SAM 104
Raetu Pachia Thehoysahnaw
Pou ka muisaw, Bawipaw kha
thehoysah tua.
Pou Bawipaw ka Pachia,
nang tuh myarya na lesae.
Sawtuanaw te lesaenaw khate
na ccaankuh zah,
awnaw kha boeining hawte na zingku.
Vaawlui kha boeibu hawte
tharae na daw zah,
avawlan umpaw tui vawlan khe
na inn kha na sak;
maeking kha na marangle lang na mang zah,
khivae sake vawlan khe na cciku,
khivae kha na locceihtu lang na mang zah,
maee te maeesoi kha
na ryalahtu lang na mang hae.Ref 104.4: Heb 1.7
Laephi tuh kharouh a nueku khyh ccaw cite,
a umnaw kyakhe na tynsah.
Laephi kha boeining te
bong hawte rili te na bong;
tui hae tuh mua hae luki khe a thadyn hae.
Nang nynh tui hae tuh
na pe hae zah a ccue hae;
na kholungthyhpaw roi kha
thae hae zah rangsakute a cceih hae.
Mua vawlan te bialae langkhe
luabung hae zah, minmin elang
na paccynpya hae paw hmin kya a thua hae.
Tui hae nynh laephi kha
bua a vu khyh ccaw hae cite,
po alua kho lei lante ramri kha na ia.
10 Accya khe tuidy kha na phyhsah zah,
mua hae laku khe alua hae,
11 loramsaw miakaw kha
nia lanpaw tui na pya hae;
ramkaw e lann hae kha
mih tuihaw na kesah vae hae.
12 Tuh-e tui kin khe vaawlang e
pavaw hae tuh bu luakuh hae zah,
thingkaran hae kya hlawsah hae.
13 Vaawlui kyate mua hae kha tui na bu hae;
laephi tuh na ryalaw athae khate a lungryachih.
14 Sahiin hae elang lonua kha na posah zah,
ccungccaw hae nynh mang khylan
thingku kha na posah,
te laephi kyate looh tuh apou,
15 misutui nynh ccungccaw kha
a lungtuasah zah,
chitui nynh mitmae kha a awsah,
te sanlou nynh ccungccaw thaw a saesah.
16 Bawipaw thingku hae,
Lebanon kya a lingpaw sidar ku hae kha
tui patae a bu hae.
17 Tuh-e thingku hae kyakhe
pavaw hae nynh mih bu a luaku hae;
kaepaw-pavaw nynh
maeccaw ku kya a luaku.
18 Ahangpaw mua hae tuh
sathaw hae hanlan thua zah,
lung pipi hae tuh saveih dihpaw hae hanlan
khynnaw nynh thua hae.
19 Kumvaelori ny nawlan
sawpaw kha na rae vae;
khuanin nynh a ccaw ccyh kha a nyku.
20 Mohnaw kha na rae,
tuh-e tuh khuazi nynh thua,
tuh ccyh lyakhe ramkaw e
sarangpaw balyn tuh a pou hae.
21 Anopaw chindeih hae tuh
saw teiku khylan a sia hae,
Pachia kya-e mih looh kha a ccungku hae.
22 Khuanin he athua te, ki hae zah
mih karung kya a ih hae.
23 Ccungccaw hae tuh
mih ryalawku khylan pou hae zah,
zete cia rya a lah hae.
24 Pou Bawipaw , na rae hae paw hynh
pawcih baban mou alung!
tuh-e hae balyn kha hawnaw te na rae vae;
laephi tuh na raepaw te phe abeih.
25 Rilipi tuh myarya le zah ako,
tuin kyakhe riatae
um leipaw avawthya hae paw,
ahiinpaw adih ale a um hae.
26 Tuin kyakhe sanphalung hae tuh
ccue hae zah,
tuin kya a zue lante na raepaw
Leviathan hupi mah a um.Ref 104.26: Job 41.1; Sam 74.14; Isa 27.1
27 Tuh-e hae balyn nynh accyh azaw te,
mih looh mueku khylan
nang kha ae ngaehoi hae;
28 looh kha he na pya hae te,
minmin nynh a ccakhungku hae;
na kuih he na daw te,
minmin tuh ahoypaw
uccaw te phe a byn hae.
29 Na mitmae he na retawkuh hae te,
minmin tuh mih thinphang;
mih hy he na thangsah hae te, chih hae zah
mih laenoi kalan a ki hae.
30 Na muisaw kha he na sawpah hae te,
minmin tuh a hiin hae;
te laephi mitmae kha na thawsah thui.
31 Bawipaw phu-enaw tuh
zungzae tyn vae sah;
Bawipaw tuh a raepaw kya
a lungtua vae sah—
32 laephi kha do zah laephi tuh a thyngkuh,
mua hae kha ty zah maeekhuh a pou.
33 Ka hiin lungkhu balyn
Bawipaw kalan hlaw ka sah cih;
hiinnaw ka hoi lyakhe ka Pachia kalan
thehoysahnaw hlaw ka sah cih.
34 Kae tuh Bawipaw kya
ka lungtua keiccuze
aning tuh ka tuanaw kya
a lungrythua vae sah.
35 Misei hae tuh laephi kyate
maemih thua hae sah lah,
ccungccaw hoylei hae paw tuh
um nan vae hae sah.
Pou ka muisaw, Bawipaw kha
thehoysah tua.
Bawipaw kha thehoysah!