PETER
CCAKY KYNINGNAW
Peter
Peter Ccaky Kyningnaw hynh masaty Khriccaaw hae nynh ria lante kypaw nynh thua. A paccyn huapaw tuh ccangpahseitu hae nynh ccangpyapaw te tuh-e ccangpyanaw kyate aphi yn poupaw nopi pise seinaw dounaw kha nynh thua. Pachia te Jesu kha hmerarih te kyhrarih lante nynaw, te Jesu ccaccei kha mih mit te a muihtu hae te mih naw te a byahopaw a thaetu hae nynh a ho hae paw kha kyngkunaw lanpaw balyn hynh-e byalungnaw hae kya byakhungnaw kha muih athua. Ccawzeitu nynh Khri tuh oun rungthui vae lan khyh cite a hotu hae ccangpyanaw kha a zeinuathe ryhua. Khri yn rungthui loh leinawpaw tuh Pachia nynh, “ccungccaw lu kheit thachi sanmah ro lan ry khyh, mih seinaw kyate marya oun ngaesikuh hae sah,” ci oun ry keiccu nynh thua cite a ho.
1
Beihlangnaw
1 Jesu Khri seepaw te locceihtupaw kae, Simon Peter nynh ah Pachia te Khumtu Jesu Khri kya-e dingnaw liate kae zynnaw te alokuhpaw, aphutepaw zynnaw a hoi hae paw kalan ccaw kae ky oh.
2 Pachia te ah Bawipaw Jesu nynaw liate thawccinaw te daenaw tuh nae kya la lungthung sah.
3 A phu-enaw te a hoynaw kha ccoubua khylan aening oun kotupaw amaw kha nynaw liate, hiinnaw te Pachia rawrinaw te asekuhpaw uccaw balyn kha Pachia a thungnaw nynh aening oun pya vae.
4 Tuh-e phu-enaw te hoynaw liate aphutepaw te myarya alesaepaw byakinpyakunaw hae kha aening oun pya vae; tuh-e byakinpyakunaw liate nanning tuh chiisaw rynaw keiccu laephi kya a umpaw ronaw kyate na lue oh zah, Pachia thuanaw a neethungkuh bua hae paw na thua nawlan oh nynh thua.
5 Hynh-e keiccuze nae zynnaw kya hiinzia hoypaw kha thuasah, hiinzia hoynaw kya nynaw kha thuasah biachih lan zuakuh oh,
6 nynaw kya ahmaw sungku khonaw kha thuasah, ahmaw sungku khonaw kya ngaesangnaw kha thuasah, ngaesangnaw kya Pachia rawrinaw kha thuasah biachih oh.
7 Pachia rawrinaw kya uteno thawccikunaw kha biachih oh lah, uteno thawccikunaw kya sungsakunaw kha biachih oh.
8 Pawccecize hynh-e uccaw hae hynh nanning kya um zah alungthung lanze, tuh-e hae nynh ah Bawipaw Jesu Khri nynaw kya athae thaesah leite, thanenaw pya leite ae nung lan khyh oh.
9 Hynh-e uccaw hae ahoboupaw ccungccaw tuh a mitmoh zah asawnaw lang muih kho khyh; arynpaw seinaw kyate thyaasah ka thua vae cipaw kha phe a ning.
10 Tukeiccuze uteno hae, nanning konaw te ponaw kha tynsah khylan zuakuh paleih oh; pawccecize tuhte na cyi oh ze, na khuliakuh boi lan khyh oh.
11 Tuhcite nanning tuh ah Bawipaw te oun Khumtu Jesu Khri kya-e zungzae atynpaw peenaw lungkhu lang teenaw kaw kha phe ccing lan ae pya cih oh.
12 Tukeiccuze tuh-e uccaw hae tuh na nyh oh zah na kyngku oh paw byaccing kya na tyn vae oh zemah, nanning kha tuh-e uccaw hae kong zungzae liathuisah lan kae tuh ka paccynkuh.
13 Hynh-e pyn kya ka um lungkhu balyn, nanning kha tuhcite liathuisahte lungthosah lanpaw tuh ahmepaw nynh thua cite ka tua.
14 Ah Bawipaw Jesu Khri nynh kae kha yn muihsah vae hawte, hynh-e ka pyn tuh aro mawze ka cciataw cih cipaw ka ny.
15 Ka chih koute hynh-e uccaw hae hynh palei na liathui nawlan oh thawte ka zuakuh cih.
Khri Phu-enaw Muihtu hae
16 Pawccecize ah Bawipaw Jesu Khri a thungnaw te yn thuanaw kong kha nae kalan he kae hopya vae oh ze, thyaruhhahi lante rae huatawpaw phungpaw hae kha kae mang khyh, kaening tuh amaw a lesaenaw kong kha mit te a muih hae paw ccaekia hae nynh kae thua.
17 Pawccecize sawtuanaw te phu-enaw kha Paaw Pachia kyate aning nynh he a mue tuh, “E paw tuh ka sungsahpaw ka Ccapaw nynh thua, amaw kya ka lungrythua,” cite Alesaepaw Phu-enaw kyate amaw kalan roi yn thua.Ref 1.17-18: Mat 17.1-5; Mar 9.2-7; Luk 9.28-35
18 Vaawlang te yn thuapaw tuh-e roi tuh athyaapaw mua vawlan amaw ryte kae um lyakhe kae thae.
19 Tuhpiaze aening nynh houh ariapaw profeh hae bya kha mah ah hoi ung oh. Nae thinlung kya khua yn dae zah nizy yn langku makhia, tuh-e bya tuh mohnaw kya a awpaw awnaw hawkhate pekite na ngae oh aho.
20 Ccathyaa kya-e profehbya hynh lukhakheit nynh amaw a rynaw te asuilan a leihkupaw thua khyh cipaw hynh masaty nyh oh.
21 Pawccecize profehbya tuh ccungccaw rynaw thyhte yn thua boi khyh, Pachia kya-e athyaapaw ccungccaw hae tuh Thyaa Muisaw nynh a cciakhae hae thyhte nynh a ho hae.