SAM 47
Minphuin hae tungvaw Pachia Uknawnote47 Abyalu: Korah phin hae hlaw.
Nanning, ccungccaw hae balyn,
nae kuihbia oh;
lungtuanaw hlaw te Pachia kalan
accae lante sia oh.
Pawccecize Ahang Huaccepaw
Bawipaw tuh ri lan umpaw,
laephi pynpi a ukpaw,
alesaepaw siapharan nynh thua.
Ccungccaw hae kha
aening zakaw nung hae zah,
minphuin hae kha aening ccu kaw
a nung hae.
Amaw nynh aening elang
ah rho kha oun popya,
tuh-e tuh a sungsahpaw Jakob
a rykunawpaw nynh thua.
Pachia tuh lungtua siaruanaw roi ryte a kae,
Bawipaw tuh mungkae roi ryte a kae.
Pachia kalan thehoysahnaw hlawsah oh,
thehoysahnaw hlawsah oh;
ah Siapharan kalan thehoysahnaw
hlawsah oh, thehoysahnaw hlawsah oh.
Pawccecize Pachia tuh laephi pynpi
siapharan nynh thua;
amaw kha hlaw te thehoysah oh.
Pachia tuh minphuin hae
a ukpaw siapharan nynh thua;
Pachia tuh athyaapaw
a bawitungkhung kya a haung.
Minphuin hae kya-e uktu bawi hae tuh
Abraham Pachia kya-e
ccungccaw hae ryte a sueluakuh hae.
Pawccecize laephi huhan tuh
Pachia kya-e nynh thua;
aning kha myarya ahang lante
hangthung athua.