SAM 145
Pachia Lesaenaw te Hoynawnote145 Abyalu: David nynh the a hoysahnawpaw hlaw
1 Ka Pachia te ka Siapharan,
nang kha kae thehoysah,
na min kha zungzae te zungzae cia
kae thehoysah cih.
2 Nin takyh kae thehoysah cih zah,
na min kha zungzae te zungzae cia
kae thehoysah cih.
3 Bawipaw tuh lesae zah,
myaryamaw thehoysah lanpaw nynh thua;
a lesaenaw tuh marya ny kho um khyh.
4 Na ryalaw hae kha
she kheit koute she kheit
a thehoysah cih hae zah,
ngaeangthua lan umpaw
na cyipaw kha a siakhae cih hae.
5 Na phu-e lesaenaw te
ngaeangthua lan umpaw
na ryalaw hae kha
hoyte ka tua cih.
6 Ri lan umpaw na cyipaw huhan kha
a siakhae cih hae zah,
na lesaenaw kong kha
ka hopah cih hae.
7 Myarya lepaw na hoynaw kong kha
a ho cih hae zah,
na dingnaw kong kha
myarya ccae lan hlaw te
a sah cih hae.
8 Bawipaw tuh thawccih thyapaw,
ngaethyaumsah thyapaw,
a lungsaepaw thua zah,
atynpaw sungsahnaw te
phe beihpaw nynh thua.
9 Bawipaw tuh
ccungccaw hae balyn tungvaw hoy zah,
a raepaw balyn tungvaw kya
thawccinaw a hoi.
10 Pou Bawipaw , na raepaw balyn nynh
nang kha ae thehoysah cih hae zah,
alungzipaw na ccungccaw hae balyn nynh
ae thehoysah cih hae.
11 Minmin nynh na peenaw a phu-enaw te
na huhan kong kha a ho cih hae,
12 tetuh ccungccaw hae balyn nynh
ngaeangthua lan umpaw na cyipaw te
na peenaw huhan
aphu-epaw kha a nyh cih hae.
13 Na peenaw tuh zungzae tynpaw
peenaw thua zah,
na uknaw tuh she takyh atyn.
Bawipaw tuh a hopaw
bya balyn kya a lungzi zah,
a cyipaw balyn kya thawccinaw a hoi.
14 Bawipaw nynh
a khuliakuh hae paw balyn kha
bawm hae zah, a nyaasah hae paw balyn kha
a hangthung hae.
15 Ahiinpaw ahysuepaw balyn nynh
ngaehoinaw te nang kha ae do hae zah,
accyh azaw te mih looh kha na pya hae.
16 Na kuih kha na daw zah,
ahiinpaw ahysuepaw miakaw
mih rynaw kha na ccingsahpya hae.
17 Bawipaw tuh a ryalaw miakaw kya
adingpaw thua zah,
a cyipaw balyn kya thawccinaw a hoi.
18 Bawipaw tuh amaw a ko hae paw balyn,
byaccing te a ko hae paw
balyn pe khe a um.
19 Amaw raw a rih hae paw balyn rynaw kha
a ccingsahpya hae;
mih siaruanaw kha mah
thaepah hae zah a khum hae.
20 Bawipaw nynh amaw
a sungsah hae paw balyn kha a rin hae,
thuasalama ccungccaw hoy leipaw
balyn kha a ro hae.
21 Ka khalang nynh Bawipaw
thehoysahnaw bya kha a ho cih zah,
ccungccaw hae balyn nynh
a min thyaapaw kha
zungzae te zungzae cia
a thehoysah cih hae.