SAM 79
Jerusalem elang Ngianaw
Asaf Hlaw
Pou Pachia, minphuin hae nynh
na rho lungkhu lang yn thua vae hae;
athyaapaw na beikinnpi kha
a thusah vae hae;
Jerusalem kha a ro vae hae.Ref 79.1: 2Si 25.8-10; 2Sh 36.17-19; Jer 52.12-14
Na ryalahtu hae rhua kha
vaawlang e pavaw hae kalan
pya hae zah, alungzipaw
na ccungccaw hae saw kha
loramsaw hae kalan a pya vae hae.
Na ccungccaw hae chiise kha
Jerusalem pepan balyn
tui hawte luasah hae zah,
mih rhua a uh lanpaw
lu kheit san um khyh.
Kaening tuh kae innpaw hae nynh
saryapaw lang kae tang vae zah,
kae pepan um hae paw nynh
nuinsepaw te dothatheihpaw lang
kae tang vae.
Pou Bawipaw , hohseciamou
na thinria cih?
Zungzae na thinria cih tou?
Na thinrianaw tuh maee hawte
po rua cih tou?
Nang ae nyh lei hae paw
minphuin hae te
na min ae ko lei hae paw
peenaw hae kha thinrianua hae.
Pawccecize minmin nynh
Jakob ciihan kha theih hae zah,
a umnaw kha mah a ro hae.
Kae minpaaw hae seinaw keiccuze
kaening hynh de oun tah nan;
myarya kae nyaa keiccuze
arangte thaw oun ccitua.
Pou oun khumtu Pachia,
Na min phu-enaw hanlan
oun bawmtua, na min keiccuze
oun luesah lah, kae seinaw
oun ngaethya.
10 Pawccemou minphuin hae nynh,
“Mih Pachia tuh teimou um?”
cite a ho hae?
Na ryalahtu hae chiise kha
a luasah keiccu hae ze,
minphuin ccangpaw hae tungvaw
na liarunaw hae paw kha
kae mit nynh muih sah.
11 Thongccah hae nynh
a hawkhaeku hae paw
roi kha thaepya tua hae;
chia lan accan vae hae paw kha
alesaepaw na huhan khate
luesah tua hae.
12 Pou Bawipaw,
kae innpaw hae nynh
nang ae sarya hae keiccuze,
leit sari te liaru hae.
13 Tetuh kaening na ccungccaw hae,
na ramnonaw e tuuphu hae nynh
na tungvaw zungzae kae lungtua cih;
namaw thehoysahnaw bya kha
she kheit koute she kheit kae ho cih.