SAM 69
Luenaw hanlan Sawsangnawnote69 Abyalu: David nynh a phuapaw.
1 Pou Pachia, beih yn khumtua,
pawccecize tui nynh ka nging kyacia
yn vu vae.
2 Ccusy um leinaw akhupaw tuiccua nynh
yn sungkhaekuh zah,
akhupaw tui lungkhu lang ka phungkuh,
tuileih nynh yn thothin.
3 Ka siaruanaw ze phe ka bang;
ka lotharue phe rou vae.
Ka Pachia ka dokhawnaw ze
ka mit mah ngaw hoyte
ka muih vae khyh.
4 Akonglang um leite yn hua hae paw tuh
ka lu kya-e ka sangrua laeze a lunghua hae,
Kae kha ro lan yn ry hae paw tuh
myarya a lung hae,
ahme lei lante sei yn be hae paw
ka rhaw hae tuh mih thaw asae.
Ka ru leipaw uccaw kha
ka rung hahe cih tou?Ref 69.4: Sam 35.19; Joh 15.25
5 Pou Pachia, ka ngaeenaw kha
phe na ny;
ka la mesei hae paw kha na kyate
thuruh kho thua khyh.
6 Pou vaaw Bawipaw Pachia,
nang ae ngaehoikuh hae paw tuh
kae ka keiccuze maethyanaw
mue nan hae sah;
Pou Israel Pachia,
nang ae ccung hae paw tuh
kae ka keiccuze thethyanaw
mue nan hae sah.
7 Nang keiccuze saryanaw ka mue zah,
maethyanaw nynh
ka mae phang yn bong.
8 Ka uno hae kya mikhiapaw lang
ka tang vae zah,
ka nung ccaaw hae kya
ramccangpaw lang ka tang vae.
9 Na inn elang ka lungzuanaw nynh
kae kha phe yn ae;
nang ae saryatu hae paw nynh
ae saryanaw hae paw bya tuh
ka tungvaw accah vae.Ref 69.9: Joh 2.17; Rom 15.3
10 Looh-ae sungnaw te
ka thinlung zakaw he ka sangsakuh tuh,
minmin nynh yn theihrya vae hae.
11 Buriboei he ka zingkuh tuh,
minmin nynh yn sarya hae.
12 Laanluepi kya ka thethya yn ho hae zah,
a zu a ae hae paw nynh hlaw yn phua hae.
13 Thuasalama, pou Bawipaw ,
kae tuh namaw kalan saw ka sang.
Pou Pachia, atynpaw na sungsahnaw
alepaw khate,
na ccansaku ccyh khe beih yn leih.
A lungzipaw na bawmnaw khate,
14 tuiccua lungkhu lang ccawnaw kyate
beih yn khum;
ka rhaw hae kyate thuasah,
akhupaw tui kyate thuasah
yn luesah.
15 Tuileih nynh ka tungvaw
yn thothin nan sah,
akhupaw tui lungkhu lang ka ccah nan sah,
Hunghua nynh a lungkhu kya
kae kha yn huthin nan sah.
16 Pou Bawipaw , atynpaw
na sungsahnaw tuh
ahoy keiccuze yn leihtua,
myarya lepaw na thawccinaw thyhte
ka kalan yn maeleihku tua.
17 Na seepaw kyate na mae kha
ccanglang yn hawitaw nan,
pawccecize vawsawnaw ka tung,
arangte yn leihtua.
18 Ka kalan yn naekuh lah,
yn shawkhawtua,
ka rhaw hae kyate yn luesah tua.
19 Ka teingpaw theihryanaw,
maethyanaw te
thethyanaw kha phe na ny;
ka rhaw hae kha phe na ny hae.
20 Theihryanaw nynh ka thinlung kha
phe yn koi zah, lungrote ka um.
Ngaethyaumsahnaw kha ka ccungku zemah
ka muihkuh khyh;
ngaengansahtu hae kha
ka ccungku zemah ka muihkuh khyh.
21 Minmin nynh sy kha
looh lang yn pya hae,
ka tuihaw zah misutui ariapaw kha
nia lan yn pya hae.Ref 69.21: Mat 27.48; Mar 15.36; Luk 23.36; Joh 19.28-29
22 Mih ccaboi tuh minmin hanlan
kaang thua sah lah,
minmin te a hobung hae paw hanlan
taphung thua sah.Ref 69.22-23: Rom 11.9-10
23 Mih mit tuh ngaw a muih kho
lei lan moh sah lah,
mih tae tuh po thyngkuh sah.
24 Na thinrianaw khate mih tungvaw
bu hae lah,
aruapaw na thin-unaw nynh
phe phah hae sah.
25 Mih ryahmin tuh ccungccaw dae sah lah,
mih bu kya lu kheit san um nan hae sah.Ref 69.25: Loc 1.20
26 Pawccecize de na tah vae hae paw kha
a tuaa a sah hae,
vaemaw na muesah vae hae paw kha
mah a buachih hae.
27 Mih seinaw kyakhe seinaw kha
biachihpah hae lah,
na kyate seithyaanaw mue nan hae sah.
28 Hiinnaw ccazing kyate
minmin kha the thua hae sah;
miding hae kya min ccazing lawbua
thua nan hae sah.Ref 69.28: Exo 32.32; Bya 3.5, 13.8, 17.8
29 Thuasalama kae tuh zakawsangte
vawsawnaw kya ka um;
Pou Pachia, na khumnaw nynh
kae kha yn thungkhaw sah.
30 Pachia min kha hlaw te
the ka hoysah cih;
lungtuanaw byahote amaw kha
ka thehoysah cih.
31 E hynh nynh aki te accumakeih
umpaw tangnuapaw te silaw laeze
Bawipaw kha a lungry
a thuasah hua cih.
32 Tuaasahkunaw a ing hae paw nynh
tuh-e tuh muih hae sah lah,
mih lungtua sah;
Pachia a ccung hae paw nanning,
nae thawmuin sah.
33 Bawipaw nynh ryachi hae
bya kha a thaepya hae,
thong lungkhu um hae paw
amaw ccungccaw hae kha
pawlangria leite um khyh hae.
34 Vaawlui, laephi, rili hae te
hynh-e hae kya a umpaw
ahysuepaw balyn nynh
amaw kha thehoysah hae sah.
35 Pachia nynh Zion kha a khum cih zah,
Judah khuapi kha a raethui cih;
a see hae tuh tuin kya a um cih hae zah,
tuh-e tuh a ccou cih hae;
36 a see hae mih ccaawno hae nynh
tuh-e tuh rho lang a ccou cih hae zah,
amaw min a sungsah hae paw nynh
tuin kya a um cih hae.