5
Pachia Tuuphu Do-oihnaw
1 Pastor athua buapaw, Khri teingnaw hae kong ccaekia athuapaw te yn langkuh cih paw phu-enaw a neethungkuh buapaw mah athuapaw, kae nynh nanning laku e pastor hae kha thawte kae hyy oh:
2 Nae kya a umpaw Pachia tuuphu hae kha la do-oih oh. Nangsekunaw keiccu thua leite Pachia rynaw thyhte lungthote do-oih oh lah, anungsikuhpaw muenaw hanlan thua leite thawmuinte la do-oih oh.Ref 5.2: Joh 21.15-17
3 Do-oih lan cite nanning ae pya oh paw tuuphu hae kha uk te uk leite, minmin hanlan dosuinkupaw lang la tang oh.
4 Tuurintu Lupi he yn langkuh te, anaan kho leipaw phu-enaw bawilukhung kha na mue cih oh.
5 Tuhawte anohua hae paw nanning, atanghua hae paw kaw kha ngae oh. Nae balynte lu kheit te lu kheit zakawsangsakunaw khate ccaankuh oh; pawccecize,
“Pachia nynh a lysakuhpaw kha
rawse zah,
zakaw a sangsakuhpaw kha
thaw a cci.”Ref 5.5: Ptb 3.34 (LXX)
6 Tukeiccuze accyh he yn zaw te, nanning kha Pachia nynh ae hangthung nawlan oh, Pachia kya-e a thawsaepaw kuihkaw khe zakawsangsakuh oh.Ref 5.6: Mat 23.12; Luk 14.11, 18.14
7 Aning tuh nanning ae do-oih oh paw athua keiccuze nae thinphangnaw balyn kha amaw tungvaw khaleih nung oh.
8 Hawrarih lan um oh; raeringkute um oh; pawccecize nae rhawpaw Satan tuh a sia a ruapaw chindeih hawte hum vema ka laang cih cite ccungkute a khiakuh.
9 Laephi vaw e nae uno hae tuh tuhcihawpaw riathaenaw a teing hae cipaw kha nyh oh lah, nae zynnaw kya varyng tynte Satan kha la dou oh.
10 Khri Jesu liate zungzae tynpaw a phu-enaw kalan ae kotu oh paw, thawccinaw balyn a hoitupaw Pachia nynh sosoh na teing kou oh te, nanning kha ae ccingsah cih oh, ae thadynsah cih oh, thaw ae saesah cih oh zah ae tynsah cih oh.
11 Amaw kya thungnaw huhan tuh zungzae te zungzae cia um sah. Amen.
Nyathya Beihlangkunaw
12 Nanning kha hyy biate, hynh-e tuh Pachia kya-e ahmepaw thawccinaw nynh thua cipaw kha ccaekiakhante, Silas bawmnaw liate nae kalan ccaw dyntari kae zei. Silas tuh nae hanlan a lungzipaw uno cite ka tuapaw nynh thua; tuh-e thawccinaw kyakhe tynkaring lan thadyn oh.Ref 5.12: Loc 15.22, 40
13 Babilon khuapi kya umpaw, nanning ryte po na thuakheih oh paw khriccaawbuu nynh nanning kha ae beihlang oh; te ka ccapaw Marka nynh mah ae beihlang oh.Ref 5.13: Loc 12.12, 25, 13.13, 15.37-39; Kol 4.10; Phlm 24
14 Sungsakunaw kya-e myngkunaw khate lu kheit te lu kheit beihlangkuh oh.
Khri Jesu kya na um oh paw nae balyn tungvaw kya daenaw la um sah. Amen.