SAM 99
Athyaapaw Pachia Thehoysah Oh
1 Bawipaw tuh siapharan nynh thua,
ccungccaw hae tuh thyngkuh hae sah!
Aning tuh cherubim vawlan
bawitungkhung kyakhe a haung;
laephi tuh hy sah!Ref 99.1: Exo 25.22
2 Bawipaw tuh Zion kya a lesae;
ccungccaw hae balyn laeze
hangthung athua.
3 Minmin nynh na lesaenaw te
ri lan umpaw na min kha
ae thehoysah hae sah.
Na min tuh athyaapaw nynh thua!
4 Athungpaw Siapharan, nang tuh
byading a rypaw na thua zah,
ahmepaw kha na tynsah vae;
byading te dingnaw kha
Jakob ciihan kya na rae vae.
5 Bawipaw ah Pachia kha
thehoysah oh;
a ccu khangnawpaw kaw khe
bakhungte beik oh.
Aning tuh athyaapaw nynh thua!
6 Moses te Aaron tuh
a ranpibawi hae nynh thua hae,
Samuel mah amaw min a kopaw nynh thua.
Minmin nynh Bawipaw kalan
sia hae zah, aning nynh a leih hae.
7 Maeking tung kyate minmin kha
a hopya hae;
aning nynh a pya hae paw
a phunglang te a phungbya kha
minmin nynh a zui hae.
8 Pou Bawipaw kae Pachia,
nang nynh minmin kha na leih hae;
nang tuh minmin hanlan
seingaethyanaw Pachia nynh na thua,
thuasalama mih cyiseinaw hanlan
liarutu nynh na thua.
9 Bawipaw ah Pachia kha
thehoysah oh lah,
a mua thyaapaw kyakhe beik oh;
pawccecize Bawipaw ah Pachia tuh
athyaapaw nynh thua.