SAM 77
Pachia kya-e Athungpaw Ryalawnaw
Asaf Hlaw
1 Pachia kalan thawte ka sia,
Pachia kalan thawte ka siapaw roi kha
yn thaepah cih.
2 Ka vawsaw lyakhe Bawipaw kha
ka ccung; khuazi kya mah
ka kuih kha thawbang leite ka dyng;
thuasalama ka muisaw tuh
ngaengannaw mue khyh.
3 Pachia kha ka tua zah,
ka hawkhaekuh;
Hoyte ka tua zah, ka lungthawzya,
4 Mit masite nae isah kho khyh;
ka lungvaw eih saw zah,
bya ka ho kho khyh.
5 Athang vae paw nin hae kha ka tua zah,
langmawlya e kum hae kha ka liathui.
6 Khuazi khe ka hlaw kha
ka thinlung te ka tua;
hoyte ka tua zah, ka muisaw kha
ka ccung.
7 “Bawipaw nynh zungzae yn vua cih tou?
maehoynaw bua yn pya
vae lan khyh tou?
8 Atynpaw a sungsahnaw kha
zungzae a thangsah vae cih tou?
A byakinpyakunaw hae tuh
zungzae a thangsah vae cih tou?
9 Pachia nynh thawcci lanpaw kha
phe a ning vae tou?
Ngaethyaumsahnaw a hoipaw kha
a thinria keiccuze
phe a zosah vae tou?” ka ciku.
10 Te kae nynh, “Ka ngae athyapaw tuh:
Ahang Huaccepaw
a ranglang kuih nynh phe a rulae vae,
cipaw hynh nynh thua,” ka ci.
11 Bawipaw ryalawnaw kha
ka tuathui cih;
langmawlya na la cyipaw
ngaeangthua lan um hae paw kha
ka liathui cih.
12 Na ryalaw balyn kha ka tuathui cih zah,
athungpaw na cyisahnaw hae kha
hoyte ka tua cih.
13 Pou Pachia, na laanpi tuh athyaa.
Pawcihawpaw pachia mou
kaening Pachia hawte alesae?
14 Nang tuh ngaeangthua lan umpaw
rya a lahpaw Pachia nynh na thua;
minphuin hae kyakhe na thungnaw kha
na langsaku vae.
15 A thawsaepaw na kuih te
na ccungccaw athua hae paw
Jakob te Josef ciihan hae kha
na shawkhaw hae.
16 Pou Pachia, tui hae nynh nang kha
he ae muih hae te, minmin tuh a rih hae;
tui akhunaw tuh a thyngkuh.
17 Maeking hae nynh khuaa a rawsah;
vaawlui mah kholungthyh zah,
na the hae tuh
teitei lang balyn phe a thua.
18 Na kholungthyhpaw roi tuh
khiccung kya um zah;
na khozawlaekuhpaw nynh
laephipi kha a awsah;
laephi tuh thyngkuh zah ahy.
19 Nang tuh rili kyakhate na cceih,
na laanpi tuh akopaw
tui kya po a cceih;
tuhzemah na ccunoh tuh
muih kho thua khyh.
20 Moses te Aaron kuih khate
na ccungccaw hae kha
tuuphu hawte na cciakhae hae.