SAM 135
Pachia Hoynaw Thehoysahnaw
1 Bawipaw kha thehoysah oh!
Pou Bawipaw ryalahtu hae,
Bawipaw min kha thehoysah oh;
2 Bawipaw inn kya a thadyn hae paw,
ah Pachia inn voidu lungkhu kya
ryalah hae paw nanning,
amaw kha thehoysah oh.
3 Bawipaw kha thehoysah oh,
pawccecize Bawipaw tuh ahoy;
aning tuh thawccih thyapaw athua keiccuze
a min thehoysahnaw hlaw kha sah oh.
4 Pawccecize Bawipaw nynh Jakob kha
amaw hanlan pokuh zah,
Israel kha amaw elang a poku vae.
5 Bawipaw tuh a lesaepaw nynh
thua cipaw ka ny;
ah Bawipaw tuh ccangpaw
pachia balyn laeze a lesaehua.
6 Vaaw te lae kya thuasah,
rili te akhunaw balyn kya thuasah
Bawipaw nynh a rypaw miakaw kha a cyi.
7 Laephi adianaw kyate
maeking kha a pousah thung;
khuaaraw nawlan khozaw kha a rae;
a ccakhungnaw inn kyate
khivae kha a pousah.
8 Izip ram e ccatawccaw te
thanty kha a chia hae.
9 Pou Izip, na ngaelung a umpaw
Faro te a ryalahtu hae balyn kha rawsete
muihsahnaw te ngaeangnaw kha
aning nynh a rae.
10 Minphuin patae te athungpaw
siapharan hae kha a chia hae,
11 Amor hae siapharan Sihon,
Bashan hae siapharan Og te
Kanaan peenaw kya-e hae balyn kha
theih hae zah,
12 mih ram kha a ccungccaw
Israel hae kalan rho lang a pya hae.
13 Pou Bawipaw , na min tuh zungzae atyn,
Pou Bawipaw , na minthaannaw tuh
she takyh atyn.
14 Pawccecize Bawipaw nynh
a ccungccaw hae kha
pankhaete bya a piapah cih hae zah,
a see hae kha ngaethya a umsah cih hae.
15 Minphuin ccangpaw hae kya-e
zohtuh hae tuh ccungccaw kuih te raepaw
sui te ngun nynh thua hae.Ref 135.15-18: Sam 115.4-8; Bya 9.20
16 Tuh-e zohtuh hae tuh khalang
a hoi hae zemah byaho khyh hae;
mit a hoi hae zemah ngawmuih khyh hae;
17 nakaring a hoi hae zemah
nawthae khyh hae,
mih khalang kya hy um khyh.
18 Zohtuh a raetu hae paw te
zohtuh a doliakuh hae paw balyn tuh
zohtuh hae hawmawte athua cih hae.
19 Pou Israel ccungccaw hae,
Bawipaw kha thehoysah oh!
Pou Aaron ciihan hae, Bawipaw kha
thehoysah oh!
20 Pou Levi ciihan hae,
Bawipaw kha thehoysah oh!
Bawipaw rawrih hae paw nanning,
Bawipaw kha thehoysah oh!
21 Jerusalem kya umpaw Bawipaw kha
Zion kyate thehoysah oh.
Bawipaw kha thehoysah oh!