SAM 98
Laephi Byapiatu Thehoysah Oh
Bawipaw kalan hlaw thawpaw kha sah oh,
pawccecize ngaeangthua lan umpaw
uccaw hae kha a rae vae.
A ranglang kuih te athyaapaw a kuih nynh
rhaw kha a taesah vae.
Bawipaw nynh rhaw a taenaw kha
a nysah hae; a dingnaw kha
minphuin hae mitmuihnaw kya
a langsaku vae.
Israel hae kya atynpaw a sungsahnaw te
a lungzinaw kha a liathui vae.
Ah Pachia nynh rhaw a taepaw kha
laephi pynpi balyn nynh a muih vae hae.
Laephi ccungccaw hae balyn, Bawipaw kalan
lungtuate siatua oh;
lungtuanaw hlaw khate siatua oh lah,
thehoysahnaw hlawsah oh.
Bawipaw kalan tintang te,
roi hoypaw khate
thehoysahnaw hlawsah oh.
Mungkae te saki kha tu biate
Siapharan athuapaw
Bawipaw malang khe lungtuate sia oh.
Rili te a lungkhu umpaw balyn nynh
sia hae sah;
laephi te laephipi kya
um hae paw balyn nynh sia hae sah.
Vawpi hae balyn nynh mih kuihbia hae sah;
mua hae balyn nynh
Bawipaw malang khe
lungtuate pynkheihlan hlawsah hae sah,
pawccecize aning tuh laephi kha
byapia khylan yn thua.
Aning nynh laephipi kha dingnaw te
bya a pia cih zah,
ccungccaw hae kha ahmete
bya a pia cih hae.