SAM
The Psalms
Sam ccauh hynh Baebu lungkhu e hlaw ccauh te sawsangnaw ccauh nynh thua. Kum patae kya-e hlawphuatu hae te ccawzeitu hae nynh a phua hae paw nynh thua; e hlaw hae te sawsangnaw hae hynh Israel hae nynh suelua hae zah mih Pachia beiknaw kya a mang hae, nyathyakou tuh mih Ccathyaa kya a pybia hae.
E beiknaw hlaw hynh aphuin patae a um: Pachia beiknaw te thehoysahnaw hlaw, bawmnaw, thungkhawnaw te khumnaw mue nawlan sawsangnaw, seingaethyanaw ngiakunaw, Pachia hythuanaw hanlan thehoysahnaw hlaw, rhaw tae nawlan sawsangnaw cite a um hae. E sawsangnaw hae hynh minphuin sawsangnaw te pyn raveih sawsangnaw nynh athua hae; e sawsangnaw abang hynh ccungccaw lu kheit nynh a thinlung akhu huanaw kya-e bya kha langsah zah, abang tuh Pachia ccungccaw hae balyn nynh a hobounaw hae te mih thinlung langsakunaw nynh thua.
Sam hynh Jesu nynh mah mang zah Byakin Thaw a zeitu hae nynh mah a mang hae. Khriccaawbuu athotakaw lya mawte asung-epaw beiknaw ccauh nynh thua.
SAM 1
Uk 1
David Hlaw
Laanpi Ccangning
Ccungccaw hoylei hae paw nynh
tuanaw pyapaw kha lawku leite,
misei hae laanpi kha mah zui leite,
sarisarya acihthya hae paw
mih umnaw kya mah
a haungbua leipaw,
Bawipaw kawbya kyakhe
a lungrythua zah,
tuh-e kawbya kha khuazi khuadae
a tuapaw tuh lungtuapaw nynh thua.
Aning tuh vawkhu pe linpaw,
amaw accyh kya athae thae zah,
anaw anaan leipaw
thingku te nynh aloku.
A cyipaw balyn kya
a laan a sui a ua cih.Ref 1.3: Jer 17.8
Ccungccaw hoylei hae paw tuh
tuhte thua khyh,
khisan nynh a mungpaw
vaekang te nynh aloku hae.
Tukeiccuze ccungccaw hoylei
hae paw tuh byapianaw kya
thadyn lan khyh hae, misei hae tuh
miding hae pumkunaw kya
umbua lan khyh hae;
pawccecize Bawipaw nynh miding hae
laanpi kha a do-oihpya hae,
thuasalama ccungccaw hoylei
hae paw laanpi tuh aroh cih.