15
Silawnaw Aphuinphuin
1 Bawipaw nynh Moses kha hynhte a hopya:
2 Israel hae kha hynhte hopah hae: Nanning na um nawlan oh, kae pya cih oh paw ram lungkhu lang he na tee oh te,
3 tuuphu te khyhze vaetua phu te Bawipaw kalan maee te silawnaw—maee-ute silawnaw khyhze silawnaw kha thuasah, byakinkunaw ccingsah khylan khyhze lungthote silawnaw lante thuasah, accyh khyapaw poi hae kya thuasah—Bawipaw hanlan mynkhuhpaw na raepya oh zetuh,
4 tuhcihawpaw silawnaw kha Bawipaw kalan a raepaw miakaw nynh ccathae silawnaw kha a raebia cih, tuh-e ccathae silawnaw tuh chitui hin kheit kya-e pum pali pum kheit te apydekuhpaw ahoypaw vaekhui ephah ccangkheit kya-e pumhaw pumkheit nynh thua.
5 Tuh apiaze, niapaw silawnaw lante misutui hin kheit kya-e pum pali pum kheit kha maee-ute silawnaw khyhze silawnawpaw ryte na pya cih, tuh-e tuh tuutaw sa kheit ccite paccynde lanpaw nynh thua.
6 Tuutepaw athua ze, ahoypaw vaekhui ephah ccangkheit kya-e pum haw pum ning te chitui hin kheit kya-e pum thum pum kheit apykuhpaw ccathae silawnaw kha na rae cih;
7 te Bawipaw hanlan mynkhuhpaw, misutui hin kheit kya-e pum thum pum kheit kha niapaw silawnaw lante na rae cih.
8 Maee-ute silawnaw lante thuasah, silawnaw lante thuasah, byakinnaw ccingsahnaw hanlan thuasah, ccawkunaw silawnaw lante thuasah tangnuapaw sa kheit kha Bawipaw kalan he na pya vae ze,
9 tangnuapaw ryte ccathae silawnaw, vaekhui kha ephah ccangkheit kya-e pumhaw pum thum te chitui hin angankuh apykuhpaw kha na pya cih,
10 te niapaw silawnaw lante misutui hin angankuh kha maee te silawnawpaw lang na pya cih, tuh-e tuh Bawipaw hanlan mynkhuhpaw athua cih.
11 Tangnuapaw thuasah, tuutepaw thuasah, tuutaw pise thuasah, miaataw thuasah, tuh-e hae sa kheit cci hanlan tuhcite cyi athua cih.
12 Na silawnaw alung azya thyhte, sa kheit cci kha tuhcite na cyih cih.
13 Israel minphuin athuapaw miakaw nynh maee te silawnaw, Bawipaw kalan mynkhuhpaw kha hynhcite a cyih cih.
14 Nae kya a umpaw ramccang ccungccaw nynh thuasah, nanning laku kya zungzae a umpaw nynh thuasah maee te silawnaw, Bawipaw kalan mynkhuhpaw kha a pya ry ze, na cyi oh hawte a cyihbua cih.
15 Zapi kyaze, nae hanlan te a um buapaw ramccang ccungccaw hanlan upadi ccangkheit kyalya a um cih, nae she takyh kya zungzae tynpaw upadi athua cih; nanning te ramccang ccungccaw hae tuh Bawipaw malang na lokuh cih oh.
16 Nanning te nae kya a umbua hae paw ramccang hae nynh upadi alokuhpaw te phungzae alokuhpaw kha na hoi cih oh.Ref 15.16: Lev 24.22
17 Bawipaw nynh Moses kha,
18 “Israel hae kha hynhte hopah hae: ‘Kae cciakhaenaw oh ram lungkhu lang na thua oh te,
19 ram kya-e looh kha na ae takyh vae oh ze, Bawipaw kalan ahlu na pya cih oh.
20 Masaty anonkuhpaw vaekhui te raepaw sanlou aphepaw kha ahlu lang na pya cih oh; ccathae tinnawpaw kyate ahlu na pya oh hawte na pya cih oh.
21 Masaty na non oh paw vaekhui kyate ahlu kha nae she takyh kya Bawipaw kalan na pya cih oh.
22 “Thuasalama Bawipaw nynh Moses kalan a hopyapaw hynh-e kawbya balyn.
23 Moses kyate Bawipaw nynh kaw ae pya oh paw atyn-are kha, Bawipaw nynh kaw ae pya nin oh kyate malang nae she takyh kya tuaku ty leite, zui leite na umsei oh ze,
24 zapi nynh ny leite, tuaku ty leite a cyisei hae ze, zapi balyn nynh phungzae thyhte, maee-ute silawnaw, Bawipaw kalan mynkhuhpaw hanlan anopaw tangnuapaw sa kheit kha ccathae silawnaw te niapaw silawnaw ryte thuasah, seithyaanaw silawnaw hanlan miaatepaw sa kheit kha thuasah a pya cih hae.
25 Ranpibawi nynh Israel zapi balyn hanlan seingaethyanaw kha a raepah cih hae zah minmin tuh ngaethya athua cih hae; tuh-e tuh tuaku ty leite a cyiseipaw athua keiccuze mih Bawipaw kalan maee te silawnaw, te Bawipaw malang mih seithyaanaw silawnaw kha mih cyiseinaw hanlan oun ccyng hae paw nynh thua.
26 Israel zapi balyn te minmin laku a um buapaw ramccang hae tuh ngaethya athua cih hae, pawccecize ccungccaw balyn tuh cyiseinaw kya pong a umbua hae.
27 “Tuaku ty leite aseipaw lukhakheit nynh seithyaanaw silawnaw hanlan miaa nopi kum kheit acihpaw kha a pya cih.Ref 15.27-28: Lev 4.27-31
28 Te ranpibawi nynh cyiseinaw a raepaw hanlan Bawipaw malang seithyaanaw silawnaw kha a raepah cih, tuaku ty leite a cyihseipaw hanlan seishawnaw kha a raepah cih zah ngaethya athua cih.
29 Israel ccungccaw ccaccing athuapaw thuasah, Israel hae laku a um buapaw ramccangpaw thuasah cyiseinaw a raepaw lukhakheit hanlan alokuhpaw upadi kha na hoi cih oh.
30 Thuasalama ramccungccaw thuasah, ramccang ccungccaw thuasah ruasuate seinaw a raepaw tuh Bawipaw maethyalaw keiccuze a ccungccaw hae kyate vua athua cih.
31 Bawipaw bya kha pawlangria leite a kawbya kha a ro keiccuze, tuh-e ccungccaw tuh vua athua ccaccing cih zah a seinaw mee kha a ing cih,” a cipya.
Sabbath Zui leinaw Detahnaw
32 Israel hae nynh ramkaw a um lya hae khe, sabbath nin kya maeething a tyapaw lu kheit kha a muih hae.
33 Tuh-e paw kha a muihtu hae paw nynh Moses, Aaron te zapi balyn kalan khe a thuakhae hae.
34 Tuh-e paw tungvaw pawte cyi lan cipaw aria loh khyh keiccuze amaw kha phang a khung hae.
35 Oute Bawipaw nynh Moses kha, “Khah-e paw kha chia athua cih; zapi balyn nynh amaw kha ryahmin atolang khe lung te a deih cih hae,” a cipya.
36 Bawipaw nynh Moses kaw a pya thyhte, zapi balyn nynh amaw kha ryahmin atolang cciakhae hae zah phe chih lan lung te a deih hae.
Boeining kya Ccaankuhpaw
37 Bawipaw nynh Moses kha,
38 “Israel hae kyakhe, nae boeining aky hae kyakhe ccaannawpaw arui kha sui oh lah, aky takyh kya umpaw ccaannawpaw arui kyakhe meizong arui kha heede oh cite hopah hae.Ref 15.38: Deu 22.12
39 Ccaannawpaw arui kha he na muih oh te, Bawipaw kawbya balyn kha na liathui cih oh zah na cyih cih oh, te nae thinlung te nae mit ryduaanaw kha na zui vae lan khyh oh.
40 Tukeiccuze ka kawbya balyn kha na liathui cih oh zah na zui cih oh, te nae Pachia hanlan nanning tuh na thyaa cih oh.
41 Kae tuh nae Pachia thua khylan Izip ram kyate ae poukhae oh paw Bawipaw nae Pachia nynh ka thua: Kae tuh Bawipaw nae Pachia nynh ka thua,” a ci.