SAM 85
Maehoynaw Mue khylan Sawsangnawnote85 Abyalu: Korah Phin hae Hlaw
1 Bawipaw , na ram tungvaw
na lungrythua zah,
Jakob ciihan hae kha bua na kikhae hae.
2 Na ccungccaw hae hoyleinaw kha
na ngaethya hae;
mih seinaw balyn kha na ngaethya hae.
3 Na thinrianaw balyn kha na zosah zah,
myarya lepaw na thinrianaw kha
na daesah vae.
4 Kaening oun khumtu, pou Pachia,
langmawlya hawte
oun thuasah thui lah,
kae tungvaw na thinrianaw kha
daesah ccavae.
5 Kae tungvaw zungzae
na thinria cih tou?
Na thinrianaw tuh she takyh kya
accyh po na saesah cih tou?
6 Na ccungccaw hae nynh namaw kya
mih lungtua nawlan,
kaening hynh thawzung nae pyathui
lan khyh tou?
7 Pou Bawipaw , atynpaw
na sungsahnaw kha
oun langsapakuh lah,
na khumnaw kha oun pyatua.
8 Bawipaw Pachia nynh a ho cih paw
bya kha yn thaesah tua,
a ccungccaw hae, amaw kya
mih lungzi hae paw,
mih thinlung te amaw kalan
a maeleihkuh hae paw kalan khe
aning nynh daenaw bya kha
a hopah cih hae.
9 A phu-enaw tuh aening ram kya
a um nawlan, a khumnaw tuh
amaw a rih hae paw kuih kya nynh
a um ccaccing.
10 Atynpaw sungsahnaw te
lungzinaw tuh
a tungkuh cih hae;
dingnaw te daenaw tuh
a myngkuh cih hae.
11 Lungzinaw tuh laephi kyate
a pouthung cih zah,
dingnaw nynh vaawlui te
a dobung cih.
12 Bawipaw nynh hoynaw kha
oun pya cih zah,
ah ram nynh patae a voisah cih.
13 Dingnaw tuh Bawipaw malang khe
a cceih cih zah,
a laanpi kha a raepah cih.