, Bawipaw Pachia hanlan nynh thua.Ref 29.1-2: 1Sh 22.5 Tukeiccuze ka Pachia inn hanlan ka cyi kho thyhte ka cyi vae, sui uccaw hae rae nawlan sui, ngun uccaw hae rae nawlan ngun, sohin uccaw hae rae nawlan sohin, sivaw uccaw hae rae nawlan sivaw, thing uccaw hae rae nawlan thing, tuhpiaze ccaan nawlan oniks lung patae te lung patae, antimoni lung, azong aphuinphuin umpaw lung hae, aphutepaw lung aphuinphuin te marbal lung kha patae ka paccyn vae. Tuhpiaze e hae balyn koute, inn thyaapaw hanlan ka paccyn, ka Pachia inn kha myarya aphu ka tesah keiccuze kamaw ka kya-e sui te ngun kha ka Pachia inn hanlan ka pya: inn kya-e pang hae thei nawlan sui talent thong thum, Ofir sui, ngun ccipaw talent thong sari, kuihhae hoy hae paw nynh a cyi lan hae paw rya miakaw elang sui uccaw hanlan sui, ngun uccaw hanlan ngun kha ka pya hae. Tukeiccuze atunin kya mawtemaw thyaasakute Bawipaw kalan hummou lungthote a hlu cih?” a cipya hae.
Puizia raveih kya-e cciakhaetu hae nynh lungthote ahlu a pya hae, phin hae kya-e cciakhaetu hae, ccungccaw athong te aza uktu rhawbawi hae te siapharan rya uktu bawi hae nynh mah tuhcite a hlubua hae. Minmin nynh Pachia inn elang ryalaw nawlan sui talent thong pangaw, dariknote29.7 darik - Persia phua nynh thua. thong haw, ngun talent thong haw, sohin talent thong haw lae tarya, sivaw talent cciing kheit a pya hae. Aphutepaw lung a hoipaw miakaw nynh mih lung kha Bawipaw inn sisuakhaan kalan, Gershon ciihan Jehiel nynh a do-oihpaw khaan lungkhu khe a pya hae. Te ccungccaw hae tuh lunglokute mimaw lungthote Bawipaw kalan a pya hae keiccuze mih lungtua; David Siapharan mah myarya a lungtua.
David nynh Pachia Thehoysahnaw
10 Tetuh David nynh ccungccaw zapi hae balyn malang khe Bawipaw kha the a hoysah; David nynh: “Pou Bawipaw , kae minpaaw hae Pachia, nang tuh zungzae te zungzae cia ae thehoysah vae hae sah. 11 Pou Bawipaw , lesaenaw, huhan, phu-enaw, taenaw te sawtuanaw tuh namaw kya-e nynh thua; pawccecize vaaw te lae kya a umpaw balyn tuh namaw kya-e nynh thua; pou Bawipaw , peenaw tuh namaw kya-e thua zah nang tuh atyn-are luki umpaw lu lang hangthung na thua.Ref 29.11: Mat 6.13 12 Hoirumnaw te sawtuanaw tuh namaw kyate yn thua zah, nang nynh atyn-are na uk. Na kuih kya thungnaw te thawsaenaw a um; ccungccaw balyn kha lesaesahnaw kaw te thawzung pyanaw kaw tuh na kuih kya nynh a um. 13 Tukeiccuze kae Pachia, nang kha kae luung zah asung-epaw na min kha kae thehoysah.
14 “Thuasalama kaening nynh lungthote hynhzeih kae hlu kho nawlan, kae te ka ccungccaw hae tuh hum hae mou kae thua? Pawccecize atyn-are tuh namaw kyate yn thua zah, na uccaw toulou kha namaw kae pya. 15 Kaening tuh kae minpaaw hae balyn hawte, namaw malang khuaccong hae paw mikhia hae nynh kae thua; lae vawlan kae ccyh tuh mynlyh hawte thua zah ngaehoinaw um khyh. 16 Pou Bawipaw , kae Pachia, na min thyaapaw hanlan inn sakpya nawlan kaening nynh kae paccynpaw hynh-e uccaw balyn tuh na kuih kyate yn thuapaw thua zah namaw kya-e cci nynh thua. 17 Ka Pachia, nang tuh thinlung kha na syntawtua zah dingnaw kyakhe na lungrythua; ka thinlung dingnaw khate hynh-e uccaw balyn hynh lungthote kae pya, atu hein kya umpaw na ccungccaw hae nynh lungthote lungpawte ae pya hae paw kha ka muih vae. 18 Pou Bawipaw , kae minpaaw hae Abraham, Isak te Israel Pachia, hynhcihawpaw eenaw te tuanaw hynh na ccungccaw hae thinlung kya tyty nung lah, mih thinlung kha namaw kalan cciakhae hae. 19 Ka ccapaw Solomon nynh na kawbya hae, na phunglang hae te na phungbya hae kha lungkheit te zuite marya cyih zah, ka paccyn vae paw beikinn hynh a sak kho nawlan amaw kha beih bawmtua,” a ci.
20 Tukoute David nynh ccungccaw zapi balyn kha, “Bawipaw nae Pachia kha thehoysah oh,” a cipya hae. Te ccungccaw zapi balyn nynh Bawipaw , mih minpaaw hae Pachia kha thehoysah hae zah Bawipaw te siapharan malang khe bakhungte sawtuanaw a pya hae. 21 Awkhualan khe Bawipaw kalan silawnaw rae hae zah, tangnuapaw thong kheit, tuutepaw thong kheit, tuutaw thong kheit khate maee-ute silawnaw kha raete, niapaw silawnaw ryte Israel hae balyn hanlan silawnaw patae a rae hae; 22 tuin nin khe myarya lepaw lungpawnaw te Bawipaw malang khe ae hae zah a neih hae.
Siapharan lang Solomon Chitui Thuhnaw
David ccapaw Solomon kha siapharan lang vae ningnaw a khang hae; amaw kha Bawipaw kuihkaw e bawi lang chitui thuh hae zah, Zadok kha ranpibawi lang chitui a thuh hae. 23 Tetuh Solomon tuh a paaw David ccelang siapharan lang tang zah, Bawipaw kya-e bawitungkhung vawlan khe a haung; aning tuh a laan a sui ua zah Israel hae balyn nynh a bya a ngae hae.Ref 29.23: 1Si 2.12 24 Cciakhaetu hae balyn te athungpaw rhawkaw hae, te David Siapharan ccapaw hae nynh mah Solomon Siapharan a uknaw zakaw um lan bya a kinku hae. 25 Bawipaw nynh Israel hae balyn muihnaw khe Solomon kha myarya hang lang hangthung zah, langmawlya e Israel siapharan humhung sanmah a la pya boi lei hae paw siapharan huhan kha a pya.
David Uknaw Adynnawte
26 Jesse ccapaw David nynh Israel ram pynpi kha a uk. 27 Israel ram kha kum sung pali a uk; Hebron khua kya kum sari uk zah, Jerusalem khua kya sung thum kum thum a uk.Ref 29.27: 2Sa 5.4-5; 1Sh 3.4 28 David tuh myarya tawthya zah accyh azaw te, hoirumnaw te sawtuanaw ccoute a chih; te amaw ccelang a ccapaw Solomon nynh siapharan lang a tang. 29 David Siapharan nynh a cyipaw kha atakaw te athangnaw cia profeh Samuel Ccauh, profeh Nathan ccauh te profeh Gad ccauh kya a zei hae, 30 a uknaw kong balyn, a thungnaw te amaw tungvaw, Israel tungvaw te laephi vaw e peenaw balyn tungvaw kya acyihkuhpaw konglang balyn kha mah a zei hae.