SAM 49
Hoirumnaw Doliaku tuh Ngaeenawnote49 Abyalu: Korah phin hae hlaw.
1 Nanning, ccungccaw hae balyn,
e hynh thaetua oh,
laephi kya a um hae paw balyn,
2 a nepaw te a hangpaw parouhte,
a hoirumpaw te a ryachipaw
nae balyn te ngaetua oh.
3 Ka khalang nynh hawnaw bya kha
a ho cih;
Ka thinlung tuh hawnaw te
asekuhpaw kha nynh a tua.
4 Ka nakaring kha phungtangbya kalan
ka tuakuh cih;
byakhupaw kha tintang khuakute
ka ccaesah cih.
5-6 Ccungccaw hoyleipaw ka rhaw hae,
mih sisua doliakuh hae zah
mih hoirumnaw patae khate
a pookuh hae paw nynh
yn koihlu hae zah ka vawsaw ccyh lyakhe
pawcce ka rih cih?
7 Thanccingte, ccungccaw lu kheit
hiinnaw shawkhawnaw lanpaw
pawpaw mah um khyh,
hiinnaw hanlan Pachia kalan
pya kho lanpaw amee um khyh.
8-9 Pawccecize zungzae hiin nawlan te
shawku kha kharouh muih khyh nawlan,
hiinnaw shawkhawnawpaw tuh
amee myarya ru zah zaw kho khyh.
10 Mihawpaw tuh a chih;
tuhawte mingaeepaw te
tuanaw hoi leipaw mah chih hae zah,
mih sisua hae tuh ming hae elang
a cciatawpya hae.
11 Mih shawku tuh zungzaete
mih inn nynh thua,
loram hae kha mimaw min
a la phu hae zemah,
mih umnaw hmin hae tuh
she takyh hanlan nynh thua.
12 Ccungccaw tuh a lesaenaw kya
tynkhaekuh khyh;
a chihthyapaw sarangpaw te nynh a loku.
13 Mimaw te mimaw a doliakuh hae paw,
mih hoirumnaw te
mih ngaengankhaekuh hae paw tuh
mih tungvaw pawmou acyihkuh cih
cipaw dotua oh.
14 Minmin tuh tuu hae hawte
michi khua hanlan
nungdae athua hae paw nynh thua;
Chinaw tuh mih tuurinpaw athua cih;
shawku langkhe lawbabin lan
rungbung hae zah,
mih pyn tuh azo cih;
Michi khua tuh mih inn athua cih.
15 Thuasalama Pachia nynh kae kha
yn ccou keiccuze
ka muisaw kha Chinaw huhan kyate
yn shawkhaw cih.
16 Ccungccaw abang tuh
oun hoirum hae zah,
mih inn e sisua tuh
he oun lungthung vae ze,
na thinphang nan sah.
17 Pawccecize he a chih hae te,
pawpaw mah phukuh lan khyh hae;
mih sisua tuh mih nulang
zuikuh bua lan khyh.
18 Mih hiin lungkhu khe
mimaw te mimaw kha
a lungtuapaw lang a riaku hae zemah,
mimaw elang kou hoy lan
rya a lawku hae ze mih thehoy zemah,
19 awnaw a muihthui lei vae cih hae paw
mih minpaaw hae phu kalan khe
a cceihbua cih hae.
20 Ccungccaw tuh a lesaenaw kya
tynkhaekuh khyh;
a chihthyapaw sarangpaw te nynh a loku.