SAM 32
Seingaethyanaw te Lungtuanaw
David Hlaw
1 A seinaw kha ngaethya athuapaw tuh
lungtuapaw nynh thua,
a seinaw kha bongpya athua vae.Ref 32.1-2: Rom 4.7-8
2 Bawipaw nynh na sei khyh a cipaw,
a thinlung kya lingnaw a um leipaw
ccungccaw tuh lungtuapaw nynh thua.
3 Ka seinaw phyku leite he ka um tuh,
anin ninlang ka hawkhaeku keiccuze
ka pynsaw phe voi.
4 Pawccecize khuazi khuadae
na kuih nynh phang yn ne;
hawnin asopaw keiccuze karae arou hawte
ka thawzung tuh karae rou.
5 Tetuh ka cyiseimenaw kha
na kya ka phykuh zah,
ka hoyleinaw kha ka thuruh khyh;
“Ka seimenaw kha Bawipaw kalan
ka phykuh cih,” ka ci zah,
ka seinaw kha nae ngaethya vae.
6 Tukeiccuze mih lungzi hae paw balyn nynh
vawsaw ccyh lya
na kalan sawsang hae sah;
tui lepaw nynh minmin kha
thuanua lan khyh hae.
7 Nang tuh ka rekunaw hmin nynh na thua;
vawsawnaw kyate nae thungkhaw;
luenaw hlaw khate kae kha nae koihlu.
8 Nang kha kae thuihei cih zah
na zui lanpaw laanpi kha kae ccangpah cih;
nang kha tuanaw pyate kae do-oih cih.
9 Nythyanaw hoi leipaw marang te
lann hae te lokuh nan oh,
hynh-e hae tuh mih mung kya
rangtei teisahte kia aho hae,
tuhkhyhze tuh na pepan um lan khyh hae.
10 Ccungccaw hoylei hae paw tuh
vawsawnaw patae a tung hae,
thuasalama Bawipaw a doliakuh hae paw tuh
atynpaw sungsahnaw nynh a koihlu hae.
11 Pou miding hae, Bawipaw kya
nae lungtua sah lah, nae lungpaw sah,
thinlung a ding hae paw balyn,
lungtuate sia oh.