SAM 143
Luenaw hanlan Sawsangnaw
David Hlaw
1 Pou Bawipaw , ka sawsangnaw hynh
yn thaepah lah, na lungzi keiccuze
kae ngianaw hynh beih yn ngaepya tua;
na dingnaw liate beih yn leihtua.
2 Na ryalahtupaw kae hynh bya yn pia nan,
pawccecize ahiinpaw hum sanmah
na malang adingpaw um khyh.Ref 143.2: Rom 3.20; Gal 2.16
3 Rhaw nynh kae kha deehuite
ka hiinnaw kha laephi kya yn roh zah,
langmawlya a chih vae hae paw hawte
mohnaw kya yn nung.
4 Tukeiccuze ka muisaw tuh
ka lungkhu kya a lungthawzya;
ka thinlung tuh
ka lungkhu kya a siikuh.
5 Alia vae paw ccyh kha ka liathui,
na cyipaw balyn kha ka tua zah,
na kuih te na cyipaw kha
hoyte ka tua.
6 Na kalan ka kuih kha ka dyng;
ramrou hawte ka muisaw nynh
nang kha tui lang ae haw.
7 Pou Bawipaw , arangte beih yn leihtua,
ka lungroh vae.
Na mitmae yn retawkuh nan,
tuhkhyhze tuh Hunghuapi lungkhu lang
a rungbung hae paw hawte
ka thua vae cih.
8 Nang kha kae doliaku keiccuze
atynpaw na sungsahnaw roi kha
awkhua ccyh kya beih yn thaesah.
ka sawsangnaw tuh namaw kalan
a kaethung keiccuze
ka zui lanpaw laanpi kha
yn ccangpya tua.
9 Pou Bawipaw , ka rhaw hae kyate
beih yn khumtua;
khyn khylan na kalan kae ccue vae.
10 Nang tuh ka Pachia na thua keiccuze
na rypaw kha cyi lan
yn ccangpya tua.
Na muisaw hoypaw nynh
laan dingpaw kya
yn cciakhae vae sah.
11 Pou Bawipaw , na min hanlan
ka hiinnaw hynh yn khynsah tua.
Na dingnaw liate vawsawnaw kyate
poh yn thuaatua.
12 Atynpaw na sungsahnaw liate
ka rhaw hae kha na theih hae zah,
kae yn rawse hae paw balyn kha na ro hae,
pawccecize kae tuh
na ryalahtu nynh ka thua.