SAM 112
Miding hae Hythuanaw
1 Bawipaw kha thehoysah oh!
Bawipaw raw a rih hae paw te
a kawbya kya myaryamaw
mih lungrythua hae paw tuh
lungtua hae paw nynh thua.
2 Mih ciihan hae tuh ram lungkhu kya
mih thawsaepaw athua cih hae;
miding hae ciihan tuh
hythuapya athua cih hae.
3 Mih inn kya sisua te
hoirumnaw um zah,
mih dingnaw tuh zungzae atyn.
4 Miding hae hanlan mohnaw kya
awnaw hawte a langkuh hae;
minmin tuh thawccih thyapaw,
ngaethyaumsah thyapaw te
adingpaw nynh thua hae.
5 Ming hae kha hysahte
koiisakuh hae zah,
hmerarih lante rya a lahpaw tuh
hoynaw a mue cih.
6 Miding hae tuh tyty atyn cih hae;
minmin kha zungzae
liathui athua cih hae.
7 Thethyapaw thae kha rih khyh hae;
mih thinlung tuh tyn zah,
Bawipaw kya a khyn hae.
8 Mih thinlung tuh tyn zah
rih lan khyh hae;
athangnaw kya tuh mih rhaw hae tungvaw
taenaw a mue cih hae.
9 Minmin nynh alakawte a nee vae hae,
ryachi hae kha a pya vae hae;
mih dingnaw tuh zungzae atyn,
mih huhan athuapaw mih ki kha
sawtuanaw te hangthung athua.Ref 112.9: 2Ko 9.9
10 Ccungccaw hoylei hae paw nynh
tuh-e tuh muih hae zah mih thinria;
mih hawzy hae zah,
mih ngethyakhaekuh;
ccungccaw hoylei hae paw rynaw tuh
accakaepaw lang nynh a tang.