FILEMON
KALAN LOCCEIHTU PAUL CCAKY
Philemon
Filemon hynh doliakupaw Khriccaaw lu kheit thua zah, Onesimas ci hae paw a bawipaw ryte Kolose Khriccaawbuu lungkhu e nynh athua cih paw alo. Paul thong a ccaw lyaze a la tungkuh hae paw te a bawipaw kyate yn ccuepaw see nynh thua. Paul liate Onesimas tuh Khriccaaw lang yn tang. Filemon kalan Paul Ccaky hynh Filemon kalan Paul nynh bua a sawpaw a seepaw te ccawkuthuinaw ngia zah ngaethyapaw see kyalya lante thua leite Khriccaaw uno lu kheit lante a lehkhan nawlan a ngianawpaw ccaw nynh thua.
1
Beihlangnaw
1 Jesu Khri keiccu thong a ccahpaw Paul te kae unopaw Timote nynh kae sungsahpaw te rya kae lahkheihpaw Filemon kalan,
2 kae sungsahpaw Apfia te rhawkaw kae tangkheihpaw Arkhippas kalan te na inn kya a pumkuh hae paw khriccaawbuu kalan ccaw kae ky oh.Ref 2: Kol 4.17
3 Ah Paaw Pachia te Bawipaw Jesu Khri kya-e thawccinaw te daenaw tuh nae kya la um sah.
Filemon Ozia
4 Ka sawsangnaw kya nang kha kae lia takyhte, ka Pachia kalan lungtuabya zungzae ka ho.
5 Pawccecize Bawipaw Jesu Khri na zynnaw te mithyaa hae balyn na sungsahnaw hae kha ka thae.
6 Khri hanlan aening kya umpaw ahoypaw uccaw miakaw kha nynaw liate na zynnaw na neethung hae paw tuh ccungkiapaw lang a tang nawlan saw kae sang.
7 Ka sungsahpaw ka neitaw, na hoipaw sungsakunaw nynh lungtuanaw te thawzung patae yn pya, pawccecize nang nynh mithyaa hae kha mih lung na tuasah hae.
Onesimas hanlan Ngiapyanaw
8 Tukeiccuze kawpya lan accanpaw kha Khri liate rawhoyte kae pya ngan zemah,
9 a kum mah tang vae zah atu lya Khri Jesu keiccu thong mah a ccahpaw kae, Paul nynh sungsakunaw keiccu ngiate kae ngia paleih.
10 Thong yn sawnaw hae kya ka saahkupaw ka ccapaw Onesimas hanlan nang kha kae ngia.Ref 10: Kol 4.9
11 Langmawlya aning tuh na hanlan ccungkia khyh, thuasalama atu tuh na hanlan te ka hanlan ccungkia vae,
12 amaw kha na kalan bua kae saw, tukeiccuze amaw kha leh la khan; tuh-e tuh kamaw ka thinlung kya-e nynh thua.
13 Thehoypaw keiccuze thong ka ccaw lungkhu aning nynh namaw ccelang rya yn lawpya nawlan amaw kha ka kya ka umsah rypaw nynh thua.
14 Thuasalama na nawccawpaw tuh nangse keiccu thua leite, lungthote na cyipaw kha ka ryhua, na nawccaw leite pawsang ka cyih ry khyh.
15 Aning nynh na kyate sosoh a la toikupaw tuh amaw kha zungzae na hoi nawlan athua khopaw nynh thua.
16 Atu tuh see lu kheit hawte thua vae leite, see lae ahang lante la ccou ccavae, abyapi lante kamaw hanlan sungsahpaw uno nynh athua vae; pynsaw lante thuasah, Bawipaw kya thuasah na hanlan pawcihmou houh sungsahpaw thua lan accan.
17 Tukeiccuze kae hynh ah mungkuhpaw lu kheit lante nae tua ze, amaw hynh kamaw hawte la ccou.
18 Na tungvaw a cyisei ze, tuhkhyhze hankhakheit laebah ae um ze, tuh-e tuh kae nynh laebah ka umpaw lante la tua.
19 Tuh-e laebah tuh kae pyaru cih cite hynh-e hynh kae, Paul nynh kamaw ka kuih te ka zeipaw nynh thua. Tuhzemah namaw na hiinnaw heize ka kya laebah na um cipaw kae hopah khyh.
20 Athua, ka neitaw, na kyate thanenaw kha Bawipaw kya mue ka ry, Bawipaw min te nang nynh ka lung yn tuasah.
21 Nang nynh kaw na la ngae cih cite zynkunaw ka hoi zah, e ccaw hynh na kalan kae zei, ka hopaw lae heize na la cyih cih cite ka zyn.
22 Ka thuanaw lanpaw hmin kha mah yn la paccynpah; pawccecize nae sawsangnaw liate nae kalan thuanaw kaw ka mue cih cite ka ngaehoi.
Nyathya Beihlangnaw
23 Khri Jesu kya kamaw ryte thong kae ccahkheihpaw Epafras nynh nang kha ae beihlang.Ref 23: Kol 1.7, 4.12
24 Kamaw ryte rya kae lahkheih hae paw Marka, Aristarkhas, Demas te Luka nynh ae beihlang hae.Ref 24: Loc 12.12, 25, 13.13, 15.37-39, 19.29, 27.2; Kol 4.10, 14; 2 Tim 4.10, 11
25 Ah Bawipaw Jesu Khri kya-e thawccinaw tuh nae muisaw kya la um vae sah. Amen.