13
Dophitu hae Sawnaw
(Deu 1.19-33)
1 Bawipaw nynh Moses kha,
2 “Israel hae kalan ka pya cih hae paw Kanaan ram dophi khylan ccungccaw hae kha saw hae; mih thokeinaw phin raveih kya-e cciakhaetu pise lu kheit cci kha na saw cih hae,” a cipya.
3 Tukeiccuze Bawipaw kawpyanaw thyhte, Moses nynh Israel hae laku e cciakhaetu pise balyn kha Paran ramkaw kyate a saw hae.
4 E hae hynh mih min nynh thua hae: Reuben phin kyate Zakkur ccapaw Shammua;
5 Simeon phin kyate Hori ccapaw Shafat;
6 Judah phin kyate Jefunneh ccapaw Kaleb;
7 Issakhar phin kyate Josef ccapaw Igal;
8 Efraim phin kyate Nun ccapaw Hoshea;
9 Benjamin phin kyate Raphu ccapaw Palti;
10 Zebulun phin kyate Sodi ccapaw Gaddiel;
11 Josef phin (e hynh Manasseh phin kyate) kyate Susi ccapaw Gaddi;
12 Dan phin kyate Gemalli ccapaw Ammiel;
13 Asher phin kyate Mikhael ccapaw Sethur;
14 Naftali phin kyate Vofsi ccapaw Nahbi;
15 Gad phin kyate Makhi ccapaw Geuel.
16 E hae tuh Moses nynh ram dophi khylan a saw hae paw min nynh thua. Te Moses nynh Nun ccapaw Hoshea min kha Joshua cite a rulae.
17 Moses nynh Kanaan ram dophi khylan minmin kha saw hae zah, “Negeb lang khuin la cceihthung oh lah, mua lang e khua taraw kalan la cceihthung oh,
18 te ram tuh pawmou alo, tuin ram kya um hae paw ccungccaw hae tuh mih thaw asae tou azya tou, alung hae tou azya hae tou,
19 a umnaw hae ram tuh ahoy tou athah tou, a umnaw hae khua tuh lungrua ruakhawkuh tou ruakhawkuh khyh tou,
20 te ram tuh a hoirum tou a ryachi tou, tuin kya thingku hae um tou um khyh tou cipaw la do oh. Nae rawthung sah lah, tuin ram kya-e thingthae beihtaraw kha nae phu cih oh,” a cipya hae. Tuh-e ccyh tuh misu thae avoi typaw avoi ccyh nynh thua.
21 Tukeiccuze minmin nynh cceihthung hae zah Zin ramkaw kyate Lebo-hamath pe, Rehob kyacia ram kha a dophi hae.
22 Negeb lang cceih hae zah Hebron khua athua hae; tuin kya Anak ciihan hae Ahiman, Sheshai te Talmai a um hae. (Hebron tuh Izip ram e Zoan khua a sak maw hae kum sari lyate a la sak hae paw khua nynh thua.)
23 Te Eshkol Ccya kya a thua hae, te tuin kya umpaw misu ange nge kheit alonahpaw aran kha bae hae zah lu ning nynh puihnawpaw te a puih hae. Ccalee thae te eboh thae kha mah a phubia hae.
24 Israel hae nynh tuin kyakhe misu nge kha a bae keiccu hae ze, tuh-e hmin tuh Eskhol Ccya a ci hae.
Dophitu hae kyate Thaesahnaw
25 Nin sung pali aro koute dophitu hae tuh tuh-e ram kyate a ki hae.
26 Te minmin tuh Paran ramkaw Kadesh kya um hae paw Moses, Aaron te Israel zapi balyn kalan a thua hae; minmin te zapi balyn kalan khe bya oun phupah hae zah tuh-e ram kya-e thingthae kha a muihsah hae.
27 Te minmin nynh, “Kaening nae sawnaw ram kya kae thua; tuh-e ram kya mateitui te khoilutui lua zah hynh-e hynh ram athae nynh thua.
28 Tuhzemah tuin ram kya khuasahpaw ccungccaw hae tuh mih thawsae; khua hae tuh lungrua te koihlupaw thua hae zah myarya ale hae; tuh apiaze, Anak ciihan hae kha tuin kya kae muih hae.
29 Amalek hae tuh Neged ram kya khuasah hae; Hit hae, Jebus hae te Amor hae tuh mua vaw e khua taraw kya khuasah hae; te Kanaan hae tuh rili pe te Jordan vaw kin kya a um hae,” a cipya hae.
30 Thuasalama Kaleb nynh ccungccaw hae kha Moses malang khe zya daesah hae zah, “Atu palou cceih oh sih lah, khah-e ram kha lah kangmaw oh sih, pawccecize khah-e ram kha solei ah tae cih oh,” a cipya hae.
31 Oute Kaleb ryte a cceihkheih hae paw nynh, “Khah-e ccungccaw hae kha ah dou kho lan khyh oh, pawccecize minmin tuh aening laeze mih thawsaehua,” a ci hae.
32 Tukeiccuze minmin nynh a dophi hae paw ram kong kha Israel hae kya thawthya lante hopah hae zah, “Kae dophipaw ram tuh ram lungkhu a um hae paw kha syrote a aepaw ram nynh thua; te tuin ram kya kae muihpaw ccungccaw balyn tuh mih pynrua myarya ale hae.
33 Tuin kyakhe Nefilim hae (Nefilim kyate a tho hae paw Anak ciihan hae) kha kae muih hae; kaemaw te kaemaw kha tungkhipaw hawte kae muihkuh zah minmin muihnaw kya mah tuhawte nynh kae thua,” a cipya hae.Ref 13.33: Gen 6.4