SAM 81
A Lungkhungpaw Israel
Asaf Hlaw
1 Ah thawzung athuapaw Pachia kalan
lungtuate hlawsah oh;
Jakob Pachia kalan lungtuate sia oh.
2 Hlawsah oh lah, tyng kha thuasah,
aroi hoypaw daw te tintang kha
thuasah khuakuh oh.
3 Sawpaw sahhangthung, sahpynglyn,
aening poi nin kyakhe
mungkae kha tu oh.Ref 81.3: Nam 10.10
4 Pawccecize tuh-e tuh Israel hae hanlan
phungbya thua zah,
Jakob Pachia phungzae nynh thua.
5 Izip ram kya po he a cceih te,
Josef phin kya tuh-e phunglang tuh a rae.
Ka thae boi leipaw roi ccangkheit
ka thae zah, tuh-e roi nynh,
6 “Na raw vawlan e phupaw kha
kae lawpya vae;
na kuih kha rya na lawnawpaw
sua lungkhu te poh kae thuaapya vae.
7 Vawsaw na tungnaw kyate nae ko zah,
kae luesah vae;
muih kho leinaw kholungthyhnaw
hmin kyate nang kha kae leih vae;
Meribah tui kyakhe
nang kha kae syntawtua.Ref 81.7: Exo 17.7; Nam 20.13
8 Pou ka ccungccaw hae, raeringnaw
kae pya lya oh hin ngae oh;
Pou Israel, ka bya hynh ngaetua!
9 Nanning laku kya ramccang pachia
um lan khyh;
ramccang pachia kha na beik lan khyh oh.Ref 81.9-10: Exo 20.2-3; Deu 5.6-7
10 Kae tuh Izip ram kyate ae poukhae oh paw
Bawipaw nae Pachia nynh ka thua.
Nae khalang kha haehae aw oh lah,
kae baw cih oh.
11 “Thuasalama ka ccungccaw hae nynh
ka bya ngae khyh hae;
Israel hae nynh ka kaw yn ngae khyh hae.
12 Tukeiccuze mih ry thyhte um hae sah cite,
mih lungkhung thyhte ka cciasah hae.
13 Ka ccungccaw hae nynh ka bya kha
ngae hae sah,
Israel nynh ka laanpi kha a zui lanze,
14 mih rhaw hae kha arangte
ka taepah cih hae zah,
minmin a rawse hae paw kha
de ka tah cih hae.
15 Bawipaw a hua hae paw tuh
amaw malang rawrite
a thyngkuh cih hae,
minmin tungvaw detahnaw tuh
zungzae atyn cih.
16 Ahoy huapaw chanvuih te
nanning kha kae dang cih oh zah,
lungpi kya-e khoitui te phe byn lan
kae dang cih oh,” a ci.