SAM 59
Ref 59 Abyalu: 1Sa 19.11Luenaw elang Sawsangnawnote59 Abyalu: David kha chia khylan Saul nynh a inn kya ccungccaw a ngawsah koute David nynh a phuapaw hlaw.
1 Pou ka Pachia, ka rhaw hae kyate
yn luesah tua; kae kha rawsete
yn thonuakuh hae paw kyate
yn thungkhawtua.
2 Hoyleinaw rya a lah hae paw kyate
yn luesah tua;
ccungccaw a theih hae paw kyate
yn khumtua.
3 Atumaw heize ka hiinnaw chia khylan
yn buhkhaw hae;
athungpaw ccungccaw hae nynh
pekumaeku yn hyy hae.
Pou Bawipaw , ka cyiseinaw te
ka seinaw keiccu thua khyh,
4 ka cyiseinaw a um lei pite,
yn ccuenua hae zah,
yn paccynnuaku hae.
Kae kha bawm khylan
yn thokuh lah yn dotua.
5 Bawipaw vaaw hae Pachia,
nang tuh Israel Pachia nynh na thua.
Minphuin balyn detah khylan thoku tua;
a hynhupaw ccungccaw hoylei hae paw kha
lu kheit sanmah haang nan hae.
6 Minmin tuh zete takyh oun ki hae zah,
ui hawte siate khua lungkhu
a khiavuikuh hae.
7 Mih khalang te thawte a sia hae,
mih mung kyakhe thaloi hawte
ahepaw bya um zah,
“Hum nynh mou oun thae cih?” a ci hae.
8 Thuasalama, pou Bawipaw ,
minmin kha na nuinse hae;
minphuin balyn kha na sarya hae.
9 Pou ka thawzung, nang kha
kae ngaehoikuh cih;
Pou Pachia, nang tuh
ka rekunaw nynh na thua.
10 Ka Pachia nynh atynpaw a sungsahnaw te
kae kha yn tungkuh cih;
ka Pachia nynh ka rhaw hae tungvaw
taenaw yn muesah cih.
11 Pou Bawipaw , kae khawriaphua,
minmin kha theih nan hae,
tuhkhyhze tuh ka ccungccaw hae nynh
a ningsei cih hae;
na huhan te minmin kha phia hae lah,
nyaasah bung hae.
12 Mih khalang kya-e seinaw,
mih munglae kya-e bya hae keiccuze,
mih lysakunaw kya kaangkae hae sah.
A ho hae paw thyalawnaw bya te
hynbya keiccuze,
13 thinriate minmin kha phe maemih hae;
phe a zo lan hae cia, maemih hae.
Tetuh Pachia nynh Jakob phuin kha uk zah,
laephi athangnaw cia
a uk cipaw a nyh cih hae.
14 Minmin tuh zete takyh oun ki hae zah,
ui hawte siaruate
khua lungkhu a khiavuikuh hae.
15 Looh ccungku khylan
khiavuikuh hae zah,
ae khin a mueku khyh hae ze,
a ccohkuh hae.
16 Thuasalama na thungnaw kha
hlaw te ka sah cih;
awkhua takaw khe atynpaw
na sungsahnaw kha hlaw te
ka siakhae cih.
Pawccecize nang tuh ka rhawlungrua
na thua vae zah,
ka vawsaw ccyh lya
ka khynnaw nynh na thua.
17 Pou ka thawzung,
na kalan thehoysahnaw hlaw ka sah cih,
Pou Pachia, nang tuh
ka rhawlungrua nynh na thua,
atynpaw sungsahnaw yn langsapakuhpaw
Pachia nynh na thua.