3
Bawipaw Rungnaw Byakinpyakunaw
Sungsah hae paw, hynh-e vaeningnaw ccaky hynh atu nae kalan kae zei. Ccaky ccangning kyahin nanning kha bua nysah thui te athyaapaw nae thinlung kha kae thosah oh. Langmawlya athyaapaw profeh hae nynh a hoty hae paw bya te Bawipaw Khumtu nynh nae locceihtu hae kyate a hopaw kawbya kha na liathui nawlan oh nynh kae zei. Masaty na ny lan oh paw tuh: nyathyakou ccyh kya, mimaw ryduaanaw thyhte a hiin hae paw ccungccaw saryatu hae oun langkuh cih hae.Ref 3.3: Jud 18 Minmin nynh, “Amaw yn thuanaw lanpaw byakinpyakunaw tuh teimou a um? Pawccecize minpaaw hae a i ccyh hae kyate tho zah pawpaw balyn tuh raenaw athonaw kya hawmawte nynh atu mah po acyiku,” cite oun ho cih hae. Pawccecize langmawlya Pachia bya liate vaawlang tuh la um zah, laephi hynh mah tui kyate yn langkuh zah tui te raepaw nynh thua,Ref 3.5: Gen 1.6-9 tuh lyaze laephi tuh tui nynh khaleih vu zah phe aroh cipaw kha minmin nynh a ny hae zemah pawlangria khyh hae.Ref 3.6: Gen 7.11 Thuasalama atu a umpaw vaawlang te laephi hynh byapianaw nin te Pachia pawlangria leipaw ccungccaw hae ronaw nin kyacia maee te ro khylan tuh-e bya liate phang ccy athua.
Thuasalama sungsah hae, Bawipaw hanlan nin kheit tuh kum thong kheit hawte, kum thong kheit tuh nin kheit hawte athuapaw hynh-e uccaw ccangkheit hynh ning nan oh.Ref 3.8: Sam 90.4 Ccungccaw abang nynh a thysung cite a tua hae hawte, Bawipaw tuh byakinpyakunaw kong lante a thysung khyh. Lu kheit san ro leite ccungccaw balyn a ngaesiku nawlan hae a ry keiccu nynh aening kya a lungsae. 10 Thuasalama Bawipaw Nin tuh khuazi kya miruh a thua hawte nynh yn thua cih. Tuh-e Nin kya vaawlang tuh myarya ccaepaw siaruanaw khate azo cih, vaawlang a umpaw uccaw hae tuh maee nynh oun u cih hae zah marya oun roh cih. Laephi te a vawlan um hae paw mah phe athang cih hae.Ref 3.10: Mat 24.43; Luk 12.39; 1Th 5.2; Bya 16.15
11 E uccaw hae balyn tuh ro athua cih keiccuze athyaapaw hiinzia te Pachia rawrinaw kya pawcihawpaw ccungccaw lang mou thua lan na ccan oh? 12 Pachia Nin yn thua lanpaw kha na ngaw oh keiccuze tuh-e Nin tuh arangte yn thuasah nawlan hoyte zuakuh oh. Tuh-e nin kya vaawlang tuh maee te ro athua cih, vaawlang e uccaw hae kha maee nynh oun u cih hae. 13 Tuhzemah aening tuh bya oun kinpyaku thyhte dingnaw a umnaw vaaw thawpaw te laephi thawpaw kha nynh ah ngaw oh.Ref 3.13: Isa 65.17, 66.22; Bya 21.1
Nyathyakou Hyynaw te Athangnaw Sawsang
14 Tukeiccuze sungsah hae, tuh-e uccaw hae tuh na ngaw oh keiccuze athupaw um leite, ccaenaw hoi leite daenaw kya amaw nynh ae muih nawlan oh thawte zuakuh oh. 15 Aening ah sungsah oh paw, ah unopaw Paul nynh mah amaw kya pya athuapaw hawnaw thyhte nae kalan phe a zei vae hawte, ah Bawipaw kya-e ngaesangnaw tuh khumnaw nynh thua cipaw la nyh oh. 16 Aning nynh a ccaky hae balyn kya mah hynh-e uccaw hae kong hynh a la ho. A ccaky hae kya thaethya lan arupaw abang a um. Tuanaw a zya hae paw te thinlung atyn lei hae paw nynh ccangpaw Ccathyaa hae kha asuilan a mae hae hawte mimaw ronaw hanlan a maeku hae.
17 Tukeiccuze, sungsah hae paw nanning, hynh-e uccaw hae hynh na nyty vae oh hawte, ccungccaw hoylei hae kya-e cyiseinaw khate cciakhaesei na thua khyh nawlan oh, naemaw na tynnaw oh kyate na khuliaku khyh nawlan oh la raeringkuh oh. 18 Ah Bawipaw te Khumtu Jesu Khri a thawccinaw te amaw nynaw kyakhe lethung oh. Amaw kyakhe phu-enaw tuh atu te zungzae cia la um sah. Amen.