PETER
CCAKY KYKHEITNAW
Peter
Peter Ccaky Kykheitnaw hynh Asia Minor thahlang ram kya hmin takyh lang phiakute a um hae paw Khriccaaw hae kha hynh-e ccauh kya, “Pachia popaw ccungccaw hae,” cite kopaw ccungccaw hae kalan kypaw nynh thua. E ccaky nynh a paccyn huapaw tuh mih zynnaw keiccuze vawsawnaw te runaw a teing hae paw ccawriatu hae kalan thawpyanawpaw nynh thua. Ccawzeitu nynh a ccawriatu hae kha Jesu Khri kong Thehoypaw, a chinaw, thoothuinaw te yn rung lanpaw ngaehoinaw hae kha liathuinawpaw nynh thua. Tuhcihawpaw tuanaw hoi biate vawsawnaw a teing hae paw tuh mih zynnaw atyn tou cipaw syntawtuanaw te “Jesu Khri yn thua Nin” kya minmin kha lasung pya athua cih hae cipaw kha mah a ho.
Vawsaw ccyh kya thawpyanawpaw kyalya thua leite Khri uccaw athuanaw hae paw langsakute a hiin kho nawlan hae kha ccawzeitu nynh a hyy hae.
1
Beihlangnaw
1 Jesu Khri kya-e locceihtu athuapaw Peter nynh Pontas, Galatia, Kappadosia, Asia, te Bithynia ram kya phiariphiarae um hae paw khuaccong hae paw kalan ccaw kae ky oh.
2 Jesu Khri kaw na ngae nawlan oh te a chiise te theipaw na thua nawlan oh, Muisaw liate thyaasah thua hae zah Paaw Pachia paccynnaw thyhte po hae paw: Thawccinaw te daenaw tuh nae kya la lungthung sah.
Ahiinpaw Ngaehoinaw
3 Pachia te ah Bawipaw Jesu Khri a Paaw tuh thehoyte um sah! Myarya lepaw a ngaethyaumsahnaw thyhte, Jesu Khri tuh chinaw kyate a thoothuinaw liate ahiinpaw ngaehoinaw kalan aening kha bua oun puisah vae.
4 Tuh-e tuh nanning hanlan vaawlang kya ccypya athuapaw arohthya leipaw, anungsikuh leipaw te anaanthya leipaw rho kha ccou khylan nynh thua.
5 Nanning tuh nyathyakou ccyh kya langsaku lan paccynpaw khumnaw hanlan Pachia kya-e thungnaw kyakhe zynnaw liate ccy na thua oh.
6 Nanning tuh atu lya syntawnaw aphuinphuin keiccu aho lanze sosoh nae ngaethya zemah, hynh-e kong kyahin nae lungpaw sah.
7 Tuhteze nynh maee te syntawtua athua zemah arohthyapaw sui laeze aphute huapaw ahmepaw nae zynnaw tuh Jesu Khri yn langku ccyh kya, thehoynaw, sawtuanaw te phu-enaw kha a ccou cih.
8 Amaw kha na muih lei oh pite na sungsah oh; atu amaw kha na muih khyh oh zemah na zyn oh; ho kho um leipaw te aphu-epaw lungtuapaw khate nae lungpaw.
9 Pawccecize Jesu Khri kya nae zynnaw nynh a paccynkupaw nae muisaw khumnaw kha na ccou oh.
10 Nanning nynh na ccou lan oh paw thawccinaw konglang a ho hae paw profeh hae nynh hynh-e khumnaw kong hynh la khia hae zah thawte la ccung hae.
11 Khri a teingnaw te tuh-e yn zui lanpaw phu-enaw kong kha minmin kya umpaw Khri Muisaw nynh ccaekia he a khanpah ty hae tuh, hummou a hothe ry, tuhkhyhze paw ccyh mou a hothe ry cipaw kha thawte a ccung hae.
12 Profeh hae nynh rya a law hae paw tuh mimaw hanlan thua leite, nanning hanlan nynh thua cipaw kha mih kalan phypya athua; vaawlang te saw athuapaw Thyaa Muisaw liate nae kalan thehoy bya a ho hae paw kha mangte, tuh-e uccaw hae tuh atu nanning kya hopya athua vae. Vaaw hae nynh tuh-e uccaw hae tuh riri do lan a ry hae.
Athyaapaw Hiinnaw
13 Tukeiccuze nae thinlung kha paccynkute um oh lah, hawrarih lan um oh; Jesu Khri he yn langkuh te nae kalan thuakhae athua cih paw thawccinaw kha athangnaw cia ngaehoi oh.
14 Na la ny khyh lya oh, langmawlya e pynsaw rynaw muinsan kha la ke nan vae oh, kawngaepaw ccaaw hae hawkhate um ccavae oh.
15 Nanning ae ko oh paw tuh athyaa hawte, nanning mah nae umtu ziazae balyn kya thyaa oh.
16 Pawccecize Ccathyaa kya, “Kae tuh ka thyaa keiccu, nanning mah thyaa oh,” cite azeikuh.Ref 1.16: Lev 11.44-45, 19.2
17 Ccungccaw miakaw kha a ryalaw thyhte, laesahnaw um lei lante bya a piapaw Paaw kha na ko na ngia oh ze, e laephi vaw na um lungkhu oh balyn amaw rawrinaw te um oh.
18 Nae minpaaw hae kyate na mue oh paw accakaepaw nae hiinzia kyate, phua te sui tahawpaw arohthyapaw uccaw hae khate nanning kha shawkhaw na thua khyh oh,
19 ccaenaw um leipaw, athunaw um leipaw, tuutaw hawte athuapaw Khri kya-e aphutepaw chiise te nynh shawkhaw na thua oh cipaw kha na ny oh.
20 Tuh-e Khri tuh laephi atho mawze laerui-awde ty vae paw la thua salamah hynh-e nyathyakou ccyh kyahin nanning hanlan yn langkuh.
21 Khri kha chinaw kyate thoosah zah phu-enaw a pyatupaw Pachia kha Khri liate na zyn oh. Tuhteze nynh nae zynnaw te nae ngaehoinaw tuh Pachia kya a um.
22 Nanning nynh byaccing kaw kha na ngae oh liate nae hiinnaw kha na thyaasakuh vae oh zah, uno tungvaw ahmepaw sungsahnaw kya athyaapaw thinlung khate lu kheit te lu kheit thawmawte sungsakuh oh.
23 Pawccecize arohthyapaw ccacii te thua leite, arohthya leipaw, ahiinpaw te zungzae atynpaw Pachia bya liate nynh na puithui oh.
24 Pawccecize Ccathyaa nynh,
“Ccungccaw balyn tuh
lonua hawte thua hae zah,
ccungccaw phu-enaw balyn tuh
lonua apaw hawte nynh thua.
Lonua tuh naan zah,
lonua apaw tuh akhuakuh.Ref 1.24-25: Isa 40.6-8 (LXX)
25 Thuasalama Bawipaw bya tuh
zungzae atyn,” a ci.
Tuh-e bya tuh nae kalan hopya athuapaw thehoypaw bya nynh thua.