9
Ccungccaw hae Sei Phykunaw
E sawpaw nin kuin lae pali nin khe Israel hae tuh looh-aesungte buriboei lawkuh hae zah mih lu vawlan vuiping phingkute a pumkuh hae. Israel ccungccaw hae tuh ramccang hae balyn kyate mimaw ccangte thadyn hae zah mih seinaw te mih minpaaw hae hoyleinaw kha a phyku hae. Mimaw umnaw kya thadyn hae zah Bawipaw mih Pachia kawbya ccauh kya-e kha nin pum pali pum kheit lungkhu a ria hae, ccangpaw pum pali pum kheit lungkhu kya mih seinaw phykuh hae zah Bawipaw mih Pachia kha a beik hae. Jeshua, Bani, Kadmiel, Shebaniah, Bunni, Sherebiah, Bani te Khenani tuh Levi phin hae nawkui kya thadyn hae zah Bawipaw mih Pachia kalan roi myarya ccae lante a sia hae. Levi phin hae Jeshua, Kadmiel, Bani, Hashabneiah, Sherebiah, Hodiah, Shebaniah te Pethahiah hae nynh, “Thadyn oh lah, Bawipaw nae Pachia kha zungzae te zungzae cia thehoysah oh. Thehoynaw te phu-enaw balyn laeze hangthung athuapaw aphu-epaw na min tuh thehoyte um sah,” a ci hae.
Te Ezra nynh: “Nang rou nynh Bawipaw na thua; vaaw kha na rae, vaaw te vaaw kya um hae paw vaaw rhawkaw hae balyn thuasah, laephi te laephi vawlan umpaw balyn thuasah, rili te rili lungkhu umpaw balyn thuasah na rae. Mih balyn mawte hiinnaw na pya hae zah vaaw kya um hae paw nynh nang kha ae beik hae. Nang tuh Abram kha na po zah Khaldi ccungccaw hae khua Ur khua kyate na poukhae zah Abraham cite min na phutu Bawipaw Pachia nynh na thua;Ref 9.7: Gen 11.31, 12.1, 17.5 a thinlung tuh na malang a lungzi cipaw na muih zah, Kanaan hae, Hit hae, Amor hae, Periz hae, Jebus hae te Girgash hae ram kha a ciihan hae kalan pya lan amaw kya byakinnaw na rae; te nang tuh na ding keiccuze bya na kinkupaw kha na ccingsah.Ref 9.8: Gen 15.18-21
“Kae minpaaw hae nynh Izip ram kya riathaenaw a teing hae paw kha na muih zah Rili Se kya mih siaruanaw kha na thaepya hae.Ref 9.9: Exo 3.7, 14.10-12 10 Faro te a ryalahtu balyn te a ramccungccaw balyn nynh kae minpaaw hae kha theihryate a cyi hae cipaw na ny keiccuze minmin kha rawsete muihsahnaw te ngaeangnaw hae kha na rae. Atunin cia a umpaw min kha namaw elang na raeku.Ref 9.10: Exo 7.8—12.32 11 Minmin nynh rili kha laerou vawlan te a zua ccaw hae cite mih malang khe rili kha na phiasaku, thuasalama minmin a deehuitu hae kha athungpaw tui lungkhu lang lung accaw hawte akhupaw tui lungkhu langkhe na phung hae.Ref 9.11: Exo 14.21-29, 15.4-5 12 Tuhpiaze khuadae kya maeking tung te na cciakhae hae zah, khuazi kya a ccianaw hae laanpi kha awsah khylan maee tung te na cciakhae hae.Ref 9.12: Exo 13.21-22 13 Sinai Mua vawlan na rungbung zah vaawlang te minmin kha bya na hopya hae;Ref 9.13-14: Exo 19.18—23.33 adingpaw phungzae hae, ahmepaw phungbya hae, ahoypaw phunglang hae te kawbya hae kha na pya hae, 14 athyaapaw na sabbath kha na nysah hae zah kawbya hae, phunglang hae te phungbya kha na ryalahtu Moses kyate na pya hae. 15 Mih vuelaw ze vaawlang te sanlou na pya hae zah mih tuihaw ze lungpi kyate na pousahpaw tui kha na pya hae, minmin pya lan bya na kinkupaw ram kha ccou khylan teenua lan na hopya hae.Ref 9.15: Exo 16.4-15, 17.1-7; Deu 1.21
16 “Thuasalama minmin te kae minpaaw hae nynh lysakute mih lungkhung zah na kawbya hae kha zui khyh hae;Ref 9.16-17: Nam 14.1-4; Deu 1.26-33 17 na kawngae ry leite ei hae zah minmin laku kya na raepaw ngaeangnaw hae kha ccykekuh khyh hae;Ref 9.17: Exo 34.6; Nam 14.18 mih lungkhung zah see lang a tangnaw hae Izip ram lang ki lan bya a paeku hae. Thuasalama nang tuh seinaw ngaethya lan paccynkute um zah thawccih thyapaw, ngaethyaumsah thyapaw, a lungsaepaw te atynpaw sungsahnaw te phe beihpaw Pachia na thua zah minmin kha na vua khyh hae. 18 Minmin nynh vaetuataw zohtuh kha laeekute raekuh hae zah, ‘E hynh Izip ram kyate ae poukhaepaw na Pachia nynh thua,’ ci hae zah myarya lepaw saryanaw byahote a sei lya hae heize,Ref 9.18: Exo 32.1-4 19 na thawccinaw myarya ale keiccuze minmin kha ramkaw kya na vua khyh hae;Ref 9.19-21: Deu 8.2-4 laanpi a muihsah hae paw maeking tung nynh khuadae kya cciataw khyh hae zah, a ccianaw hae laanpi a awsahpaw maee tung nynh mah khuazi kya cciataw khyh hae. 20 Minmin ccangpya nawlan na muisaw hoypaw kha na pya hae, a ae lan hae paw na manna kha pya leite na um khyh hae zah mih tuihaw byn nawlan tui na pya hae. 21 Kum sung pali lungkhu ramkaw kya pawpaw mah ahobou lei lan looh na dang hae; mih boeining tuh pue khyh zah mih ccu tuh phin khyh. 22 Minmin kha peenaw hae te minphuin hae kha taesahte na pya hae zah voikheit lang te voikheit lang cia na nee hae,Ref 9.22: Nam 21.21-35 tuhcite minmin nynh Heshbon Siapharan Sihon ram te Bashan Siapharan Og ram kha a lawku hae. 23 Mih ciihan hae kha vaawlang e awsi zeih na pungzaesah hae zah,Ref 9.23: Gen 15.5, 22.17; Josh 3.14-17 mih minpaaw hae kya teenua lan te law lan na hopya hae paw ram lungkhu langkhe na teekhae hae. 24 Tukeiccuze mih ciihan hae nynh tee hae zah ram kha a ccou hae, mih malang khe tuin ram um hae paw Kanaan hae kha na tae hae zah mih siapharan hae te ramccungccaw hae kha mih rythyte a cyi ccaw hae cite mih kuih kya na pya hae.Ref 9.24: Josh 11.23 25 Minmin nynh akoihkuhpaw khua hae te a hoirumpaw ram kha lah hae zah uccaw phuinccing phe beihpaw inn hae, athaekuhpaw tuisung hae, misu khokhu hae, oliv khokhu hae te athaepaw thingku patae kha a lawku hae; tuhcite ae hae zah mih vueso zah atho hae, myarya lepaw na hoynaw kyakhe mih lungrythua.Ref 9.25: Deu 6.10-11
26 “Tuhzemah minmin tuh kawngae khyh hae, nang kha ae dou hae zah na kawbya kha mih nulang a vua hae,Ref 9.26-28: Judg 2.11-16 namaw kalan ki lan raeringnaw a pyatu hae na profeh hae kha theih hae zah myarya lepaw saryanaw byahote a sei hae. 27 Tukeiccuze minmin kha teingnaw a pyatu hae mih rhaw hae kuih kalan na pya hae. A teing ccyh lya hae khe na kalan sia hae zah vaawlang te na thaepya hae, myarya lepaw na thawccinaw thyhte mih rhaw hae kuih kyate a khum hae paw khumtu hae kha na pya hae. 28 Thuasalama haeungnaw he a mue hae te, na malang hoyleinaw bua rae hae zah mih rhaw hae nynh a uk ccaw hae cite mih rhaw hae kuih kalan na vua hae; tuhzemah minmin nynh oun ki hae zah na kalan he a sia hae te, vaawlang te na thaepah hae zah na thawccinaw thyhte avae patae na luesah hae. 29 Minmin kha na kawbya kalan paleihsaku khylan raeringnaw na pya hae.Ref 9.29: Lev 18.5 Tuhzemah lysakuh hae zah na kawbya hae kha zui khyh hae, zuinaw liate ccungccaw hiinnaw laanpi athuapaw na phungzae hae kha rawsete a sei hae. Puasakute mih lungkhungsakuh hae zah kawngae khyh hae. 30 Kum patae na ngaesangpah hae zah na muisaw te na profeh hae kyate raeringnaw na pya hae;Ref 9.30: 2Si 17.13-18; 2Sh 36.15-16 tuhzemah ngae khyh hae. Tukeiccuze ramccang e minphuin hae kuih kalan na pya hae. 31 Thuasalama nang tuh thawccih thyapaw te ngaethyaumsah thyapaw Pachia na thua keiccuze myarya lepaw na ngaethyaumsahnaw te mih thangnaw kha na thuasah khyh zah na vua khyh hae.
32 “Tukeiccuze atu tuh kae Pachia, alesaepaw, athungpaw te ri lan umpaw Pachia, byakinnaw te atynpaw sungsahnaw a ccingsahtu, kae tungvaw, kae siapharan hae tungvaw, kae bawi hae, kae ranpibawi hae, kae profeh hae, kae minpaaw hae te na ccungccaw balyn tungvaw kya, Assiria siapharan hae she kyate atunin cia yn thuapaw vawsawnaw balyn hynh pawlangria leite beih um nan.Ref 9.32: 2Si 15.19, 29, 17.3-6; Ezra 4.2,10 33 Kae tungvaw a thuapaw balyn kya nang tuh na ding, pawccecize nang nynh tuh lungzite na cyih zah kaening nynh tuh ahoy lei lante kae cyi; 34 kae siapharan hae, kae bawi hae, kae ranpibawi hae te kae minpaaw hae nynh na la pya hae paw na kawbya kha zui khyh hae, na pya hae paw na kawbya hae te raeringnaw kha pawlangria khyh hae. 35 Myarya lepaw na hoynaw te na pya hae paw mih ram, mih malang na nungpya hae paw ram lepaw te a hoirumpaw ram lungkhu khe na rya kha lah khyh hae zah ahoy leipaw mih ryalaw kha maetawkuh khyh hae. 36 A thingthae te a lasung hoypaw kya lungpawkhaeku lan kae minpaaw hae na la pya hae paw ram lungkhu kya kaening tuh atunin see lang kae tang zah see hae nynh kae thua vae. 37 Kae seinaw keiccuze kae luki na sangsah hae paw siapharan hae kalan khe ram a hoirumnaw thae tuh a cceih vae; kae pyn te kae sahiin hae tungvaw kya mah mih rythyte huhan thuakuh hae zah kaening tuh myaryamaw kae riathae,” a ci.
Byakinnaw kya Minthuhkuh hae paw
38 E hae balyn keiccuze atynpaw nawccawnaw kha raete ccaw kae zei zah kae bawi hae, kae ccungccaw Levi phin hae te kae ranpibawi hae nynh mih min kha tazeih a khia hae.