SAM 84
Beikinnpi kya Beikte Lungtuanawnote84 Abyalu: Korah phin hae hlaw.
1 Pou vaaw Bawipaw ,
na umnaw hmin tuh
pawcih baban mou ry lan a um!
2 Bawipaw beikinnpi kha
ka muisaw nynh myaryamaw
ngae zah a thawthang;
ka thinlung te ka pyn nynh
ahiinpaw Pachia kalan
lungtuate hlaw a sah hae.
3 Pou vaaw Bawipaw ,
ka Siapharan te ka Pachia,
rihthya nynh heize umnaw kha
muihkuh zah,
za-yeh pavaw nynh mah amaw hanlan
bu a luaku,
na silawhang pe khe mih taw hae kha
a nung hae.
4 Na inn kya um hae paw tuh
lungtua hae paw nynh thua hae,
namaw kalan hlaw palei a sah hae.
5 Namaw kyate thawzung a mue hae paw,
Zion Mua lang ccia lan a ry hae paw tuh
lungtua hae paw nynh thua.
6 Minmin nynh Baka accya kya
a ccia lya hae khe, tuh-e accya tuh
tuidy a pounaw hmin lang a tangsah hae;
masaty rahpaw khuaatui nynh
tuisung hae kha phe a biasah hae.
7 A ccia lya hae khe
mih thaw houhouh asae;
pachia hae Pachia tuh Zion kya
muih athua cih.
8 Pou vaaw Bawipaw ,
ka sawsangnaw hynh yn thaepya tua;
Pou Jakob Pachia, yn ngaepya tua!
9 Pou oun thungkhawtu Pachia,
chitui na thuhpaw mitmae kha dotua.
10 Na beikinnpi lungkhu nin kheit um tuh
ccangpaw hmin kya nin thong kheit
um laeze ahoyhua.
Pachia thuakaw ngawtu lang tang tuh
ccungccaw hoyleipaw inn lungkhu
um laeze ahoyhua.
11 Pawccecize Bawipaw Pachia tuh
khuanin thua zah
thungkhawtu mah athua;
aning nynh maehoynaw te
sawtuanaw kha yn pya.
Hmerarih lante ryalah hae paw kha
Bawipaw nynh ahoypaw uccaw
pya leite um khyh hae.
12 Pou vaaw Bawipaw ,
nang ae doliakuhpaw miakaw tuh
lungtuapaw nynh thua.