17
David tungvaw Pachia Byakinnaw
(2Sa 7.1-17)
David nynh a inn kya a um lyakhe David nynh profeh Nathan kha, “Dotua, kae tuh sidar thing inn kya ka um, thuasalama Pachia thingkua tuh boeibu kya nynh a um,” a cipya. Nathan nynh David kha, “Na thinlung kya a umpaw balyn kha cyih ccaleih, pawccecize Pachia tuh na kya a um,” a cipya.
Thuasalama tuin khuazi khe Bawipaw bya tuh Nathan kalan yn thua zah: La cceih lah, ka ryalahtu David kha la hopah: Bawipaw nynh hynhte a ho: Ka um nawlan inn yn sakpah nan. Pawccecize Israel hae kha ka poukhae hae nin kyate atunin cia inn lungkhu ka um khyh, thuasalama boeibu te beikbu lungkhu nynh ka um. Israel hae balyn ryte kae khiakunaw takyh kya ka ccungccaw hae kha do-oih khylan kaw ka pyapaw Israel byapiatu lukhakheit kha, “Pawccemou sidar thing inn nae sakpya khyh?” cite ka hopah boi tou? Tukeiccuze ka ryalahtu David kha hynhte na hopah cih: Vaaw Bawipaw nynh hynhte a ho: Nang tuh ka ccungccaw Israel hae kya uktu lang tang khylan tuurinnaw hmin kyate, tuu hae na zuinaw kyakhate kae ko; na ccianaw takyh kya na kya ka um zah, na rhaw hae balyn kha na malang te ka vua hae; laephi vawlan e alesaepaw ccungccaw hae min hawte alesaepaw min kha kae raepah cih. Ka ccungccaw Israel hae elang hmin ccangkheit ka raepah cih hae zah, mimaw hmin kya a um nawlan hae te kaccohkale nung athua khyh nawlan hae ka tynsah cih hae; 10 langmawlya ka ccungccaw Israel hae kya byapiatu hae ka nungpya lya hae hawte ccungccaw hoylei hae paw nynh vawsawnaw pya vae lan khyh hae; na rhaw hae balyn kyate nang kha haeungnaw kae pya cih.
Tuhpiaze Bawipaw nynh nang kha inn innkheit ae sakpah cih cite nang kha kae thaesah. 11 Na ccyh zaw vae zah, na minpaaw hae ryte he na ihkheih oh te, na pyn kyate a pou cih paw na ciihan tuh namaw koute ka hangthung cih zah a peenaw kha ka tynsah cih. 12 Aning nynh ka min hanlan inn a sak cih zah a peenaw kha ka tynsah cih. 13 Kae tuh a paaw ka thua cih zah aning tuh ka ccapaw athua cih. Nang na mawze a la umpaw ccungccapaw kyate atynpaw ka sungsahnaw kha ka law hawte amaw kyate ka lah lan khyh,Ref 17.13: 2Ko 6.18; Heb 1.5 14 aning kha ka inn te ka peenaw kya zungzae ka tynsah cih zah, a bawitungkhung tuh zungzae atyn cih, a ci cite a hopya. 15 E bya hae balyn te hynh-e vizin hae balyn thyhte Nathan nynh David kha a hopya.
David Sawsangnaw
(2Sa 7.18-29)
16 Tetuh David siapharan nynh alungkhu lang tee zah Bawipaw malang haung zah, “Pou Bawipaw PACHIA, kae tuh ahum ka thua zah, ka innbyn tuh pawcihawpaw innbyn athua keiccu mou hynhcih ciate nae hangthung? 17 Thuasalama pou Pachia, e hynh tuh nang na muihnaw kya uccaw dihpaw nynh thua; na ryalahtu ciihan kong hynh mah malang ccyh hynhsepi hanlan cia na hoty vae. Pou Bawipaw Pachia, kae hynh alesaepaw lu kheit hawte nae tua vae! 18 Na ryalahtupaw kae, David nynh sawtuanaw ccou khylan na kalan pawmou ka ho kho ung cih? Na ryalahtupaw hynh phe na ny! 19 Pou Bawipaw , na ryalahtupaw hanlan te namaw na thinlung kya a um thyhte, e alesaepaw uccaw hae balyn hynh nysahte e alesaepaw rya balyn hynh na law vae. 20 Pou Bawipaw , kae nakaring te kae thaepaw balyn thyhte nang ae lopaw lu kheit san um khyh zah namaw laelan ccangpaw Pachia um khyh. 21 Izip ram kyate na shawkhaw hae paw na ccungccaw hae malang te minphuin hae na dee hae zah alesaepaw te ngaeang lan umpaw uccaw hae kha namaw min hanlan raekute, a ccungccaw hae lang tang khylan te shawkhaw khylan Pachia nynh a ccianua hae paw na ccungccaw Israel hae te alokuhpaw minphuin phuin kheit san laephi vawlan a um tou? 22 Na ccungccaw Israel hae kha na ccungccaw lang zungzae tang khylan namaw hanlan na rae hae; pou Bawipaw , nang tuh mih Pachia lang na tang.
23 “Atu pou Bawipaw , na ryalahtupaw konglang te a innbyn konglang na ho vae paw bya tuh zungzae tyn sah lah, bya na kinku vae hawte beih cyitua. 24 ‘Vaaw Bawipaw , Israel Pachia tuh Israel a Pachia nynh thua,’ cite na min tuh zungzae tynsah te hangthung athua cih; na ryalahtu David ciihan tuh namaw malang tynsah athua cih. 25 Pawccecize ka Pachia, nang nynh na ryalahtupaw hanlan ciihan na raepya lanpaw kha na phypya vae; tukeiccuze na ryalahtupaw nynh namaw malang sawsang kho athua cipaw ka ny vae. 26 Pou Bawipaw , nang tuh Pachia na thua zah, e uccaw hoypaw hynh na ryalahtu kya bya na kinpyaku vae; 27 tukeiccuze atu tuh na ryalahtupaw ciihan hynh namaw malang zungzae atyn nawlan hythua beih pya rytua. Pawccecize pou Bawipaw , nang nynh hythua na pya vae zah zungzae hythuapya athua,” a ci.