SAM 147
Jerusalem Do-oihnaw
Bawipaw kha thehoysah oh!
ah Pachia kalan thehoysahnaw
hlawsah tuh pawcih baban mou ahoy;
pawccecize aning tuh thawccinaw a hoi,
hlaw te thehoysah lan
a ngaekuhpaw nynh thua.
Bawipaw nynh Jerusalem kha sak zah,
a dee hae paw Israel hae kha
a suelua hae.
Thinlung koi hae paw kha
dansah hae zah,
mih vaemaw kha a heepya hae.
Awsi accanlu kha ria zah,
mih balyn te min a phu hae.
Ah Bawipaw tuh lesae zah
a huhan myarya ale;
a hawnaw tuh tou kho um khyh.
Bawipaw nynh zakaw
a sangsakuhpaw kha
a hangthung hae;
ccungccaw hoylei hae paw kha
laephi kalan a vua hae.
Bawipaw kalan
lungtuanaw hlawsah oh;
ah Pachia kalan tintang khuakute
roi hoypaw saw oh.
Vaawlui kha maeking te bong zah,
laephi hanlan khuaa a rawsah,
mua hae kya lonua a posah.
Aning nynh sarangpaw hae kha
looh pya hae zah,
va-aw taw hae nynh
a sia hae ze looh a pya hae.
10 Marang hae thawzung kyakhe
a lungrythua khyh zah,
rangtareih lan a ccue hae paw kya mah
a lungrythua khyh;
11 thuasalama Bawipaw tuh
amaw rawrih hae paw te
atynpaw a sungsahnaw kha
a ngaehoikuh hae paw
kyakhe nynh a lungrythua.
12 Pou Jerusalem,
Bawipaw kha thehoysah!
Pou Zion, na Pachia kha thehoysah!
13 Pawccecize aning nynh
na koikua ccong kha tynsah zah;
na lungkhu e na ccaaw hae kha
hythua a pya hae.
14 Na ramri lungkhu kya
daenaw umsah zah,
ahoy huaccepaw chanvuih te
nang kha na vue ae sosah.
15 Aning nynh laephi kha
kawpya zah,
a bya tuh arangte yn thua.
16 Vuiraw kha tuuming alo lante
a ccawsah; dangtui kha mah
buhhaw alo lante a hei.
17 Hya kha lungpyng hawte a ccawsah,
a kyaasahnaw kyakhe
hum nynh mou a thadyn kho cih?
18 Aning nynh kawpya zah
tuh-e hya hae tuh atui hae;
a khisan kha zawsah zah tui alua.
19 A bya kha Jakob kya a hopya,
a phungbya te a phungzae kha
Israel hae kya a hopya hae.
20 Minphuin ccangpaw hae kya
tuhcite cyih khyh;
minmin nynh a phungzae kha
nyh khyh hae.
Bawipaw kha thehoysah oh!