SAM 12
Bawmnaw Ngianaw
David Hlaw
1 Pou Bawipaw , beih yn bawmtua,
pawccecize ccungccaw hoypaw
um vae khyh;
ccungccaw hae kya a lungzipaw
phe zo vae hae.
2 Lu kheit te lu kheit hynbya a hoku hae;
nawpalipaw mung te
thinlung apheipaw kha hoite bya a ho hae.
3 Nawpalipaw mung,
myarya apookuhpaw lae,
4 “Ah lae te ah tae cih oh;
ah mung tuh ahmaw kya-e nynh thua,
aening bawipaw tuh hummou?” cite
a ho hae paw kha
Bawipaw nynh vua hae sah.
5 Bawipaw nynh, “Ryachi hae nynh
tuaasahnaw teing hae zah,
riathae hae paw nynh
a hawkhaeku hae keiccuze,
atu kae thokuh cih.
Minmin nynh a ry hae paw
khynnaw kyakhe minmin kha
ka nung cih hae,” a ci.
6 Bawipaw byakinpyakunaw tuh
athyaapaw byakinpyakunaw thua zah,
sosuhnawpaw maee kya
vae sari cia soliate thyaasah athuapaw
ngunphua te nynh aloku.
7 Pou Bawipaw , nang nynh
kaening kha nae thungkhaw cih;
e minphuin kyate kaening hynh
zungzae nae rin cih.
8 Ccungccaw hae kyaze hoyleinaw kha
hothung athua lyakhe,
ccungccaw hoylei hae paw tuh
pawpaw kya miakaw a khiavuikuh hae.