15
Byanepaw nynh thinrianaw kha a daesah,
thuasalama bya repaw nynh tuh
thinrianaw kha a thuakhae.
Mihawpaw lae nynh
ahoypaw nynaw kha a kosah,
thuasalama mingaeepaw khalang nynh tuh
ngaeenaw bya kha a ho.
Bawipaw mit tuh
hmin takyh kya um zah,
ahoypaw te ahoy leipaw
ccungccaw hae kha tyty a do hae.
Byanepaw tuh
hiinnaw thingku nynh thua,
thuasalama byarepaw nynh tuh
thinlung a ccisah.
Mingaee nynh tuh
nungpaaw thuiheinaw kha
pawlangria khyh,
thuasalama thuiheinaw
a ngaepaw tuh
a hawpaw nynh thua.
Miding inn kya tuh
sisua patae a um,
thuasalama ccungccaw hoyleipaw nynh
a muepaw sisua tuh
vawsawnaw nynh phe a zosah.
Mihawpaw munglae nynh
nynaw kha a pazaesahku;
mingaee hae thinlung tuh
tuhcite thua khyh.
Ccungccaw hoylei hae paw
silawnaw tuh Bawipaw hanlan
anungsikuh.
Thuasalama miding hae
sawsangnaw kha tuh a lungrythua.
Ccungccaw hoyleipaw laanpi tuh
Bawipaw hanlan anungsikuh,
thuasalama dingnaw laanpi
a zui hae paw kha tuh
a sungsah hae.
10 Laanpi a meseipaw hanlan
accihpaw thuiheinaw a um,
thuasalama thuiheinaw kha
a huapaw tuh a chih cih.
11 Sheol te Abaddon ram tuh
Bawipaw malang
ccaerarih lan a lang hae,
tuh-e hae laeze
ccungccaw thinlung tuh
alangkuh hua.
12 Ccungccaw a saryapaw tuh
thuiheiku ry khyh;
mihaw hae kalan cceih boi khyh.
13 A lungtuapaw thinlung nynh
lungtuanaw mitmae kha a langsaku,
thuasalama ngaethyanaw
thinlung keiccuze lung aroh.
14 Mihawpaw thinlung nynh tuh
hawnaw kha a ccung,
thuasalama mingaee hae
khalang nynh tuh
ngaeenaw kha nynh a dangku hae.
15 Ryachi hae ninsaw balyn tuh
arupaw nynh thua,
thuasalama alungtuapaw thinlung tuh
zungzae tuapaw poi nynh thua.
16 Bawipaw rawrite
beihtaraw hoi tuh
sisua pataepi hoite thinphangte
um laeze ahoyhua.
17 Sungsahkunaw a umnaw kya
enaw-eho te zerya aepaw tuh
huakunaw a umnaw kya
athopaw vaetua saw te
aepaw laeze ahoyhua.
18 A thindynpaw nynh
pekunaw kha a puisah,
thuasalama a lungsaepaw nynh tuh
pekunaw kha a daesah.
19 Thawnawpaw laanpi tuh
hinpaw nynh pong a zithin,
thuasalama miding laanpi tuh
laanluepi nynh thua.
20 Ahawpaw ccaaw nynh
a paaw lung a tuasah,
thuasalama angaeepaw ccaaw nynh tuh
a nung kha a theihrya.
21 Tuanaw a hoi leipaw hanlan
ngaeenaw tuh lungtuanaw nynh thua,
thuasalama mihawpaw nynh tuh
ahmepaw kha a cyi.
22 Tuanaw pyakunaw a um leite tuh,
paccynkunaw aroh,
thuasalama tuanaw pyatu
alung zetuh paccynkunaw atyn.
23 Ccungccaw tuh
bya khungkupaw liate a lungtua,
ccyh dosete hopaw bya tuh
pawcih baban ahoy!
24 Mihawpaw nynh
a zuipaw hiinnaw laanpi tuh
akaw lang e michi khua kha
sibia khylan
ahangnaw langkhe nynh a ccia.
25 Bawipaw nynh alysakuhpaw kya-e
inn kha a phoupya,
thuasalama nomaenung
umnaw kha tuh a tynsah.
26 Ccungccaw hoyleipaw kya-e
tuanaw tuh Bawipaw elang
anungsikuhpaw nynh thua,
thuasalama athyaapaw
ccungccaw bya kha tuh a lungrythua.
27 Ahme leipaw muenaw elang
a karankuhpaw tuh a innbyn hanlan
vawsawnaw a thuakhae,
thuasalama pyaruh kha
a huapaw tuh a hiinshe sae cih.
28 Miding nynh tuh
pawtemou horu lan cipaw kha
a thinlung kya a tua,
thuasalama ccungccaw
hoyleipaw khalang nynh tuh
bya hoyleipaw kha ruarua a ho.
29 Bawipaw tuh
ccungccaw hoyleipaw kyate
asawkuh,
thuasalama miding hae
sawsangnaw kha a ngaepya hae.
30 Mit awnaw nynh
ccungccaw lungtuasah zah,
thehoypaw nynh ru kha
kintui te a biasah.
31 Ahoypaw thuiheinaw kha
hoyte a ngaepaw tuh
mihaw hae laku a umbua cih.
32 Thuiheinaw a ngae ry leipaw tuh
amaw toulou kha
pawlang a riakuh leipaw nynh thua,
thuasalama thuiheinaw
a ngaepaw tuh hawnaw a mue.
33 Bawipaw rawrinaw tuh
hawnaw te thuiheikupaw nynh thua,
sawtuanaw a um mawze
zakawsangsakunaw a umty.