SAM 57
Ref 57 Abyalu: 1Sa 22.1, 24.3Bawmnaw elang Sawsangnawnote57 Abyalu: David nynh Saul kyate ccue zah lungkarung kya a rekuh koute a phuapaw hlaw.
Pou Pachia, ngaethya beih yn umsah,
ngaethya yn umsah tua,
pawccecize ka muisaw tuh
namaw kya a rekuh;
ronaw khise a dae mawlaezung,
na sake mynlyh kaw khe ka rekuh cih.
Ahang Huaccepaw Pachia kalan,
ka hanlan a paccynnaw
yn ccingsahpahpaw Pachia kalan ka sia.
Vaawlang te yn saw cih hae zah
yn khum cih, yn syde hae paw kha
maethya a lah cih hae.
Atynpaw a sungsahnaw te
a lungzinaw kha yn sawpah cih.
Karankute ccungccaw a teithyapaw
chindeih hae laku khe ka ih;
mih haw tuh ccoi te
the hawte nynh thua hae.
mih lae tuh ahepaw
thaloi hawte nynh thua hae.
Pou Pachia, vaawlui luki cia
thehoysah na thua vae.
Na phu-enaw nynh laephi pynpi
pong bong sah.
Minmin nynh ka ccianaw kya
kaang yn syakhaw hae;
ka muisaw tuh lungriathaete a um.
Ka ccianaw khe hunghua yn thaekhaw hae,
thuasalama tuh-e hunghua lungkhu lang
mimaw toulou a ccah hae.
Pou Pachia, ka thinlung tuh tynkaring,
ka thinlung tuh tynkaring.
Hlaw ka sah cih zah the kae hoysah cih.
Ka muisaw, thotua!
Pou tintang te phyly, thotua oh!
Kae mah awkhua takaw te ka tho cih.
Pou Bawipaw , ccungccaw hae laku kya
kae thehoysah cih;
minphuin hae laku kya
nang thehoysahnaw hlaw ka sah cih.
10 Pawccecize atynpaw na sungsahnaw tuh
vaawlui cih ahang;
na lungzinaw tuh
maeking kyacia phe aphah.
11 Pou Pachia, vaawlui luki cia
thehoysah na thua vae.
Na phu-enaw nynh laephi pynpi
pong bong sah.