SAM 146
Pachia Bawmnaw Thehoysah
Bawipaw kha thehoysah oh!
Pou ka muisaw,
Bawipaw kha thehoysah!
Ka hiin lungkhu balyn
Bawipaw kha the ka hoysah cih;
Ka hiin lungkhu balyn
ka Pachia thehoysahnaw
hlaw kha ka sah cih.
Bawi hae te ccungccaw hae kha
doliakuh nan oh,
minmin kya bawmnaw um khyh.
Mih hy he athang te,
laephi kalan a ki hae;
tuh-e nin ccaccei khe
mih paccynkunaw tuh aroh.
Jakob Pachia kha
bawmtu lang a hoi hae paw,
Bawipaw mih Pachia kha
a ngaehoikuh hae paw tuh
lungtua hae paw nynh thua,
tuh-e Pachia tuh vaaw te lae,
rili te tuh-e hae kya
a umpaw balyn kha a raetu thua zah,
zungzae a lungzipaw nynh thua,Ref 146.6: Loc 4.24, 14.15
aning tuh tuaasahkunaw
a ing hae paw hanlan
dingnaw a raepaw nynh thua;
mih vuelaw hae paw kha
looh a pya hae.
Bawipaw nynh thongccah
hae paw kha a luesah hae;
Bawipaw nynh mitmoh hae kha
ngaw a muihsah hae.
a nyaasah hae paw kha a hangthung hae;
Bawipaw nynh miding hae kha
a sungsah hae.
Bawipaw nynh mikhia hae kha a rin hae;
ngawraw hae te nomae hae kha a bawm hae,
thuasalama ccungccaw hoylei hae
laanpi kha a ropya hae.
10 Pou Zion, na Pachia athuapaw
Bawipaw nynh zungzae a uk cih,
Bawipaw kha thehoysah oh!