2
Ahiinpaw Lung te Athyaapaw Minphuin
1 Tukeiccuze ahoy leipaw balyn, hynpyakunaw balyn, thyaruhnaw, eiungnaw te thanhokunaw balyn kha ccaring vua oh;
2 ccirarihpaw muisaw samatei liate khumnaw kya na lethung nawlan oh, apuithawpaw imua hae hawte tuh-e samatei tuh peki oh,
3 pawccecize Bawipaw tuh thawccithyapaw nynh athua cipaw kha phe na taangtua vae oh.Ref 2.3: Sam 34.8
4 Ccungccaw hae nynh nawe hae salamah Pachia nynh a popaw, aphutepaw, ahiinpaw lung athuapaw Bawipaw kalan oun cceih oh.
5 Nanning mah ahiinpaw lung hae hawte muisaw lante sakpaw inn nynh na thua oh, Jesu Khri liate Pachia kalan douccahpaw, muisaw lante silawkunaw rae khylan athyaapaw ranpibawi nynh na thua oh.
6 Tukeiccuze Ccathyaa kya,
“Dotua oh, popaw lung, aphutepaw,
abyapi huapaw apaki lang e
lung kha Zion kya ka nung,
amaw a zynpaw ccungccaw tuh
maethya ccou vae lan khyh,” cite a um.Ref 2.6: Isa 28.16 (LXX)
7 Tukeiccuze aning tuh a zynpaw nanning hanlan aphutepaw nynh thua, thuasalama a zyn lei hae paw hanlan,
“Inn saktu hae nynh
a nawe hae paw lung tuh
apaki lang e abyapi huapaw
lung lang yn tang,”Ref 2.7: Sam 118.22
8 te
“Thykupawkunaw lung,
khuliakunaw lungpi,”
lang yn tang; bya kha a ngae khyh hae keiccuze athy-apawkuh hae; minmin tuh tuh-e hanlan paccynpaw nynh thua hae.Ref 2.8: Isa 8.14-15
9 Thuasalama nanning tuh mohnaw kyate ngaeang lan umpaw amaw kya-e awnaw lungkhu lang ae kotu oh paw a hoynaw kha siakhae khylan popaw ccungccaw, bawi phin ranpibawi ciihan, athyaapaw minphuin, Pachia ccungccaw nynh na thua oh.Ref 2.9: Exo 19.5-6; Isa 43.20, 21 (LXX); Deu 4.20, 7.6, 14.2; Tit 2.14; Isa 9.2
10 Langmawlya tuh
Pachia ccungccaw na la thua khyh oh,
thuasalama atu tuh
Pachia ccungccaw nynh
na thua vae oh.
Langmawlya ngaethyaumsahnaw
na la ccou khyh oh,
thuasalama atu tuh
ngaethyaumsahnaw
na ccou vae oh.Ref 2.10: Hos 2.23
Khriccaaw Hiinzia
11 Sungsah hae paw, ramccang hae te mikhia hae na thua oh keiccuze muisaw te rhawdoukuh hae paw chiisaw rynaw kha na sungku nawlan oh kae hyy oh.
12 Zenta hae nynh nanning kha ahoy leipaw ryalahtu hae hawte thethya he ae ho oh ze, minmin nynh a muih hae paw ahoypaw nae ryalaw hae liate Pachia yn thua nin kya Pachia kha a phu-esah nawlan hae, Zenta hae laku ahoypaw ozia khate la hiin oh.
13 Bawipaw maedote, ccungccaw hae nynh kawhoitu lang a khang hae paw miakaw kaw kha la ngae oh; ahang huapaw siapharan kaw kha ngae oh lah,
14 ahoy leipaw ryalahtu hae kha detah khylan te ahoypaw ryalahtu hae kha thehoysah khylan siapharan nynh a sawpaw uktu hae kaw kha mah la ngae oh.
15 Pawccecize ahoyte cyinaw liate angaeepaw ccungccaw hae ngaeenaw kha nanning nynh zya na daesah lan oh paw tuh Pachia rynaw nynh thua.
16 A luepaw hawte hiin oh, tuhzemah na luenaw oh paw kha ahoy leipaw khawsung nawlan mang leite, Pachia see hae hawte hiin oh.
17 Ccungccaw balyn kha sawtua oh. Nae uno hae kha sungsah oh. Pachia raw kha rih oh. Siapharan kha sawtua oh.
18 See hae, nae bawi nae zua hae kha myarya sawtuate kawngae oh. A thinlung hoypaw te nebaleihpaw bawizuaa kyalya thua leite, are-aropaw bawizuaa kha mah a kawngae oh.
19 Pawccecize ccungccaw lu kheit tuh atazae lei lante a teing lyakhe Pachia a ny keiccuze thinlungccinaw kha a ngaesang lanze, thehoysah lan accanpaw nynh thua.
20 Pawccecize na cyiseinaw oh keiccu ae zia ae bua oh paw kha lungsaete na ngaesang oh zeso thehoysah lanpaw pawmou a um? Thuasalama ahoypaw rya na lah oh zah tuh-e hanlan lungsaete na ngaesang oh ze, tuh-e tuh Pachia malang thehoysah lan accanpaw nynh thua.
21 Pawccecize tuh-e khylan nynh nanning tuh ko na thua oh. Khri nynh mah nanning hanlan teing zah, a ccunoh kha na zui ccaw oh cite dosuinku lanpaw ae cciatawpya sya oh.
22 “Aning tuh seinaw rae khyh;
a mung te hynbya ho boi khyh.”Ref 2.22: Isa 53.9
23 Amaw kha a sarya hae ze, aning nynh saryaru khyh hae; he a teing vae ze, aning nynh huraw khyh hae; hmerarih lan bya a piatupaw Pachia kha a doliaku.Ref 2.23: Isa 53.7
24 Aening tuh seinaw kya ah chih oh zah dingnaw kya ah hiin nawlan oh, Khri nynh aening seinaw balyn kha thing vawlan khe amaw a pyn kya oun phupya. A vaemaw hae liate na dan vae oh.Ref 2.24: Isa 53.5
25 Pawccecize nanning tuh laanpi a meseipaw tuu hae hawte nynh na la thua oh; thuasalama atu tuh Tuurintu te nae muisaw a Do-oihtu kalan phe na ki vae oh.Ref 2.25: Isa 53.6