SAM 17
Lue khylan Sawsangnaw
David Sawsangnaw
1 Pou Bawipaw , adingpaw kae ngianaw hynh ngaetua;
ka siaruanaw hynh yn thaepya tua;
hynpaw bya athua leipaw
ka sawsangnaw hynh yn ngaepya tua.
2 Ka kalan te bya yn piapah lah,
akyhpaw kha muihtua.
3 Ka thinlung hynh akaw-aleih
nae do ze thuasah, khuazi ccyh kya
nae paebua ze thuasah,
nae syntawtua ze thuasah
ka tungvaw kya hoyleinaw kha
na muih lan khyh;
ka khalang tuh hosei khyh.
4 Ming hae nynh a cyi hae hawte
thua leite,
na bya liate puathonaw laanpi kha
ka sibia vae.
5 Na laanpi kha tynkaring lan ka zui zah,
ka ccu tuh thei khyh.
6 Pou Pachia, kae kha
nae thaepah cih keiccuze
nang kha kae ko;
na naw kha ka kalan
beih yn tuakuh lah,
ka bya hynh yn thaepya tua.
7 Na kya a rekuh hae paw kha
mih rhaw hae kyate
na ranglang kuih te
na khumtu hae paw Pou Khumtu,
atynpaw na sungsahnaw kha
ngaeang lan a um lante langsaku tua.
8-9 Kae yn tuaa yn sah hae paw
ccungccaw hoylei hae paw kyate thuasah,
kae kha koihlute yn theih ry hae paw
ka rhaw hae kyate thuasah
na mitlungdy hawte yn rin lah,
na sake mynlyh kyakhe yn resaku tua.
10 Ngaethyaumsahnaw hoi leite,
mih khalang te lysakunaw bya kha
a ho hae.
11 Ka ccianaw takyh langkhe
yn koihlu hae;
kae kha laephi kya khulia khylan
mih mit te phang yn buh hae.
12 Zoihtatyh lan pia khylan
a zuakuhpaw chindeih hawte
thua hae zah,
arekunaw hmin kya phang a buhpaw
chindeih anopaw te nynh aloku hae.
13 Pou Bawipaw , thoku tua,
minmin kha hawilia hae lah,
khuliatua hae!
Ka hiinnaw hynh ccungccaw hoylei hae paw kyate
na thaloi khate yn luesah tua.
14 Pou Bawipaw , ccungccaw hae kyate thuasah,
mih hiinnaw kya mih hanpaw tuh
hynh-e laephi vawlan kyalya a umpaw
ccungccaw hae kyate thuasah
ka hiinnaw hynh na kuih khate
yn luesah tua. Minmin hanlan
na ccakhungpya hae paw khate
mih vueso sah;
mih ccaaw hae tuh
a zaw hae laelan hoi hae sah;
mih mintaw hae,
mih mintasin hae hanlan mah
ccangkhakheit nungsya hae sah.
15 Kae nynh tuh na mae kha
dingnaw kya ka muih cih;
he ka thaekuh te, na muinsan kha
muihte ka lungccing cih.