SAM 16
Pachia Doliakunaw Hlaw
David Hlaw
Pou Pachia, na kya ka reku keiccuze
yn thungkhawtua.
“Nang tuh ka Bawipaw nynh na thua;
Namaw kyate holeite hoynaw ka hoi khyh,”
cite Bawipaw kha ka hopya.
Ram kya umpaw athyaapaw
ccungccaw hae tuh a sung-e hae,
minmin kyakhe ka lungrythua.
Ccangpaw pachia a pokuh hae paw tuh
mih tungvaw kya ngaethyanaw patae
a thuanuasaku hae.
Minmin kya-e niapaw silawnawpaw
chii kha ka pyapah lan khyh hae,
mih pachia hae min kha ka ko lan khyh.
Bawipaw tuh ka pokupaw
ka hanpaw te ka rho nynh thua;
ka hiinnaw tuh na kuih kya nynh a um.
Ka hanlan ramri tuh
ahoypaw hmin kya nynh a um;
ahoypaw rho kha ka ccou vae.
Tuanaw yn pyapaw Bawipaw kha
the ka hoysah;
khuazi ccyh zemah ka thinlung nynh
raeringnaw yn pya.
Bawipaw tuh ka mitmaevaw kya
tyty a um;
aning tuh ka ranglang khe a um keiccuze
pawpaw nynh mah
yn piasah kho lan khyh.Ref 16.8-11: Loc 2.25-28
Tukeiccuze ka thinlung tuh a lungtua zah,
ka muisaw mah a lungpaw.
ka pyn mah khyndadyh lan ka um.
10 Pawccecize Michi khua kya
nae cciataw lan khyh zah,
na tungvaw a lungzipaw tuh
Hunghua lungkhu na nungsya lan khyh.Ref 16.10: Loc 13.35
11 Kae kha hiinnaw laanpi nae muihsah.
Na umnaw kya lungtuanaw ccing zah,
na ranglang kuih kya
hoysahnaw zungzae a um.