SAM 42
UK 2
Vawsaw Ccyh lya Sawsangnawnote42 Abyalu: Korah phin hae kya-e byarui.
Sazuh nynh vadungtui kha
a ngae hawte,
Pou Pachia, ka muisaw nynh
nang kha ae ngae.
Ka muisaw nynh Pachia,
ahiinpaw Pachia kha
tuihaw lan a haw.
Hohtuhmou Pachia kalan
ka cceih cih zah,
a mae kha ka muih cih?
Ccungccaw hae nynh, “Na Pachia tuh
teimou um?” cite
palei yn ci lya hae khe,
khuazi khuadae ka mitphi tuh
ka looh nynh thua vae.
E uccaw hae hynh ka liathui,
ka thinlung akoi:
pawccecize ccungccaw patae ryte
kae cceih zah,
lungtuanaw roisawte,
thehoysahnaw hlawsah biate,
beiknaw poitua hae paw zapi hae kha
Pachia inn lang ka cciakhae hae.
Pou ka muisaw, pawcce na ngaethya?
Pawcce ka lungkhu kya
na lungriathae?
Pachia kha ngaehoikuh;
yn bawmtu te ka Pachia kha
bua ka thehoysah cih.
Ka muisaw tuh ka lungkhu kya
a ngaethah;
tukeiccuze Jordan vahue te
Hermon mua kyate thuasah,
Mizar Mua kyate thuasah
nang kha kae liathui.
Na ngatoh hae roi accaepaw kyakhe,
tui akhupaw nynh ccangpaw tui
akhupaw kha a ko;
na tuileih hae balyn nynh
kae kha yn vu vae hae.
Bawipaw nynh khuadae kya
atynpaw a sungsahnaw kha yn pya,
khuazi kya a hlaw kha ka sah zah,
ka hiinnaw a Pachia kalan khe
saw ka sang.
Pachia, ka lungpi kalan khe,
“Pawcce phe nae ning vae?
Rhaw nynh yn tuaa yn sah keiccuze
pawccemou rawkhuite
palei ka um cih?” cite ka ci.
10 Ka rhaw hae nynh, “Na Pachia tuh
teimou um?” cite palei yn ci hae zah,
ka pyn kya a chisah khopaw
vaemaw hawte yn sarya hae.
11 Pou ka muisaw, pawcce na ngaethya?
Pawcce ka lungkhu kya
na lungriathae?
Pachia kha ngaehoikuh;
yn bawmtu te ka Pachia kha
bua ka thehoysah cih.