3
Aaron Ccapaw hae
Bawipaw nynh Moses kha Sinai Mua vawlan bya a hopya lyaze, e hae hynh Aaron te Moses ccaawno hae nynh thua hae. E hae tuh Aaron ccapaw hae min nynh thua: Ccatawccaw Nadab, te Abihu, Eleazar te Ithamar;Ref 3.2: Nam 26.60 e hae tuh ranpibawi lante ordain pya thua hae zah, chitui thuh athuapaw ranpibawi hae, Aaron ccapaw hae min nynh thua. Nadab te Abihu tuh Sinai ramkaw khe athyaa leipaw maee kha Bawipaw malang he a pya hae tuh, Bawipaw malang khe phe a chih hae, minmin tuh ccaawno hoi khyh hae. Eleazar te Ithamar tuh mih paaw Aaron a hiin lyakhe ranpibawi rya a lah hae.Ref 3.4: Lev 10.1-2; Nam 26.61
Levi Phin hae Ryalaw
Oute Bawipaw nynh Moses kha hynhte a hopya: Levi phin hae nynh Aaron kha a bawm ccaw hae, minmin kha cciakhae hae lah, ranpibawi Aaron malang khe thuakhae hae. Minmin nynh tungkunaw bu malang khe Aaron elang te zapi balyn hanlan ryalawpyate beikbu kyakhe rya a lah cih hae; minmin tuh tungkunaw bu accinccang balyn kha a do-oihtu athua cih hae zah, beikbu kya ryalawbia te Israel hae elang rya a lawpah cih hae. Levi phin hae kha Aaron te a ccapaw hae kalan na pya cih hae; Israel hae laku kyate minmin kha Aaron kalan khaleih mawte pya athua hae. 10 Aaron te a ciihan hae kha ryalaw na pya cih hae zah, ranpibawi rya kha a lah cih hae, atolang e ccangpaw ccungccaw a naekuhpaw tuh chia athua cih.
11 Bawipaw nynh Moses kha hynhte a hopya: 12 Israel hae laku kyaze ccatawccaw balyn ccelang Israel hae laku kyate Levi phin hae kha ka law vae hae. Levi phin hae tuh kamaw kya-e athua cih hae, 13 pawccecize ccatawccaw balyn te thanty balyn tuh kamaw kya-e nynh thua; Izip ram kya ccatawccaw balyn kha ka chia lyaze Israel hae kya tuh ccungccaw thuasah, sahiinpaw thuasah ccatawccaw balyn te thanty balyn kha kamaw elang ka thyaasah; minmin tuh kamaw kya-e athua cih hae. Kae tuh Bawipaw nynh ka thua.Ref 3.13: Exo 13.2
Levi Phin hae Milu Rianaw
14 Oute Bawipaw nynh Moses kha Sinai ramkaw khe hynhte a hopya: 15 Levi phin hae kha puizia te thuasah, phin te thuasah milu ria hae. Sawpaw sah kheit te palung lang pise miakaw kha na ria cih. 16 Tukeiccuze Moses nynh Bawipaw bya thyhte, a tungvaw kawpya athua hawte minmin kha a ria hae. 17 Akawlan e hae hynh mih min thyhte Levi ccapaw hae nynh thua: Gershon, Kohath te Merari. 18 E hae hynh mih phin thyhte Gershon ccapaw hae min nynh thua: Libni te Shimei. 19 Kohath ccapaw hae tuh mih phin thyhte: Amram, Izhar, Hebron te Uzziel nynh thua hae. 20 Merari ccapaw hae tuh mih phin thyhte: Mahli te Mushi nynh thua hae. E hae tuh mih puizia thyhte Levi phin nynh thua hae.
21 Gershon kyate a tho hae paw tuh Libni phin te Shimei phin nynh thua hae. E hae tuh Gershon phin nynh thua hae. 22 Sah kheit te palung lang pise miakaw milu ria athua hae paw tuh thong sari za pangaw acih hae. 23 Gershon phin hae tuh beikbu anulang, niccaw langkhe ryahmin a tahkuh cih hae, 24 Gershon phin hae kyaze lupi tuh Lael ccapaw Eliasaph nynh thua. 25 Tungkunaw bu kyaze Gershon ccapaw hae ryalaw tuh beikbu do-oihpaw kha athua cih, bu te tuh-e kya adawkuhpaw, tungkunaw bu thuakaw kya zopaw boei, 26 voidu kya zopaw boei hae, beikbu te silawhang pe umpaw voidu thuakaw kya zopaw boei, te a rui hae—e hae te akyngkuhpaw ryalaw balyn kha nynh thua.
27 Kohath kyate a tho hae paw tuh Amram phin, Izhar phin, Hebron phin te Uzziel phin nynh thua hae; e hae tuh Kohath phin nynh thua hae. 28 Sah kheit te palung lang pise balyn ria athua hae paw, beikinnthyaa a do-oih hae paw tuh thong tarya za taruh acih hae. 29 Kohath phin hae tuh beikbu alia langkhe ryahmin a tahkuh cih hae, 30 Kohath phin hae kyaze lupi tuh Uzziel ccapaw Elizafan nynh thua. 31 Mih ryalaw tuh byakin thingkua, ccaboi, maeekhuatung, silawhang hae, ranpibawi ryalawnawpaw beikinnthyaa accinccang hae te zokhawpaw boei—e hae te akyngkuhpaw ryalaw balyn kha nynh thua. 32 Ranpibawi Aaron ccapaw Eleazar tuh Levi phin hae kya-e cciakhaetu hae kyaze lupi athua cih zah, beikinnthyaa a do-oihtu hae kha a uktu athua cih.
33 Merari kyate a tho hae paw tuh Mahli phin te Mushi phin nynh thua hae: e hae tuh Merari phin nynh thua hae. 34 Sah kheit te palung lang pise balyn ria athua hae paw tuh thong taruh za ning acih hae. 35 Merari phin hae kyaze lupi tuh Abihail ccapaw Zuriel nynh thua; minmin tuh beikbu palung langkhe ryahmin a tahkuh cih hae. 36 Merari ccapaw hae kya pya athuapaw ryalaw tuh beikbu pang hae, pangccaw hae, tung hae, ccusy hae, te hynh-e hae te asekuhpaw accinccang balyn—e hae te akyngkuhpaw ryalaw balyn kha nynh thua; 37 voidu tung hae, te mih ccusy hae te ccong hae te arui hae kha mah minmin ryalaw athua cih.
38 Beikbu malang nithua lang, tungkunaw bu malang nithua lang hawi langkhe ryahmin a tahkuh cih hae paw tuh Moses, Aaron te a ccapaw hae athua cih hae, beikinnthyaa lungkhu Israel hae elang cyi lanpaw phungzae miakaw kha minmin nynh a cyih cih hae; atolang e ccangpaw lukhakheit a naekuhpaw tuh chia athua cih. 39 Bawipaw nynh kaw a pya hae thyhte, Moses te Aaron nynh mih phin thyhte, sah kheit te palung lang pise balyn a ria hae paw Levi phin hae tuh thong kuin lae ning acih hae.
Ccatawccaw Shawkhawnaw
40 Oute Bawipaw nynh Moses kha, “Israel hae kya-e sah kheit te palung lang ccatawccaw pise balyn kha ria hae lah, mih min lawtua hae. 41 Thuasalama Levi phin hae kha tuh kamaw elang min na lah cih hae—kae tuh Bawipaw nynh ka thua—Israel hae laku e ccatawccaw balyn ccelang thuasah, Levi phin hae sahiin-awvaw hae kha Israel hae sahiin-awvaw kya-e thanty balyn ccelang thuasah na lah cih hae,” a cipya. 42 Tukeiccuze Bawipaw nynh kaw a pya thyhte Moses nynh Israel hae kya-e ccatawccaw balyn kha a ria hae. 43 Sah kheit te palung lang ccatawccaw pise balyn tuh mih min thyhte thong kuin lae ning za ning sung sari lu thum acih hae.
44 Oute Bawipaw nynh Moses kha hopah zah: 45 “Levi phin hae kha Israel hae kya-e ccatawccaw balyn ccelang thuasah, Levi phin hae sahiin-awvaw kha Israel hae sahiin-awvaw hae ccelang thuasah lah hae; Levi phin hae tuh kamaw kya-e athua cih hae. Kae tuh Bawipaw nynh ka thua. 46 Levi phin hae laeze alunghua hae paw Israel ccatawccaw hae za ning sung sari lu thum kha shawkhawnaw mee tuh, 47 lu kheit ze shekel ccangpangaw cci na lah cih, beikinnthyaa kya-e shekel thyhte shekel ccangkheit ze kerah ccangkuin nynh thua. 48 Alaepaw Israel hae shawkhawnawpaw phua kha Aaron te a ccapaw hae kalan na pya cih,” a cipya. 49 Tukeiccuze Israel ccatawccaw hae kha Levi phin hae khate shaw hae zah, alae ung hae paw ccatawccaw hae shawkhawnawpaw phua kha Moses nynh a law; 50 Israel ccatawccaw hae kyate, shekel thong kheit za thum sung taruh ccangpangaw kha a law, tuh-e tuh beikinnthyaa kya-e shekel thyhte riapaw nynh thua; 51 te Moses nynh shawkhawnawpaw phua kha, Bawipaw bya thyhte, Bawipaw nynh Moses kha kaw a pya hawte, Aaron te a ccapaw hae kha a pya hae.