15
Jerusalem lang Thingkua Cciakhaenaw
David nynh amaw elang David khua khe inn hae kha a sakku, te Pachia thingkua elang hmin ccangkheit paccyn zah bu bukheit a thadynsah. David nynh, “Levi phin hae laelan humhung nynh mah Pachia thingkua kha puih lan khyh, pawccecize Bawipaw nynh minmin kha Bawipaw thingkua puih lan te amaw rya zungzae lawpya lan a po vae hae,” a ci.Ref 15.2: Deu 10.8 Bawipaw thingkua elang a paccynpyapaw hmin langkhe cciakhae khylan David nynh Israel hae balyn kha Jerusalem kya a pum hae. David nynh Aaron ciihan hae te Levi phin hae kha a pum hae: Kohath ciihan hae kya-e lupi Uriel te a puizia hae za kheit lu kuin; Merari ciihan hae kya-e lupi Asaiah te a puizia hae za ning lu kuin; Gershom ciihan hae kya-e lupi Joel te a puizia hae za kheit sung thum; Elizafan ciihan hae kya-e lupi Shemaiah te a puizia hae za ning; Hebron ciihan hae kya-e lupi Eliel te a puizia hae sung tarya; 10 Uzziel ciihan hae kya-e lupi Amminadab te a puizia hae za kheit lu haw lae ning.
11 David nynh ranpibawi Zadok, Abiathar te Levi phin hae Uriel, Asaiah, Joel, Shemaiah, Eliel te Amminadab kha a ko hae. 12 Aning nynh minmin kha, “Nanning tuh Levi phin lungkhu e puizia hae kya-e lu hae nynh na thua oh; nanning nynh Bawipaw , Israel Pachia thingkua kha ka paccynnaw hmin lang na cciakhae ccaw oh, naemaw te nae puizia hae kha thyaasakuh oh. 13 Masaty lyaze nanning nynh na puih khyh oh keiccuze Bawipaw ah Pachia tuh aening tungvaw a thinria; pawccecize aening nynh thingkua kha do-oih lan accan thyhte ah do-oih khyh oh,” a cipya hae. 14 Tukeiccuze Bawipaw , Israel Pachia thingkua kha cciakhae khylan ranpibawi hae te Levi phin hae nynh a thyaasaku hae. 15 Bawipaw bya thyhte Moses nynh kaw a pya hae hawte, Levi phin hae nynh Pachia thingkua kha puihnawpaw ccong khate mih raw te a puih hae.Ref 15.15: Exo 25.14
16 David nynh Levi phin kya-e lupi hae kha, nanning nynh lungpawnaw roi thawte saw khylan khuakupaw uccaw hae tintang, tintang dihpaw te lanchi hae a khua cih hae paw nae uno hae kha hlawsahtu lang na khang cih oh, cite kaw a pya hae. 17 Tukeiccuze Levi phin hae nynh Joel ccapaw Heman, a unopaw Berekhiah ccapaw Asaf te mih uno Merari ciihan hae kya-e Kushaiah ccapaw Ethan; 18 tuh-e hae ryte mih unopaw ccangningnaw bawi athua hae paw Zekhariah, Jaaziel, Shemiramoth, Jehiel, Unni, Eliab, Maaseiah, Mattithiah, Elifelehu te Mikneiah, te thuakaw ngawtu hae Obed-edom te Jeiel. 19 Hlawsahtu hae Herman, Asaf te Ethan tuh sohin lanchi kha a khua cih hae; 20 Zekhariah, Aziel, Shemiramoth, Jehiel, Unni, Eliab, Maaseiah te Benaiah tuh Alamoth roi thyhte tintang a khua cih hae; 21 thuasalama Mattithiah, Elifelehu, Mikneiah, Obed-edom, Jeiel te Azaziah tuh Sheminith roi thyhte tintang dihpaw te hlawsakhaetu athua cih hae. 22 Levi phin hae kya-e hlaw cciakhaetu Khenaniah tuh hlaw a thya keiccuze hlaw cciakhaetu athua cih. 23 Berekhiah te Elkanah tuh thingkua elang thuakaw ngawtu hae athua cih. 24 Ranpibawi hae Shebaniah, Joshafat, Nethanel, Amasai, Zekhariah, Benaiah te Eliezer nynh Pachia thingkua malang khe mungkae a tu cih hae. Obed-edom te Jehiah mah thingkua elang thuakaw ngawtu hae athua cih.
25 Tukeiccuze David te Israel piccan hae, ccungccaw athong uktu hae tuh Bawipaw byakin thingkua kha Obed-edom inn kyate lungpawte law khylan a cceih hae. 26 Bawipaw thingkua a puihtu hae Levi phin hae kha Pachia nynh a bawm hae keiccuze minmin nynh tangnuapaw sa sari te tuutepaw sa sari khate silawnaw a rae hae. 27 David tuh nebaleihpaw laaw te kuakupaw angkiccua kha a kiku, thingkua a puihtu Levi phin hae balyn, hlawsahtu hae te hlawsahtu hae kya-e hlaw cciakhaetu Khenaniah mah tuhcite a kikuh bua hae; te David tuh laaw te kuakuhpaw ranpibawi angki kha a kikuh. 28 Tuhcite Israel hae balyn nynh sia biate, saki, mungkae, lanchi, tintang te tintang dihpaw kha khuakute myarya ccae lan hlawsah biate Bawipaw byakin thingkua kha a cciakhae hae.
29 Bawipaw byakin thingkua tuh David khua he a tee lyakhe Saul ccanung Mikhal nynh thanlan-aw kyate do zah, David Siapharan nynh thohkute a lawpaw kha muih zah a thinlung kyate a theihrya.