SAM 88
Bawmnaw Mue khylan Sawsangnawnote88 Abyalu: Korah phin hae hlaw.
1 Pou Bawipaw , yn khumtu Pachia,
khuazi khuadae na malang ka sia,
2 ka sawsangnaw tuh na kya
thua vae sah;
na nakaring kha ka siaruanaw kalan
yn tuaku tua.
3 Pawccecize ka muisaw tuh
vawsawnaw te phe beih zah,
ka hiinnaw tuh Michi khua lang
anaekuh vae.
4 Kae tuh Hunghua lungkhu lang
a ccah hae paw kya riabia ka thua vae;
kae tuh bawmnaw
a hoi leipaw hawte thuasah,
5 michi rhua hae laku kya
a vua hae paw hawte thuasah,
theih hae zah shawku kya
ahuekuhpaw hawte thuasah
ka thua zah,
na liathui vae lei hae paw hawte nynh
ka thua vae,
pawccecize minmin tuh na kuih kyate
vua athua hae.
6 Kae kha Hunghua akhunaw,
amohpaw te akhupaw hmin kya
nae nung vae.
7 Na thin-unaw nynh ka tungvaw
rikalae lan yn ne zah,
na tuileih balyn te nae vusah vae.
8 Kae ccawkuh hae paw kha
nae sibiasah vae hae;
minmin nynh a ri hae paw lang
nae rae vae.
Ka pou kho lei lan nae khawsung vae;
9 ngaethyanaw keiccuze
ka mit houhouh amoh vae.
Pou Bawipaw , nang kha
nin takyh kae ko;
ka kuih kha namaw kalan ka dyng.
10 Michi hae elang ngaeangthua lan
umpaw rya kha na lah tou?
Michi hae nynh nang kha
thehoysah khylan a thokuh hae tou?
11 Atynpaw na sungsahnaw tuh
shawku kya ho athua tou?
Na lungzinaw kong kha
ronaw hmin kya ho athua tou?
12 Na kya-e ngaeangnaw hae kha
mohnaw kya ny athua tou?
Na kya-e khumnawpaw bawmnaw tuh
ningnaw ram kya ny athua tou?
13 Thuasalama, pou Bawipaw ,
kae tuh na kalan ka sia;
awkhua ccyh kya ka sawsangnaw tuh
na malang phe athua.
14 Pou Bawipaw , pawccemou nae vua?
Pawccemou na mae nae retawku?
15 Ka di lya mawte vawsaw ka tung zah
vyavya leih ka chih,
detahnaw nae ingsah keiccuze
myarya ka bang vae.
16 Na thin-unaw nynh phang yn bong;
ri lan umpaw na syronaw nynh
kae kha yn ro.
17 Tui alepaw hawte anin ninlang yn koihlu hae;
voilang ranglang te yn naenuaku hae.
18 Ka ruiban hae te ka innpaw hae nynh
kae kha nae sibiasah hae;
kae ccawkuh hae paw tuh
mohnaw kya a um hae.