28
Ccungccaw hoyleipaw tuh
hum nynh san a dee khyh zemah
a ccue, thuasalama miding tuh
chindeih hawte a rawthung.
Ram kya doukunaw
he a um vae ze uktu patae a langkuh.
thuasalama ahawpaw
uktu liate ram tuh atyn.
Ryachi hae kha
a tuaa a sah hae paw uktu tuh
looh marya a rohpaw
khuaaratui te nynh aloku.
Upadi a zui leipaw nynh
ccungccaw hoyleipaw kha
the a hoysah, thuasalama
upadi a zuipaw nynh tuh
ccungccaw hoyleipaw kha a rawse.
Ccungccaw hoyleipaw nynh
byading kha thaethya khyh,
thuasalama Bawipaw
a ccung hae paw nynh tuh
byading kha phe ccing lan
a thaethya hae.
Dingnaw laanpi a zuipaw
ryachipaw tuh, a hoirum zemah
a thyaruhpaw laeze ahoyhua.
Phungbya a zuipaw tuh
ahawpaw ccaaw nynh thua,
a zu-ae hae paw ryte
a mungkuh hae paw tuh
a nung te a paaw kha
maethya a law hae.
Ato pataepi lawkute a hoirumnaw
a kaethung sakuhpaw tuh
ryachi hae kha thaw a ccihpaw
ccungccaw hanlan
a ccakhungpahpaw nynh thua.
Phungbya kha a ngae ry khyh zetuh,
a sawsangnaw kha mah
anungsikuhpaw nynh thua.
10 Miding hae kha ahoy leipaw
laanpi lang a cciakhaesei hae paw tuh
amaw nynh a thaepaw
hunghua lungkhu langkhe a ccah cih,
thuasalama ccaenaw um lei hae paw tuh
hoynaw kha rho lang a ccou cih hae.
11 Mihoipaw nynh tuh ka haw cite a tuaku,
thuasalama a nyhthyapaw
ryachipaw nynh tuh
tuh-e paw kha akaw-aleih a ny.
12 Miding hae nynh taenaw
a mue hae ze, myarya lepaw
phu-enaw a um, thuasalama
ccungccaw hoylei
hae paw nynh a hangku hae ze,
ccungccaw hae nynh a retawku hae.
13 A cyiseimenaw kha a pheipaw tuh
a laan a sui ua lan khyh,
thuasalama a seinaw kha phykuh zah
a vuapaw tuh thawccinaw a mue cih.
14 Bawipaw raw a rih
zungzaepaw tuh lungtuapaw nynh thua,
thuasalama a thinlung
a khungsakuhpaw tuh vawsawnaw
lungkhu lang a ccah cih.
15 Ryachi hae kha a uktupaw
bawi hoyleipaw tuh
a siapaw chindeih khyhze
a khiavuikuhpaw vong te nynh aloku.
16 Nythyanaw a hoi leipaw
uktu bawi tuh myaryamaw
are-aropaw nynh thua;
thuasalama ahme lei lante
muenaw kha a huapaw tuh
a hiinshe sae cih.
17 Ccungccaw hiinnaw kha
a tuaa a sahpaw tuh
hunghua lungkhu lang cia a ccue cih,
humhung nynh mah bawm nan sah.
18 Dingnaw laanpi a zuipaw tuh a khyn cih,
thuasalama ahme leipaw laanpi
a zuipaw tuh hunghua
lungkhu lang a ccah cih.
19 Loo a phokuhpaw tuh
looh patae a hoi cih,
thuasalama accakaepaw kha
a deehuipaw tuh a ryachi myarya ccih cih.
20 A lungzipaw ccungccaw tuh
hythuanaw patae a mue cih,
thuasalama arangte hoirum
a rypaw tuh detahnaw
mue leite um lan khyh.
21 Mirymihua tuanaw tuh hoy khyh—
tuhzemah ccungccaw tuh
sanlou phe kheit hanlan
hoyleinaw kha a rae kho.
22 A karankuhpaw tuh
hoirum khylan rangsakuh zah,
ryachinaw nynh
a thuanua lanpaw kha nyh khyh.
23 A lae te ccungccaw
a poothyapaw laeze,
a seinaw phypyate a pepaw
ccungccaw tuh nyalangte
maehoynaw kha houh a mue cih.
24 “Seinaw thua khyh,”
cite a nung khyhze a paaw kha
uccaw hankhakheit a luadepaw tuh
damiahpaw te a mungkuh
hae paw nynh thua.
25 A karankuhpaw nynh
pekunaw kha a puisah,
thuasalama Bawipaw
a doliakuhpaw tuh a hoirum cih.
26 Amaw tuanaw kha
a doliakuhpaw tuh
mingaee nynh thua;
thuasalama hawnaw laanpi
a zuipaw tuh a khyn cih.
27 Ryachi hae kha a pyapaw tuh
ahobounaw um lan khyh,
thuasalama a mit a masipaw tuh
thyalawnaw patae a mue cih.
28 Ccungccaw hoylei hae paw nynh
a hangku hae ze ccungccaw hae nynh
a retawku hae; thuasalama
minmin he a ro vae hae ze,
miding hae tuh a hangkuh thung hae.