SAM 108
Taenaw hanlan Sawsangnaw
(Sam 57.7-11; 60.5-12)
David Hlaw
1 Ka thinlung tuh atyn, pou Pachia,
ka thinlung tuh atyn,
hlaw ka sah cih zah kae thehoysah cih.
Ka muisaw, thoku tua!
2 Pou tintang te phyly, tho oh!
Kae mah awkhua takaw te ka tho cih.
3 Pou Bawipaw , ccungccaw hae laku
na kalan lungtuabya ka ho cih zah,
minphuin hae laku namaw kalan
thehoysahnaw hlaw ka sah cih.
4 Pawccecize na sungsahnaw atynpaw tuh
vaawlui laeze hanghua zah,
na lungzinaw nynh maeking phe aphya.
5 Pou Pachia, vaawlui luki lang cia
hangthung na thua sah lah,
na phu-enaw nynh laephipi pong bong sah.
6 Na sungsah hae paw kha
luesah athua ccaw hae,
na ranglang kuih te
taenaw yn pya lah, yn leihtua.
7 Pachia nynh a beikinnthyaa kya
byakinpakuh hae zah,
“Shekhem kha lungtuate thoh ka phia cih,
te Sukkoth Bialae kha ka nee cih hae.
8 Gilead tuh ka kya-e nynh thua,
Manasseh mah ka kya-e nynh thua;
Efraim tuh ka sivawlukhung thua zah,
Judah tuh ka bawi hoitang nynh thua.
9 Moab tuh tui ka singkunawpaw
ka tuikua nynh thua;
Edom tuh ka ccukoh ka synaw nynh thua;
Filistin kha ka tae zah ka sia,” a ci.
10 Hum nynh mou kae kha
koihkhawpaw khuapi lungkhu lang
yn teekhae cih?
Hum nynh mou kae kha
Edom lang yn cciakhae cih?
11 Pou Pachia, kaening kha
phe nae vua vae khaw?
Pou Pachia, kae rhawkaw hae ryte
na cceihkheih oh khaw?
12 Kae rhaw hae kha
rawsete kaening hynh
bawmnaw beih oun pya,
pawccecize ccungccaw bawmnaw tuh
ccungkia khyh.
13 Pachia liate rawthungte kae cyih cih;
kae rhaw hae kha a syde cih paw tuh
amaw nynh thua.