OBADIAH
Obadiah
E ccauh taraw hynh BC 856 kum Jerusalem aroh koute yn poupaw nynh thua. Judah rhaw athua zungzaepaw Edom tuh Jerusalem aro keiccuze a lungtua kyalya thua leite Judah a vawsawnaw kha lunghoyria zah Jerusalem kha a thiingbua. Israel rhaw athua hae paw ramccang hae ryte Edom tuh detahnaw a ing cih zah a shung cih cite Obadiah nynh a hodae.
1
Edom Detahnaw
Obadiah nynh a muihpaw vizin.
 
Edom ram konglang kha
Bawipaw PACHIA nynh hynhte a ho:Ref vv.1-14: Isa 34.5-17, 63.1-6; Jer 49.7-22; Eze 25.12-14, 35.1-15; Amo 1.11-12; Mal 1.2-5
Bawipaw nynh minphuin hae kalan khe
locceihtu kha saw zah:
“Thoku tua oh! Edom kha
rhawtuk khylan thonuakuh oh sih!”
a cipaw bya kha ah thae vae oh.
Nang kha minphuin hae laku kya
adih huaccepaw lang kae rae ccaccing cih;
nang tuh dothatheihpaw na thua cih.
A lysakuhpaw na thinlung nynh
nang kha ae ling vae,
nang tuh lungtungpi hae laku khe na um zah,
ahangpaw hmin hae kya na um.
Na thinlung kyakhe,
“Hum nynh mou laekhu lang
yn sahbung kho cih?” na ciku.
Nang tuh mosipi hawte
na hangkuh thung zah,
awsi hae laku khe bu na luaku zemah,
tuin kyate kae sahbung cih, cite
 
Edom kha Liarunaw
Nang tuh pawcihtemou ro na thua!
Miruh hae nynh na kalan
oun thua hae ze thuasah,
luadetu hae nynh khuazi khe
oun thua hae ze thuasah,
a ry hae paw kyalya kha
ruh khyh hae tou?
Misu thae lotu hae nynh
na kalan oun thua hae ze,
a lobang hae paw beihtaraw kha
cciataw khyh hae tou?
Esau uccaw kha phe luade vae hae,
a thuruhpaw a sisua hae kha
ccung hae zah a lua vae hae!
Na hokuhbung oh paw balyn nynh
nang kha ae ling vae hae,
nang kha ramri langkhe ae dee vae hae;
na vaeccawkuh oh paw nynh
ae tae vae hae;
na looh a ae hae paw nynh
kaang ae syakhaw vae hae,
tuh-e kong kha nythyanaw na hoi vae khyh.
Bawipaw nynh a hopaw tuh,
tuin nin vae tuh, Edom ram e
a haw hae paw te Esau Mua e
nythyanaw a hoi hae paw kha
ka roh cih hae.
Pou Teman, na rhawkaw hae tuh
mih bungzou cih,
tuhteze nynh Esau Mua
a um hae paw balyn kha
chia athua cih hae.
Edom nynh A Uno A Rawse
10 Nang nynh na uno Jakob kha
puathote na chia keiccuze
maethyanaw na mue cih zah,
phe thang lan chia na thua cih.
11 Minphuin ccangpaw hae nynh
a sisua kha a cciakhae lya hae khe,
ramccang hae nynh a koikua lungkhu lang
teenua hae zah, Jerusalem e
uccaw hae kha ccungthydungte
a neeku hae nin khe,
nang tuh ccanglang khe
namaw um lan zya na um nin kya,
nang mah ramccang hae ryte
nae lunglokuh bua.
12 Na unopaw vethyanaw a tung nin khe,
na unopaw tungvaw kya
lunghoy na ria lan ccan khyh;
Judah ccungccaw hae a ro nin hae khe,
nang tuh lungpawte
na um lan ccan khyh;
riathaenaw a tung nin hae khe,
nang tuh na pooku lan ccan khyh.
13 Ka ccungccaw hae nynh
shethya a tung lya hae khe,
mih koikua lungkhu lang
na tee lan oh ccan khyh.
Judah nynh shethya a tung nin,
aning a vawsaw nin kha
lunghoy na ria lan ccan khyh;
aning nynh shethya a tung nin khe,
a uccaw kha na luade lan ccan khyh.
14 Lue khylan a ccue hae paw kha chia khylan,
laanpi a tungkunaw kya
na thadyn khaw lan hae ccan khyh;
mih vawsaw nin kya,
a hiinhy hae paw kha rhaw hae kuih kya
na ap lan hae ccan khyh.
 
15 Minphuin hae balyn tungvaw kya
Bawipaw byapianaw nin tuh anae vae.
Na cyi hawte na tungvaw cyi athua cih;
na cyisahnaw tuh
na lu vawlan accah cih.
16 Nanning ka ccungccaw hae nynh
athyaapaw ka mua vawlan
na ae na la nia oh keiccuze
nae pepan e minphuin hae balyn nynh
a ae a neih cih hae;
minmin nynh a neih cih hae,
a due cih hae zah marya a zo cih hae.
Israel kya-e Nyathyakou Taenaw
17 Thuasalama Zion Mua vawlan khe
a lue hae paw tuh a um cih hae zah,
tuh-e hmin tuh hmin thyaa athua cih.
Jakob ciihan hae nynh mih ram
a la luatu hae kha a luaru cih hae.
18 Jakob ciihan hae tuh
maee athua cih hae zah,
Josef ciihan hae tuh
maeesoi athua cih hae,
Esau ciihan hae tuh
athupaw athua cih hae,
maee te a soi cih hae zah
minmin kha a u cih hae,
Esau ciihan a hiinhypaw um lan khyh hae;
pawccecize Bawipaw nynh phe a ho vae.
19 Negeb kya um hae paw nynh
Esau Mua kha a ccou cih hae,
Shefelah kya um hae paw nynh
Filistin ram kha a ccou cih hae,
minmin nynh Efraim ram te
Samaria ram kha a ccou cih hae,
Benjamin ccungccaw hae nynh
Gilead ram kha a ccou cih hae.
20 Kyngte cciakhae thua hae zah
Halah kya um hae paw Israel hae nynh
Foenisia ram kha
Zarefath khua kyacia a ccou cih hae;
kyngte cciakhae thua hae zah
Sefarad kya um hae paw
Jerusalem khuaccaaw hae nynh
Negeb ram kya um hae paw
khua hae kha a ccou cih hae.
21 Khum athua hae paw tuh
Esau Mua kha uk khylan,
Zion Mua lang a kaethung cih hae;
te peenaw tuh Bawipaw peenaw athua cih.