SAM 51
Ref 51 Abyalu: 2Sa 12.1-15 Seingaethyanaw hanlan Sawsangnawnote51 Abyalu: David nynh Bathsheba te sei hae zah Nathan nynh a pe koute a phuapaw hlaw.
Pou Pachia, atynpaw
na sungsahnaw thyhte thaw yn ccitua;
na thawccinaw alepaw liate
ka cyiseimenaw kha
yn thyaasahpya tua.
Ka hoyleinaw kha marya yn singpah lah,
ka seinaw kyate yn thyaasah tua.
Pawccecize ka cyiseimenaw kha
ka nyhkuh zah,
ka seinaw tuh palei ka syntaw.
Nang kha rawsete namaw kya
ccaccei phe ka sei vae,
na muihnaw kya hoyleinaw
phe ka rae vae,
tukeiccuze na byapaenaw tuh kyh zah,
bya na pianaw kya ccaenaw um khyh.Ref 51.4: Rom 3.4
Ka pui takaw mawte seinaw ka hoi,
ka nung nynh yn poi lya mawte
misei nynh ka thua.
Adingpaw thinlung kha na ry,
tukeiccuze ka thinlung kya
hawnaw kha yn ccangpya tua.
Hyssop khate yn thyaasah lah,
ka thyaa cih;
yn sing lah, vuiraw laeze
ka rawhua cih.
Lungtuanaw te lungpawnaw bya kha
yn thaesah tua;
tetuh nae khya vae paw ka ru hae tuh
mih lungtua cih.
Ka seinaw kyate na mae kha
yn retawkuh lah,
ka hoyleinaw balyn kha
yn zosahpya tua.
10 Pou Pachia, ka lungkhu kya
athyaapaw thinlung kha raetua,
athawpaw te akyhpaw tuanaw kha
ka lungkhu kya yn sangtua.
11 Na umnaw kyate yn dee nan lah,
na thyaa muisaw kha
ka kyate yn lawpah nan.
12 Na khumnaw kyate yn thuapaw
lungtuanaw kha bua yn pya lah,
kawngaenaw thinlung kha yn hoisah.
13 Tetuh na laanpi kha misei hae
ka ccangpah cih hae zah,
misei hae nynh na kalan yn ki cih hae.
14 Pou Pachia, yn khumtu Pachia,
ccungccaw chianaw kyate
yn luesah lah,
nae luesahnaw kha myarya ccae lante
hlaw ka sah cih.
15 Pou Bawipaw , ka munglae
yn hungpah lah,
ka khalang nynh na thehoynaw kha
a siakhae cih.
16 Silawnaw kha na lungrythua khyh;
na lungry a la thua lanze,
he kae pya cih paw,
maee-ute silawnaw ka la rae lan zemah,
na lungrythua lan khyh.
17 Pachia nynh a rypaw silawnaw tuh
akoipaw thinlung nynh thua;
Pou Pachia, akoipaw te angaesikuhpaw
thinlung kha na vua he khyh.
18 Na thawccinaw liate Zion khe
hoynaw raepya tua;
Jerusalem khualungrua kha raethui tua,
19 tetuh akyhpaw silawnaw,
maee-ute silawnaw te
apyn balyn maee-ute silawnaw kyakhe
na lungry athua cih;
tetuh na silawhang vawlan khe
tangnuapaw hae khate
silaw athua vae cih.