SAM 71
She sae nawlan Sawsangnaw
1 Pou Bawipaw , namaw kya ka rekuh;
maethyanaw kharouh yn muesah nan.
2 Na dingnaw te yn luesah lah,
yn khumtua;
na nakaring kha ka kalan yn tuakuh lah,
yn khumtua.
3 Ka hanlan khynnaw lungpi thua lah,
kae kha khum khylan atynpaw
rhawlungrua thuatua,
pawccecize nang tuh ka lungpi te
ka rhawlungrua nynh na thua.
4 Pou ka Pachia, ccungccaw hoylei hae paw
kuih kyate thuasah,
a ding lei hae paw te mih rysawthah
hae paw kuih kyate thuasah
kae kha yn luesah tua.
5 Pou Bawipaw, nang tuh
ka ngaehoinaw nynh na thua,
Pou Bawipaw , ka di lya mawte
kae doliakupaw nynh na thua.
6 Ka pui takaw te nang kha
kae reihpeku vae;
ka nung vue kyate yn puisahpaw tuh
nang nynh na thua.
Nang kha po kae thehoysah cih.
7 Kae hynh ccungccaw patae hanlan
muihsahnaw hawte nynh ka thua,
thuasalama nang tuh atynpaw
ka khynnaw nynh na thua.
8 Anin ninlang ka mung nynh
nang kha ae thehoysah zah
na phu-enaw kong kha a ho.
9 Ka taw vae ze, yn vua nan;
ka thawzung athang vae ze, yn vua nan.
10 Ka rhaw hae nynh ka konglang
hokuh hae zah,
kae kha chia yn ry hae paw ryte
pynkheihlan khua a khanku hae.
11 “Pachia nynh a vua vae paw,
khuh-e ccungccaw khuh
deehui oh sih lah, kyng oh sih,
pawccecize amaw a khum lanpaw
hum sanmah um khyh,” cite a hoku hae.
12 Pou Pachia, ka kyate beih sawkuh nan;
Pou ka Pachia, arangte yn bawmtua!
13 Kae yn rawse hae paw tuh
maethyanaw ccou hae sah lah, roh hae sah;
vawsawnaw tungsah yn ry hae paw tuh
saryanaw te thethyanaw ccou hae sah.
14 Kae tuh po ka ngaehoi cih zah,
nang kha houhouh kae thehoysah cih.
15 Na dingnaw te na khumnaw kha
anin ninlang ka ho cih,
tuh-e hae tuh ka ny khonaw laeze
alung zemah ka ho cih.
16 Bawipaw PACHIA kya-e athungpaw
ryalawnaw hae kha ka thehoysah cih,
na dingnaw kyalya kha ka siakhae cih.
17 Pou Pachia, ka di lya mawte
nae ccangpya vae,
ngaeangthua lan umpaw
na ryalawnaw hae kha
palei ka siakhae ung.
18 Pou Pachia, ka taw vae zah,
ka sang phe paw lang cia,
yn thua cih paw she hae balyn kya
na thungnaw kha ka siakhae mawlaezung
kae kha yn vua nan.
19 Pou Pachia, na huhan te na dingnaw nynh
ahangpaw vaawlui phe a phya.
Myarya lepaw uccaw hae a raepaw, pou Pachia,
nang ae lopaw hummou a um?
20 Vawsawnaw te runaw patae
yn tungsahpaw nang nynh
kae kha thawzung nae pyathui cih;
akhupaw laephi kyate
kae kha bua nae thuaa cih.
21 Sawtuakunaw houh nae pya cih zah,
ngaengannaw kha bua nae pya cih.
22 Pou ka Pachia, alungzipaw
na thua keiccuze nang kha
tintang te kae thehoysah cih.
Pou Israel hae Pachia Athyaapaw,
tintang khuakute na kalan
thehoysahnaw hlaw ka sah cih.
23 Na kalan thehoysahnaw hlaw
he ka sah te, ka khalang te
lungtuate ka sia cih.
na khum vae paw ka muisaw mah
a lungtua cih.
24 Ka lae nynh adingpaw na bawmnaw
kong kha anin ninlang a ho cih,
pawccecize vawsawnaw pya lan
yn zuanuakuh hae paw tuh
maethyanaw mue hae zah,
mih thethah vae.