12
Thuiheikunaw a rypaw tuh
hawnaw kha a ry,
thuasalama thuiheikunaw kha
a huapaw tuh mingaee nynh thua.
Ccungccaw hoypaw tuh
Bawipaw kyate
maehoynaw kha a mue,
thuasalama hoyleinaw
khua a khanpaw kha tuh de a tah.
Ccungccaw hynh hoyleinaw liate
khynkuh khyh,
thuasalama miding tharui tuh
nue kho thua khyh.
Ahoypaw zu tuh
a vawpaw bawilukhung nynh thua,
thuasalama maethyanaw
a thuakhaepaw zu tuh
a vawpaw ru kya-e
athuhpaw hawte nynh athua.
Miding hae paccynnaw tuh akyh;
ccungccaw hoylei hae paw nynh
tuanaw pyakupaw tuh
hynhupaw nynh thua.
Ccungccaw hoylei hae paw
bya nynh ccungccaw
chia khylan a buhkhaw,
thuasalama miding hae bya nynh tuh
minmin kha a khum hae.
Ccungccaw hoylei hae paw tuh
khuliakuh hae zah, phe a zo hae,
thuasalama miding hae inn tuh
tynkaring lan a thadyn cih.
Ccungccaw tuh hawnaw thyhte
thehoynaw ccou athua,
thuasalama a thinlung
hoyleipaw tuh a theihrya hae.
Aerua a hoi lei pite
amaw te amaw a hangsakuhpaw laeze
a dothatheih hae paw,
amaw te amaw rya
a lawkuhpaw tuh ahoyhua.
10 Miding nynh tuh
a sahiin-awvaw nynh
ahobounaw kha a nypya,
thuasalama ccungccaw
hoylei hae paw kya-e
thawccinaw tuh
rysawthyanaw nynh thua.
11 A laephi kya rya
a lawkuhpaw tuh looh patae a hoi,
thuasalama ccungkia leipaw ryalaw kya
ccyh a thangsah hanpaw tuh
mingaee nynh thua.
12 Ccungccaw hoylei hae paw nynh
a duaa hae paw tuh
hoyleinaw raepaw kha nynh thua,
thuasalama miding tharui nynh tuh
thae kha a thae.
13 Ccungccaw hoyleipaw tuh
a munglae seinaw keiccuze
kaang a kae,
thuasalama miding tuh
vawsawnaw kyate a lue.
14 Ccungccaw tuh khalang kya-e
thae liate ahoypaw
uccaw hae khate vueso lan a um,
ccungccaw tuh thawzung te
rya a law mee kha a mue cih.
15 Mingaee nynh tuh a cyipaw kha
akyh cite a tua,
thuasalama mihawpaw nynh tuh
tuanaw pyapaw kha a lawku.
16 Mingaee nynh tuh
a thinrianaw kha palou a langsaku,
thuasalama mihawpaw nynh tuh
maethyanaw kha a khawsung.
17 Byaccing a hopaw nynh tuh
ahmepaw ccaekia kha a khan,
thuasalama ahme leipaw
ccaekia nynh tuh hynbya kha a ho.
18 Tuase leite hopaw bya tuh
ccezung te thuingpaw te nynh aloku,
thuasalama mihawpaw bya nynh tuh
dannaw kha a thuakhae.
19 Zyn lan umpaw munglae tuh
zungzae atyn,
thuasalama ahynpaw munglae tuh
sosoh rou nynh atyn.
20 Hynbya tuh hoyleinaw
khua a khan hae paw
thinlung kya nynh a um,
thuasalama daenaw elang
tuanaw a pya hae paw tuh
lungtuanaw a hoi hae.
21 Miding hae tungvaw kya
vawsawnaw thua khyh,
thuasalama ccungccaw
hoylei hae paw tuh
vawsawnaw te abeih cih hae.
22 Ahynpaw munglae tuh
Bawipaw hanlan anungsikuh,
thuasalama lungzinaw
a hoi hae paw tungvaw kya
a lungrythua.
23 Mihawpaw tuh a hawnaw kha
a thuruh,
thuasalama mingaeepaw
thinlung nynh tuh
ngaeenaw kha a langsahku.
24 Ryalaw a zuakuhpaw
ccungccaw nynh a uk cih,
a thawnawpaw tuh
nangsekute ryalawnaw kya
nung athua cih.
25 Lungriathaenaw nynh
ccungccaw lung kha tuasah khyh,
thuasalama bya hoypaw nynh tuh
ccungccaw lung a tuasah.
26 Miding nynh tuh a ban hae kha
tuanaw hoypaw a pya hae,
thuasalama ccungccaw hoyleipaw
laanpi nynh tuh a cciakhaesei hae.
27 A thawnawpaw tuh saw dee zah
a kaw zemah rangkuh boi khyh,
thuasalama a zuakuhpaw tuh
aphutepaw sisua kha a mue.
28 Dingnaw laanpi kya hiinnaw a um,
tuh-e laanpi zuinaw kya
chinaw um khyh.